Read Mizo_Old_version Genesis 11 Bible Online

Genesis 11 - Mizo_Old_version bible

Genesis 11

¹Tin, leia mi zawng zawng chu ṭawng hmun khat leh thusawi dân hmun khat an ni vek a.

²Tin, heti hi a ni a, khawchhak lama an insawn zêl lai chuan Sinar ramah phaizâwl an hmu a; chutah chuan awmhmun an khuar ta a.

³Tin, “Hawh u, leirawhchan siam ila, ṭha takin i rawh ang u,” an ti hlawm a. Tichuan, lung aiah leirawhchan an hmang a, a châr nân alkatra.

⁴Tin, “Hawh u, khawpui siam ila, in sâng a chhîpina vân tawng tûrin sa bawk ila, kan hming i tithang ang u; chuti lo chuan, lei chung zawng zawngah hian tihdarhin kan awm dah ang e,” an ti a.

⁵Tin, LALPA chu mihring faten khawpui leh in sâng an siam vêl chu en tûrin a zuk chhuk a.

⁶Tin, Lalpa chuan, “Ngai teh u, mite hi pumkhat an ni a, an zain ṭawng hmun khat an nei si a, hei thil an ti ṭan a nih hi; tûnah zawng an thiltih tum rêng rêngte pawh khap rual a ni tawh lo vang.

⁷Hawh u, i zuk kal ang u khai, ṭawng an inhriat tawn theih loh nân khutah khuan an ṭawng i zuk tihhransak ang u,” a ti a.

⁸Chutichuan, LALPAN anniho chu chuta ṭang chuan lei zawng zawngah chuan a tidarh a; tichuan, an khaw siam chu an bânsan ta a.

⁹Chuvângin, a hming chu Babel an ti a, LALPAN chutah chuan leia mi zawng zawng ṭawng chu a tihhran tâk avângin; chuta ṭang chuan LALPAN anniho chu lei chung zawng zawngah chuan a tidarh ta bawk a.

¹⁰Hêng hi Sema thlahte chu an ni: Sema chu kum za mi a ni a, tuilêt hnu kum hnihah chuan fapa Arpaksada a nei a.

¹¹Arpaksada a neih hnu chuan Sema chu kum zanga a la dam a, fanu leh fapate a nei leh hlawm a.

¹²Arpaksada chuan kum sawmthum leh kum nga a nihin fapa Sela a nei a.

¹³Sela a neih hnu chuan Arpaksada chu kum zali leh kum thum a la dam a, fanu leh fapate a nei leh hlawm a.

¹⁴Sela chuan kum sawmthum a nihin fapa Ebera a nei a.

¹⁵Ebera a neih hnu chuan Sela chu kum zali leh kum thum a la dam a, fanu leh fapate a nei leh hlawm a.

¹⁶Ebera chuan kum sawmthum leh kum li a nihin fapa Pelega a nei a.

¹⁷Pelega a neih hnu chuan Ebera chu kum zali leh kum sawmthum a la dam a, fanu leh fapate a nei leh hlawm a.

¹⁸Pelega chuan kum sawmthum a nihin fapa Reuva a nei a.

¹⁹Reuva a neih hnu chuan Pelega chu kum zahnih leh kum kua a la dam a, fanu leh fapate a nei leh hlawm a.

²⁰Reuva chuan kum sawmthum leh kum hnih a nihin fapa Seruga a nei a.

²¹Seruga a neih hnu chuan Reuva chu kum zahnih leh kum sarih a la dam a, fanu leh fapate a nei leh hlawm a.

²²Seruga chuan kum sawmthum a nihin fapa Nahora a nei a.

²³Nahora a neih hnu chuan Seruga chu kum zahnih a la dam a, fanu leh fapate a nei leh hlawm a.

²⁴Nahora chuan kum sawmhnih leh kum kua a nihin fapa Tera a nei a.

²⁵Tera a neih hnu chuan Nahora chu kum za leh sâwm leh kum kua a la dam a, fanu leh fapate a nei leh hlawm a.

²⁶Tera chuan kum sawmsarih a nihin fapa Abrama te, Nahora te, Harana te a nei a.

²⁷Hêng hi Tera thlahte chu an ni: Tera chuan fapa Abrama te, Nahora te, Harana te a nei a. Tin, Harana chuan fapa Lota a nei a.

²⁸Tin, Harana chu a pianna rama Kaldai-ho khua Ur-ah, a pa Tera hmaah chuan a thi a.

²⁹Tin, Abrama leh Nahora chuan nupui an nei a: Abrama nupui hming chu Saraii a ni a; Nahora nupui hming chu Harana fanu Milkai a ni a, Harana chu Milkai pa leh Iskai pa a ni.

³⁰Tin, Saraii chu a ching a; fa rêng a nei lo va.

³¹Tin, Tera chuan a fapa Abrama te, a fapaa fapa (Harana fapa) Lota te, a mo, a fapa Abrama nupui Saraii te a hruai a; tin, Kanaan-a kal tûrin Kaldai-ho khua Ur aṭang chuan an chhuak ho ta a; tin, Haran khua an thleng a, chutah chuan awmhmun an khuar ta a.

³²Tin, Tera dam chhûng chu kum zahnih leh kum nga a ni a; tin, Tera chu Haran khuaah chuan a thi ta a.