Read Mizo Lushai LEHKHABU PAKHATNA SAMUELA 5 Bible Online

LEHKHABU PAKHATNA SAMUELA 5 - Mizo Lushai bible

LEHKHABU PAKHATNA SAMUELA 5

¹Filistia miten Pathian Bâwm an lâksak hnu chuan Eben-ezer aṭangin Asdod khuaah an kalpui a,

²Filistia mite chuan Pathian Bâwm chu Dagona biak inah an la lût a, Dagona bulah an dah a.

³A tûk zînga Asdod mite an han thawh chuan, ngai teh, Dagona chu bawkkhupin LALPA Bâwm hmaah chuan a lo tlu dêr a. Tichuan, Dagona chu an la a, a hmun ngaiah an dah leh a.

⁴A tûk leh zînga an thawh chuan, ngai teh, Dagona chu LALPA Bâwm hmaah chuan bawkkhupin a lo tlu leh dêr a. Dagona lu leh a kut bungte chu kawngka bulah a lo lum reng bawk a, a taksa chauh chu a lo awm reng a.

⁵Chu thil avâng chuan Dagona puithiamte leh Dagona biak ina lo kal ṭhîn zawng zawng chuan Asdod khuaa Dagona biak in kawngka bul chu tûn thlengin an la rap ngam lo va ni.

⁶LALPA chuan Asdod-a mite chu na takin a hrem a, ngâwt na chi a veitîr a.

⁷Chu thil thleng chu Asdod miten an hmuh chuan, “Israel-te Pathian Bâwm chu kan hnênah awm tawh suh se, kan Pathian Dagona chungah leh kan chungah a kutthlâk a na êm mai,” an ti a.

⁸Tichuan, Filistia lal zawng zawng an ko khâwm a, “Israel-te Pathian Bâwm hi engtin nge kan tih tâk ang le?” an ti a. Anni chuan “Israel-te Pathian Bâwm hi Gath khuaah kalpui rawh u,” an ti a; tichuan, Israel-te Pathian Bâwm chu an va kalpui ta a.

⁹Khua an thlenpui hnu chuan LALPA chuan chu khua chu a hrem a, khuaa mite chu natna râpthlâk tak a tuartîr a, a tê ber aṭanga a lian ber thlengin ngâwt na chi an vei ta a.

¹⁰Tin, Pathian Bâwm chu Ekron khuaah an thawn a, Pathian Bâwm a lo thlen chuan Ekron khuaa mite chuan, “Israel-te Pathian Bâwm chu keini leh kan mite tihlum tûrin an rawn la ta a nih hi,” tiin an au chiam a.

¹¹Filistia lal zawng zawng chu an ko khâwm a, “Israel-te Pathian Bâwm hi la sawn ula, keini leh kan mite min tihhlum loh nân a awmna ngaiah dah leh rawh u,” an ti a. Pathian hremna chu a nat êm avângin khaw pum pui chu an buai nuai nuai a.

¹²A thi bangte chuan ngâwt na chi chu an vei a, chu khaw ṭap thâwm chuan vân a thleng a ni.