Read Mizo Lushai LEHKHABU PAKHATNA SAMUELA 4 Bible Online

LEHKHABU PAKHATNA SAMUELA 4 - Mizo Lushai bible

LEHKHABU PAKHATNA SAMUELA 4

¹Samuela thu chu mi zawng zawngin an ngaichâng a. Israel mite chu Filistia mite do tûrin an lo chhuak a, Ebenezer-ah ṭanhmun an khuar a. Filistia mite pawhin Afek-ah ṭanhmun an khuar bawk a.

²Filistia sipaite chu Israel-te bei tûrin an inzâr pharh a, an han inbei a, Filistia mite chuan Israel-te chu an hneh a, indona hmunah chuan mi sângli lai an that a.

³An ṭanhmuna sipaite an lo kîr hnu chuan Israel upate chuan, “Engtizia nge vawiinah LALPAN Filistia mite hmaah min tihtlâwm aw. Hawh u, Silo khuaa LALPA Thuthlung Bâwm kha han la ila; tichuan, kan keng zêl ang a, kan hmêlmate lakah min chhanhim dâwn nia,” an ti a.

⁴Mite chuan Silo-ah mi an tîr a, Cherub chunga ṭhu LALPA Engkimtitheia Thuthlung Bâwm chu an va la a; chutah chuan Elia fa Hofnia leh Finehasa pawh an tel a.

⁵LALPA Thuthlung Bâwm chu an riahhmun an rawn thlenpui veleh Israel mi zawng zawng chu lei nghawr ri dur dur khawpin an au va.

⁶An au thâwm chu Filistia mite chuan an lo hria a, “Hebrai-ho bûkah chuan engtizia nge an au chiam mai le?” an ti a. An bûkah LALPA Thuthlung Bâwm a lo thleng a ni tih an hre ta a.

⁷Filistia mite chuan an hlau va, “An riahhmunah an Pathian a lo kal ta a nih chu! Kan boral dâwn ta, tûn hmain hetiang hi a la awm ngai lo.

⁸Kan chung a va pik êm, chu Pathian chak tak kut ata chu tu nge min chhan chhuak ang? Chu Pathian chu a ni thlalêra Aigupta mite hri ṭha lo pui puia tihlumtu kha.

⁹Mahse, Filistia mite u, zâm lovin huaisen takin bei rawh u, intimipa ula, bei rawh u, in chhiahhlawha an awm ang khân Hebrai-hote chhiahhlawha in awm loh nân,” an ti a.

¹⁰Tichuan, Filistia mite chuan an han bei vak a, Israel mite chu an tlâwm ta a, mi tin mahni in lamah an tlân haw ta a. Indonaah chuan Israel sipaite chu an that chiam a, sîngthum lai an thi a.

¹¹Pathian Bâwm chu an lâksak a, Elia fa pahnih Hofnia leh Finehasa pawh chu an that bawk a.

¹²Chumi ni tak chuan Benjamina thlah mi pakhat indona hmun aṭang chuan a lo tlan haw a, a puan a pawtthlêr a, a luah vaivut a phul a, Silo khua a lo thleng a.

¹³A lo thlen chuan Elia chu kawng sîra ṭhutthlêngah a lo ṭhu a. Pathian Bâwm chu a ngaihtuah êm êm avângin a lo thlîr reng a; chu mi chuan khua a lo thlen chuan thil awmzia chu a rawn sawi a, a khuain an ṭap ta chuah chuah a.

¹⁴Elia chuan an ṭap thâwm chu a lo hriatin, “Engtizia ta mur mur nge?” a ti a. Chu pa chu Elia hnênah hmanhmawh takin a lo tlân a, a hrilh ta a.

¹⁵Elia chu kum sawmkua leh pariat lai a ni a, a mit a chak tawh lo va, khua pawh a hmu ṭha thei lo.

¹⁶Chu mi chuan Elia hnênah, “Indona hmun aṭangin ka lo haw a, vawiinah chu hmun aṭangin ka lo tlânchhia a ni,” a ti a. Elia chuan, “Ka fapa, eng angin nge thil a awm le?” a ti a.

¹⁷Chanchin thar rawn thlentu chuan, “Israel mite chu Filistia-ho hmaah an tlânchhia a, mi tam tak an that bawk a. I fate pahnih Hofnia leh Finehasa pawh an thi a, Pathian Bâwm pawh an chhuhsak ta,” a ti a.

¹⁸Pathian Bâwm chanchin a sawi lai tak chuan kawngka bula a ṭhutna aṭang chuan a zangthalin a tlu a, a ring a tliak a, a thi ta a. Tar tak a ni a, a inzo tawh lo va ni. Kum sawmli chhûng Israel-te chu a kaihruai a.

¹⁹Tin, a monu, Finehasa nupui chuan nau a pai a, a hrin a hun ṭêp tawh a. Pathian Bâwm an lâksak thu te, a pasala pa leh a pasal thih thu te a han hriat chuan nau a vei a, a hring ta nghâl a, a chau hle a.

²⁰A hnuk a chat ṭêp a, nau chhartu hmeichhiate chuan, “Hlau suh, fapa i nei a nia,” an ti a; mahse, a chhâng miah lo va, a ngaihsak hek lo.

²¹“A hmingah Ikaboda ni rawh se, Israel ropuina chu a chuai ta si a,” a ti a. Pathian Bâwm an lâksak a, a pu leh a pasal an thi ta si a,

²²Pathian Bâwm an lâksak avângin ‘Israel ropuina chu a chuai ta,’ a ti a ni.