Read Mizo_Old_version Genesis 1 Bible Online

Genesis 1 - Mizo_Old_version bible

Genesis 1

¹A tîrin Pathianin lei leh vân a siam a.

²Tin, lei hi a chhia a, a ruak ngawt a ni a; tui thûk tak chung chu a thim mup a. Pathian Thlarau chuan tui chungte chu a awp reng a.

³Tin, Pathianin, “Êng lo awm rawh se,” a ti a; tichuan, êng a lo awm ta mai a.

⁴Tin, Pathianin êng chu a en a, ṭha a ti hle a; tichuan, Pathianin êng leh thim chu a ṭhen ta a.

⁵Tin, Pathianin êng chu “chhûn” a vuah a, thim chu “zân” a vuah a. Tichuan, tlai lam a awm a, zîng lam a awm bawk a, a ni khatna chu.

⁶Tin, Pathianin, “Tui leh tui kârah chuan boruak zau tak awm sela, chu chuan tui leh tuite chu ṭhen rawh se,” a ti a.

⁷Tichuan, Pathianin boruak zau tak chu a siam a, boruak zau tak hnuaia tui awmte leh boruak zau tak chunga tui awmte chu a ṭhen ta a; chutiang chu a lo ni ta a.

⁸Tin, Pathianin boruak zau tak chu “vân” a vuah a. Tichuan, tlai lam a awm a, zîng lam a awm bawk a, a ni hnihna chu.

⁹Tin, Pathianin, “Vân hnuaia tuite chu hmun khatah awm khâwm sela, khawmual chu lang rawh se,” a ti a; tichuan, chutiang chu a lo ni ta a.

¹⁰Tin, Pathianin khawmual chu “lei” a vuah a; tui awm khâwmte chu “tuifinriatte” a vuah a. Tin, Pathianin chu chu a en a, ṭha a ti hle a.

¹¹Tin, Pathianin, “Leiin hnim te, thlai chi nei te, thei kûng, leia anmahni chi awm dân tûr anga rah, a rah chhûnga a chi awmte chu chhuah rawh se,” a ti a; tichuan, chutiang chu a lo ni ta a.

¹²Tichuan, lei chuan hnim te, thlai anmahni chi awm dân tûr anga chi nei te, thing anmahni chi awm dân tûr anga rah, a rah chhûnga a chi awmte chu a chhuah ta a. Tin, Pathianin a en a, ṭha a ti hle a.

¹³Tichuan, tlai lam a awm a, zîng lam a awm bawk a, a ni thumna chu.

¹⁴Tin, Pathianin, “Chhûn leh zân ṭhenna tûrin vân boruak zau takah chuan êntute awm sela, chûngte chu chhinchhiahna te, hun bi te, ni te, kum te hriatna tûr ni rawh se;

¹⁵lei chung ên tûrin vân boruak zau takah chuan êntuahte awm bawk rawh se,” a ti a; tichuan, chutiang chu a lo ni ta a.

¹⁶Tichuan, Pathianin êntu ropui zâwk chu chhûn rorêl tûrin, êntu ropui lo zâwk chu zân rorêl tûrin a siam a; arsite pawh khi a siam bawk a.

¹⁷Tin, Pathianin chûngte chu lei chung ên tûr leh,

¹⁸chhûn chungah leh zân chunga rorêl tûr leh, êng leh thim ṭhen tûrin vân boruak zau takah khian a dah ta a. Tichuan, Pathianin chu chu a en a, ṭha a ti hle a.

¹⁹Tichuan, tlai lam a awm a, zîng lam a awm bawk a, a ni lina chu.

²⁰Tin, Pathianin, “Tuite chuan thil siam che thei, nunna neite tam tak chhuah ṭheuh sela, savate pawh vân boruak zau tak, zâwl duaiah, lei chungah chuan thlâwk rawh se,” a ti a.

²¹Tichuan, Pathianin tuifinriat lian pui puite chu a siam a, thil nung che thei tinrêng, tuiin a chhuah ṭheuhte chu, anmahni chi awm dân tûr ang ṭheuhvin a siam bawk a, sava thla nei tinrêng pawh anmahni chi awm dân tûr ang ṭheuhvin a siam bawk a. Tin, Pathianin chu chu a en a, ṭha a ti hle a.

²²Tin, Pathianin, “Chi tam tak thlahin lo pung ula, tuifinriat tuite tikhat rawh u, savate pawh leiah pung rawh se,” tiin mal a sâwm a.

²³Tichuan, tlai lam a awm a, zîng lam a awm bawk a, a ni ngana chu.

²⁴Tin, Pathianin, “Lei chuan thil nung anmahni chi awm dân tûr ang ṭheuhvin ran te, rannung te, ramsa te anmahni chi awm dân tûr ang ṭheuhvin chhuah rawh se,” a ti a; tichuan, chutiang chu a lo ni ta a.

²⁵Tichuan, Pathianin ramsa anmahni chi awm dân tûr ang ṭheuhvin, rante anmahni chi awm dân tûr ang ṭheuhvin, leia bawkvâka kal zawng zawngte anmahni chi awm dân tûr ang ṭheuhvin a siam a. Tin, Pathianin chu chu a en a, ṭha a ti hle a.

²⁶Tin, Pathianin, “Kan anpuiin, keimahni ang takin mihring siam ila; anni chu tuifinriata sangha chungah te, rannung leia bawkvâka kal zawng zawng chungah te thu i neihtîr ang u,” a ti a.

²⁷Tichuan, Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni.

²⁸Tin, Pathianin anmahni mal a sâwm a; Pathian vêkin an hnênah, “Chi tam tak thlaha lo pungin, leilung hi luah khat ula, in thu thuin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,” a ti a.

²⁹Tin, Pathian vêkin, “Ngai teh u, lei chung zawng zawnga thlai chi nei awm tinrêng leh thing tinrêng, thing chi nei rah awmnate chu ka pe che u a ni; in chaw atân a ni ang.

³⁰Tin, leia sa tinrêng hnênah te, chunglêng sava tinrêng hnênah te, leia bawkvâka kal, nunna nei tinrêng hnênah te an chaw atân hnim hring tinrêng ka pe a ni,” a ti a; tichuan, chutiang chu a lo ni ta a.

³¹Tin, Pathianin a thil siam tinrêng chu a en a, ngai teh, ṭha a ti êm êm a. Tichuan, tlai lam a awm a, zîng lam a awm bawk a, a ni rukna chu.