Read Mizo Lushai LEHKHABU PAKHATNA SAMUELA 8 Bible Online

LEHKHABU PAKHATNA SAMUELA 8 - Mizo Lushai bible

LEHKHABU PAKHATNA SAMUELA 8

¹Samuela chu a lo upa ta hle a, a fapate chu Israel-te chunga rorêltuah a ruat a.

²A fa tîr hming chu Joela a ni a, a dawttu chu Abija a ni. Anni chuan Beer-seba-ah ro an rêl a.

³A fate chuan an pa chu an chhûn lo va, dik lo takin ro an rêl a.

⁴Chûng vâng chuan Israel upa zawng zawng chu Rama khuaa Samuela hnênah chuan an lo kal khâwm a,

⁵a hnênah, “Hei le, i lo upa ta hle si a, i fapate lah nangmah angin an khawsa si lo va; hnam dangte angin kan chunga rorêltu tûr lal min ruatsak rawh,” an ti a.

⁶A hnênah, “Ro min rêlsaktu tûr lal min ruatsak rawh,” an tih avâng chuan Samuela chu a lungni lo hle a, LALPA hnênah a thlen ta a.

⁷LALPA chuan Samuela hnênah, “Mipuiin i hnêna thil an sawi zawng zawng chu ngaithla teh; nang an duh lo che a ni lo, kei hi an lal atân min duh lo tihna a ni zâwk e.

⁸Aigupta ram ata ka hruai chhuah ni aṭanga tûn thlengin an thiltih dân zawng zawnga min hawisana, pathian dangte rawng min bâwlsan ṭhîn ang khân i chungah pawh an ti ve ta a nih hi.

⁹Tûnah, an thu ngaithla la, an chunga rorêltu lal chêt dân tûr ngunthlûk takin hrilh vek rawh,” a ti a.

¹⁰Samuela chuan LALPA thu sawi zawng zawng chu lal dîltu mipui chu a hrilh a.

¹¹An hnênah, “Hetiang hian in rorêltu lal chu a awm dâwn a ni: In fapate chu a sakawr-tawlailîr leh a sakawr enkawltuah a hmang ang a, a sakawr-tawlailîr hma lamah an tlân ṭhîn ang.

¹²Ṭhenkhat sipai sâng hotu-ah te, sawmnga hotu-ah te a ruat ang a; ṭhenkhat a leilettuah te, buh sengtuah te a ruat ang. Ṭhenkhatin indo hmanrua te, a sakawr-tawlailîr thuamte an siam ang a.

¹³In fanute chu rimtui siamtuah te, chawchhûmtu atân te, chhang siamtu atânte a hmang ang.

¹⁴In lo te, in grep huan te, in oliv huan te, a ṭha ṭha a chhuhsak ang che u a, a ṭhuihruaite hnênah a pe ang.

¹⁵In thlai leh in grep thar aṭangin sâwma pakhat a la ang a, hotute leh a ṭhuihruaite a pe ang.

¹⁶In chhiahhlawh mipa te, in chhiahhlawh hmeichhia te, in tlangvâl chak te, in sabengtung te a hna thawktu atân a lâksak ang che u.

¹⁷In berâm rual zîng ata sâwma pakhat a lâksak ang che u a, a chhiahhlawhah in ṭang ang.

¹⁸In thlan lalte lakah chhantu dîla in au hun a lo thleng dâwn; chutih hunah chuan LALPA chuan a chhâng lo vang che u,” a ti a.

¹⁹Mahse, mipui chuan Samuela thu chu an ngaithla duh lo va, “Ni lo, lal kan nei ngei tûr a ni;

²⁰tichuan, hnam dang zawng zawng ang kan lo ni ang a, kan lal chuan ro min rêlsak ang a, kan râl dote min dopui dâwn a ni,” an ti a.

²¹Samuela chuan mipui thu sawi zawng zawng chu a hria a, LALPA hnênah a thlen leh a.

²²LALPA chuan Samuela hnênah, “An thu chu zâwm la, lal chu ruatsak rawh,” a ti a. Tichuan, Samuelan Israel mite hnênah, “Mi tin mahni khuaah haw ṭheuh rawh u,” a ti a.