Read Mizo Lushai LEHKHABU PAKHATNA SAMUELA 9 Bible Online

LEHKHABU PAKHATNA SAMUELA 9 - Mizo Lushai bible

LEHKHABU PAKHATNA SAMUELA 9

¹Benjamin thlah, mi pakhat huaisen tak leh chak tak a awm a, a hming chu Kisa a ni. Kisa chu Abiela fapa a ni, Abiela chu Zerora fapa a ni a, Zerora chu Bakorata fapa a ni, Bakorata chu Afia fapa a ni.

²Kisa chuan fapa a nei a, a hming chu Saula a ni. Ani chu tlangvâl hmêlṭha tak a ni a, Israel-te zîngah a tluka hmêlṭha tu mah an awm lo va, a koki thleng pawh an awm hek lo.

³Saula pa sabengtungte chu a bo va. Kisa chuan a fapa Saula hnênah, “Chhiahhlawh zînga pakhat hruai la, sabengtung bo va zawng teh khai,” a ti a.

⁴Tichuan, Efraim tlângram an fang vek a, Salisa ramte pawh an fang a; mahse, an hmu chuang lo. Saalim ram an fang leh a, chutah pawh chuan a awm lo va; tichuan, Benjamin mite ram an fang leh a; mahse, chutah pawh chuan an hmu ta lo fo va.

⁵Zufa ram an thlen chuan Saulan a chhiahhlawh hruai hnênah, “Khai, i hâwng teh ang, ka pain sabengtung ai mahin keimahni min ngaihtuah dah ang e,” a ti a.

⁶Ani chuan, “E taka, he khuaah hian Pathian mi, mi zahawm tak a awm a, a sawi apiang a thleng dik ṭhîn. Tûnah a hnênah kal ila, kan thil zawn kan hmuh theihna tûr kawng min hrilh thei mial mahna,” a ti a.

⁷Saula chuan a chhiahhlawh hnênah, “Kal ila, ani chu eng nge kan pêk ang? Kan chhang bâwm a ruak vek tawh si a, Pathian mi hnêna pêk tûr eng mah kan nei hauh lo, eng nge kan la neih le?” a ti a.

⁸A chhiahhlawh chuan ani chu a chhâng a, “En teh, hei, pawisa tlêm chu kan la nei e, Pathian mi chu ka pe ang a; tichuan, kan kalna tûr chu min hrilh mai ang,” a ti a.

⁹Tûn hmain Israel-te zîngah miin Pathian râwn an duh chuan, ‘hawh teh, hmutheitua hnênah i kal teh ang,’ an ti ṭhîn. Tûnlaia zâwlnei hi tûn hma chuan hmutheitu an ti ṭhîn a ni.

¹⁰Saulan a chhiahhlawh hnênah, “A ṭhat chu, i kal teh ang hmiang,” a ti a. Pathian mi awmna khuaah chuan an kal ta a.

¹¹Khawpui pana tlânga an chhoh lai chuan nula rual tuichawi tûr an tâwk a, “Hetah hian hmutheitua a awm em?” an ti a.

¹²Anni chuan, “Awm e, in lo thlen hma lawk khân a lo thleng a; hmanhmawh ula, vawiinah hmunsângah mi an inthawi a, kan khuaah a lo thleng chiah a ni.

¹³Khua in han luh veleh inthawina hmuna chaw a ei hmain in han hmu mai ang. A thlen hma chuan miten chaw an ei lo vang; chu inthawina malsâwmna sawitu tûr chu a ni a, chumi zawhah mi sâwmte chuan chaw an ei thei a ni. Chho zêl ula, in han hmu mai ang,” an ti a.

¹⁴Khuaah chuan an chho va, an han luh chuan inthawina hmuna Samuela kal tûr chu an han hmu a.

¹⁵Saula lo thlen hma ni chuan LALPA chuan Samuela chu a lo hrilh a,

¹⁶“Naktûk tûn ang hunah Benjamin chi mi pakhat i hnênah ka rawn tîr dâwn; ani chu ka mi Israel-te hotu atân hriak thih la; ani chuan Filistia mite kut ata ka mite chu a chhan chhuak ang. Ka mite au thâwm ka beng a lo thleng ta a, ka ngaihven dâwn a ni,” a ti a.

¹⁷Samuelan Saula a hmuh veleh LALPA chuan a hnênah, “I hnêna ka sawi kha he mi hi a ni; ani chuan ka mite ro a rêlsak ang,” a ti a.

¹⁸Saula chuan kulh kawngka bula Samuela awm chu a va hnaih a, “Hmutheitua in hi khawiah nge a awm, khawngaih takin min hrilh thei em?” a ti a.

¹⁹Samuela chuan, “Hmutheitua chu keimah hi ka ni, inthawina hmun panin ka hmaah chho ve la, vawiinah ka hnênah chaw ei ang che u. Naktûk zîngah in thil duh chu ka hrilh ang che u a; tichuan, in kal dâwn nia.

²⁰In sabengtung, ni thum lai bo tawh chu lungkham suh u, an hmu tawh e. Israel-te mamawh ber chu tu nge ni? Nang leh i pa chhûngte hi an ni lâwm ni?” a ti a.

²¹Saula chuan, “Israel hnam zînga te ber, Benjamina hnam ka ni a, kan chhûngkua pawh Benjamin chi zînga tê ber kan ni asin. Engtizia nge ka hnêna chutiang thu i sawi le?” a ti a.

²²Samuela chuan Saula leh a chhiahhlawh chu pindan lian takah a hruai lût a, an mi sâwm sawmthum zîngah chuan a hmun ṭha berah a ṭhuttîr a.

²³Samuela chuan chawchhûmtu hnênah chuan, “Dah hran tûr ka tih che sahrang kha han la rawh,” a ti a.

²⁴Tichuan, chawchhûmtu chuan a bawp a rawn la a, Saula hmaah chuan a hlui a. Samuela chuan, “Hei hi i chanpual tûr a ni, ei rawh, ka mi sâwmte nên tûna kan ei ho atân kan khêk a nih kha,” a ti a. Chumi ni chuan Saula chu Samuela te nên chaw an kîl ho ta a.

²⁵Inthawina hmun aṭanga khuaa an chhuk hnu chuan Samuela chuan Saula chu in chung zâwlah a titipui a.

²⁶Zîng takah an tho va, Samuela chuan in chunga Saula awm chu a ko va, “Insiam la, ka kaltîr tawh ang che” a ti a. Saula chu a insiam a, Samuela nên chuan an chhuak ta a.

²⁷Kawtchhuah an zu thlen chuan Samuelan Saula hnênah, “I chhiahhlawh hi kal hmasaktîr teh,” a ti a; chhiahhlawh chu a kal ta a. “Nang chu hetah ding rih la, Pathian thu lo thleng ka hrilh ang che,” a ti a.