Read Mizo Lushai LEHKHABU PAKHATNA SAMUELA 31 Bible Online

LEHKHABU PAKHATNA SAMUELA 31 - Mizo Lushai bible

LEHKHABU PAKHATNA SAMUELA 31

¹Filistia mite chuan Israel-hote chu an bei a; tichuan, Israel-te chu Filistia-ho lakah an tlânchhia a, mi tam tak Gilboa tlângah chuan an that a.

²Saula leh a fate chu Filistia mite chuan an rawn nangchîng a, a fapa pathum Jonathana te, Abinadaba te, Malkisua te chu an that a.

³Nasa lehzualin Saula chu an rawn bei a, thal kâptute chuan na takin an hliam ta a.

⁴Saula chuan a râlthuam kengtu hnênah, “I khandaih khân min han chhun tlang teh, chuti lo zawng, serh tan lohho an lo kal ang a, min rawn chhun ang a, nuihza siam nân min rawn hmang dah ang e,” a ti a. A râlthuam kengtu chuan a hlauh êm avângin chu chu a ti duh lo va; tichuan, Saula chuan a khandaih chu a la a, a bawh ta a.

⁵A râlthuam kengtu chuan Saula a thi tih a hriat chuan a khandaih chu a bawh ve ta a, an thi dûn ta a ni.

⁶Chumi ni chuan Saula te, a fapa pathum te, a râlthuam kengtu te leh a mite chu an za-in an thi a.

⁷Phairuam râl lehlama Israel mite leh Jordan râla awmte chuan Israel sipaite an tlânchhia tih leh Saula leh a fapate an thi tih an hriat chuan an khua an chhuahsan a, an tlan bo va, Filistia mite chuan an luahsak ta a.

⁸A tûkah chuan Filistia mite chu an râlthuamte hlîp tûrin an va chhuak a, Saula leh a fa pathum, Gilboa tlânga thi chu an va hmu a.

⁹Saula lu chu an tan a, râlthuam chu an hlîp a. Chu thu chu mi zawng zawng hrilh tûrin an milem biakna inah te, Filistia ram pumpuiah mi an tîr bawk a.

¹⁰Saula râlthuam chu Astoret biak inah an dah a, a ruang chu Beth-san kulh bangah an phuar bet a.

¹¹Jabes-gilead miten Saula chunga Filistia mite thiltih chu an lo hriat chuan,

¹²mi huaisenho chu an lo thawk a, zankhuain Beth-san panin an kal a. Saula leh a fate ruang chu Beth-san kulh bang ata an la thla a, Jabes-ah an rawn la a; tichuan, an hâl a.

¹³An ruhte chu an la a, Jabes hmuna Esel thing hnuaiah an phûm a, ni sarih chaw an nghei a.