Read Mizo_Old_version Genesis 12 Bible Online

Genesis 12 - Mizo_Old_version bible

Genesis 12

¹Tin, LALPAN Abrama hnênah chuan, “I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh.

²Tichuan, chi ropui takah ka siam ang chia; mal pawh ka sâwm ang chia, i hming ka tiropui bawk ang; tin, nang malsâwmna ni ang che.

³Tin, malsâwmsaktu apiang che chu mal ka sâwm ang a, ânchhe lawhtu che chu ânchhia ka lawh ang; nangmahah chuan leia hnam tin an la thawveng ang,” a ti a.

⁴Chutichuan, Abrama chu LALPAN a hnêna a sawi angin a kal ta a, Lota chu a hnênah a kal ve a. Tin, Abrama chu Haran khua ata a chhuah lai chuan kum sawmsarih leh kum nga mi a ni a.

⁵Tin, Abraman a nupui Saraii leh, a nau fapa Lota leh an sum deh chhuah zawng zawng leh, Haran khuaa an mi neih tâkte chu a hruai a, Kanaan rama kal tûrin an chhuak a. Tin, Kanaan ram chu an thleng ta a.

⁶Abrama chu chumi ramah chuan Sekem hmun thlengin, More sasua thleng chuan a kal zêl a. Chûng lai chuan Kanaan-hote chu chumi ramah chuan an awm a.

⁷Tin, LALPA chu Abrama hnênah a inlâr a, “He ram hi i thlahte hnênah ka la pe ang,” a ti a. Tichuan, chutah chuan a hnêna inlâr LALPA tân chuan maichâm a siam a.

⁸Tin, chuta ṭang chuan Bethel chhak lama tlângah chuan a insawn a, chutah chuan a puan in a zâr a, a thlang lamah chuan Bethel chu a awm a, a chhak lamah Ai khua a awm a; chutah chuan LALPA tân maichâm a siam leh a, LALPA hming chu a lam a.

⁹Tin, Abrama chu chhim ram lam pan cheuvin a insawn ta zêl a.

¹⁰Tin, chumi ramah chuan ṭâm a lo tla a; tin, chumi ramah chuan ṭâm chu a nasat êm avângin, Abrama chu Aigupta rama awm rih tûrin a chhuk ta a.

¹¹Tin, heti hi a ni a, Aigupta rama an luh dâwn lai chuan a nupui Saraii hnênah chuan, “Ngai teh, hmeichhe hmêlṭha tak i ni tih ka hria.

¹²Tichuan, hetiang hi a ni ang, Aigupta-hovin an hmuh hunah che chuan, ‘Hei hi a nupui a nih hi,’ an ti ang a; tin, kei chu min that mai ang, nang erawh chu an zuah ang che.

¹³I zâra ṭha taka ka awm theih nân leh nangmah avânga ka nun theih nân, ‘A farnu ka ni,’ khawngaih takin ti zêl ang che,” a ti a.

¹⁴Tin, heti hi a ni a, Abrama chu Aigupta rama a luh chuan, Aigupta-ho chuan hmeichhia chu an hmu a, a hmêl chu ṭha an ti êm êm a.

¹⁵Pharaoa mi liante pawhin an hmu a, Pharaoa inah an hruai lût ta a.

¹⁶Tin, ani chuan Saraii avângin Abrama chu ṭha takin a ti a; tichuan, berâm te, bâwngpa te, sabengtungpa te, bawihpa te, bawihnu te, sabengtungnu te, sanghâwngsei te a neih phah ta a.

¹⁷Tin, LALPA chuan Abrama nupui Saraii avângin, Pharaoa leh a chhûngte chu sawisak namênin a sawisa ta lo va.

¹⁸Tichuan, Pharaoa chuan Abrama chu a ko va, “Ka chunga i thiltih hi engtizia nge ni le? I nupui a ni tih engati nge mi hrilh loh?

¹⁹‘Ka farnu a ni,’ engati nge i tih? Chumi avâng chuan alâwm ka nupuia ka lo neih tâk hial ni. Aw le, tûnah en rawh i nupui hi, hruai la, kal daih rawh,” a ti a.

²⁰Tin, Pharaoa chuan a chungchâng thu-ah chuan mi hnênah thu a pe a; tichuan, amah an han thlah ta a, a nupui nên, a neih zawng zawng nên.