Read Mizo Lushai LEHKHABU PAKHATNA SAMUELA 7 Bible Online

LEHKHABU PAKHATNA SAMUELA 7 - Mizo Lushai bible

LEHKHABU PAKHATNA SAMUELA 7

¹Tichuan, Kiriat-jearim mite chu an lo kal a, LALPA Bâwm chu an la chho va, tlânga Abinadaba inah chuan an la lût a, a fapa Eliezara chu LALPA Bâwm enkawltu atân an serh hrang ta a.

²Kiriat-jearim-ah chuan Bâwm chu kum rei tak, kum sawmhnih lai a awm ta a. Israel mite chuan LALPA chu an ngai hle a.

³Samuela chuan Israel chhûng tin hnênah, “Thinlung leh tihtakzetin LALPA lam hawi ula, ram dang pathiante leh Astarte limte chu dah bo ula, LALPA hnênah chauh thilhlante hlân ula, a rawng chauh bâwl rawh u; tichuan, Filistia mite kut ata hi a chhan chhuak dâwn che u nia,” a ti a.

⁴Tichuan, Israel-te chuan Baal pathiante leh Astarte limte chu an paih bo va. LALPA rawng chauh an bâwl ta a.

⁵Samuela chuan, “Israel mi zawng zawng Mizpa khuaah lo kal khâwm ula, LALPA hmaah ka ṭawngṭaisak ang che u,” a ti a.

⁶Mizpa khuaah chuan an kal khâwm a, tui an chawi a, LALPA hmaah an leihbua a, chumi ni chuan chaw an nghei a; chutah chuan “LALPA lakah kan lo sual ta a ni,” tiin an inpuang a. Mizpa khuaah chuan Samuela chu Israel-te chunga rorêltuah a ṭang ta a.

⁷Filistia mite chuan Mizpa khuaah Israel-te an kal khâwm tih an hriat chuan, Filistia rorêltute chu anmahni bei tûrin an lo chho va. Chu chu Israel-ten an hriat chuan Filistia-hote chu an hlau ta hle a.

⁸Samuela hnênah chuan, “Filistia mite laka kan him theih nân kan Pathian, LALPA hnênah min dîlsak ngat ngat rawh,” an ti a.

⁹Samuela chuan, berâmno hnute hne lai a la a, hâlral thilhlanah LALPA hnênah a hlân a, Israel mite tân LALPA hnênah a dîlsak a. LALPA chuan a chhâng a,

¹⁰Samuelan hâlral thilhlan a hlan lai tak chuan Israel-te bei tûrin Filistia mite chuan an rawn pan a; nimahsela, LALPA chuan chumi ni chuan Filistia mite chungah khawpui nasa takin a rîktîr dur dur a, chu chuan a timangang a, Israel-te hma ata chu an tlân darh ta vek a.

¹¹Israel mite chu Mizpa khua aṭang chuan an lo chhuak a, Filistia mite chu an ûm ta a, Beth-kar hnuai thlengin kawngah chuan an that zêl a.

¹²Samuela chuan lung a la a, Mizpa leh Sen inkârah chuan a phun a, “Hei chen hi LALPAN min pui a ni,” tiin a hmingah Eben-ezer a vuah a.

¹³Tichuan, Filistia mite chu an tlâwm ta a, Israel ram chu an rûn leh ta lo va. Samuela dam chhûng zawng LALPA chuan Filistia mite lakah Israel-te chu a vêng a.

¹⁴Filistia miten Ekron leh Gath inkâra Israel-te khua an lâksak zawng zawng chu an pe kîr leh a. Israel-te chuan an ram chu Filistia mite kut ata an la leh a. Israel mite leh Amor mite pawh an inrem ta bawk a.

¹⁵Samuela chu a damchhûng zawng Israel-te rorêltu a ni a.

¹⁶Kum tin, Bethel te, Gilgal te, Mizpa khua te a tlawh kual a; chûng khuaa Israel-te chu ro a rêlsak ṭhîn.

¹⁷A in awmna, Rama khuaah chuan a lo kîr leh ṭhîn a, chuta awm Israel mite chu ro a rêlsak a; tin, chutah vêk chuan LALPA maichâm a siam a.