Read Mizo Lushai LEHKHABU PAKHATNA SAMUELA 6 Bible Online

LEHKHABU PAKHATNA SAMUELA 6 - Mizo Lushai bible

LEHKHABU PAKHATNA SAMUELA 6

¹ LALPA Bâwm chu Filistia ramah chuan thla sarih a awm a.

²Filistia mite chuan, puithiam te, aienthiam te an râwn a, “LALPA bâwm hi engtin nge kan tih dâwn le, a hmun ngaia thawn kîr leh dân tûr min hrilh rawh u,” an ti a.

³Anni chuan, “Israel-te Pathian Bâwm hi in thawn kîr a nih chuan a ruakin thawn kîr suh u, a hnênah tihsual man thilhlan hlân ngei ngei ang che u. Tichuan, tihdam in ni ang a, eng vânga a kut tuar nge in nih in hria ang,” an ti a.

⁴Mipui chuan, “Kan bawhchhiat thawi nâna a hnêna kan hlan tûr chu engte nge ni ang?” an ti a. Anni chuan, “Filistia lal zâtin ngâwt lem panga leh chaichîm lem panga rangkachakin siam rawh u; in hripui vei leh in lalte hri vei hi a thuhmun reng a ni.

⁵Ngâwt lem panga leh in ram tichhetu chaichîm lem panga in siamte chuan Israel-te Pathian chu chawimawi rawh u. Tichuan, nangni leh in puithiamte chu, in rante nên a hrem nêp deuh che u mahna.

⁶Farawa leh Aigupta miten an rilru an tikhauh ang khân engah nge in rilru in tihkhauh le? Na taka a sawisak hnuah Israel-te chu an chhuahtîr a, an kal ta a ni lo vem ni?

⁷“Tichuan, tûnah tawlailîr thar buatsaih ula, bâwngpui pahnih, a hnute sâwr lai, nghâwngkawl la bât ngai lo buatsaih bawk ula. Bâwng chu tawlailîr hnuhtîr ula, an note erawh chu in lamah hruai hawsak rawh u.

⁸LALPA Bâwm chu la ula, tawlailîrah chuan dah rawh u. Tin, tihsual man thawina rangkachaka siam in pêkte kha bâwm dangah thun ula, LALPA Bâwm sîrah dah ula, tawlailîr chu kaltîr rawh u.

⁹En reng ula, a awmna ram lam a pana, Beth-semes khaw lam pana a kal chuan hêng chhiatna nasa tak, kan chunga lo thleng hi ama tih a ni ngei ang. A kal loh erawh chuan min hremtu chu amah ni lovin kan chunga vânduaina lo thleng ve hrim hrim a ni ang,” an ti a.

¹⁰An hrilh ang chuan an ti ta a; bâwngpui hnute sâwr lai pahnih chu tawlailîr an hnuhtîr a, an note chu in lamah an khung a.

¹¹LALPA Bâwm chu tawlailîrah chuan an dah a, rangkachaka siam ngâwt leh chaichîm lem nên chuan an dah a.

¹²Bâwngpuite chu Beth-semes panin dîng takin an kal a, bû chung zêlin kawngpui chu an zawh a, ding lamah emaw, vei lamah emaw an pêng hauh lo. Filistia lalte chuan Beth-semes ramri thlengin an zui a.

¹³Beth-semes mite chuan ruamah buh an lo seng a; an han dâk a, bâwm chu an hmu ta a, an hlim hle a.

¹⁴Tawlailîr chuan Beth-semes khuaa mi Josua lo a va thleng a, lungpui lian tak awmnaah chuan a ding ta reng a, tawlailîr thing chu an ek a, bâwngpuite chu LALPA hnêna hâlral thilhlanah an hmang a,

¹⁵Levia chite chuan Thuthlung Bâwm leh rangkachak ngâwt leh chaichîm dahna bâwm chu an chawi sawn a, lungpuiah chuan an hûng a. Beth-semes khuaa mite chuan chumi ni vêk chuan hâlral leh thilhlan dangte chu LALPA hmaah an hlân a.

¹⁶Filistia lal panga chuan an en reng a, chumi ni chuan Ekron khaw lamah an haw leh ta a.

¹⁷An khawpui panga Asdod te, Gaza te, Askelon te, Gath te leh Ekron pual ṭheuhvin Filistia-ho chuan rangkachaka siam ngâwt lem panga LALPA tân sual manah an hlân a.

¹⁸Kulh nei leh nei lo khuaa an lal panga hming kimin rangkachak chaichîm lem panga an telh bawk a. LALPA Thuthlung Bâwm chu Beth-semes khaw mi Josua lova lungpui chungah an rawn dah a; chu lungpui chu tûn thlengin a la awm reng a ni.

¹⁹ LALPA Bâwm chhûng an en avâng chuan Beth-semes khuaa mite chu a hrem a, mi sawmsarih lai a tihlum a. LALPAN a hrem nasat êm avâng chuan mite chu an mangang hle a.

²⁰Beth-semes mite chuan, “He Pathian thianghlim LALPA hmaah hian tu nge ding thei ang le? Kan hnên ata tu hnênah nge a kal leh tâk ang?” an ti a.

²¹Tichuan, Kiriat-jearim mite hnênah mi an tîr a, “Filistia mite chuan LALPA Bâwm an rawn dah leh ta a, lo chhuk thla ula, in hnênah i dah chho vang u,” an ti a.