Read Mizo_Old_version Genesis 13 Bible Online

Genesis 13 - Mizo_Old_version bible

Genesis 13

¹Tin, Abrama chu Aigupta ram aṭang chuan a chhuak a, chhim ramah chuan a chho ta a, a hnênah chuan a nupui te, a neih zawng zawng te, Lota te an chho ve a.

²Tin, Abrama chu ran te, tangkarua te, rangkachak tein a hausa êm êm a.

³Tin, chhim ram aṭang chuan Bethel thleng zakin a kal zêl a, Bethel leh Ai khaw inkâra a tîra a puan in awmnaah khân,

⁴a tîra a maichâm siamna ngeiah khân; tin, chutah chuan Abrama chuan LALPA hming a lam a.

⁵Tin, Lota, Abrama hnêna kal ve pawh khân bêram rual te, bâwng rual te, puan in te a nei ve a.

⁶Tin, an awm dunna tûrin ramin a daih ta lo va, an thil neih chu a nasa êm si a; chutichuan, an awm dûn thei ta hlawl lo va.

⁷Tichuan, Abrama ran pute leh Lota ran pute kârah chuan inhnialna a lo chhuak ta a. Chumi lai chuan Kanaan-hote leh Periz-hote chu chumi ramah chuan an awm a.

⁸Tichuan, Abraman Lota hnênah, “Khawngaih takin, nang leh keia kârah, i ran pute leh ka ran pute kârah pawh inhnialna awm suh se; unau kan ni si a.

⁹Ram chu a pum puiin a awm duai lo vem ni? Khawngaih takin ka hnên ata hi intihrang mai rawh. Nang vei lama i kal chuan kei ding lamah ka kal ang a; a nih loh leh, nang ding lama i kal chuan kei vei lamah ka kal ang e,” a ti a.

¹⁰Tichuan, Lota chu a dâk a, Zoar khaw lam pan zâwng chuan Jordan phaizâwl zawng zawng chu LALPA huan ang, Aigupta ram anga ram tina tui tam tak awm chukna a ni tih a hria a, LALPAN Sodom leh Gomorra khua a tihchhiat hma kha a ni si a.

¹¹Chutichuan, Lota chuan Jordan phaizâwl zawng zawng chu a thlang ta a; tin, Lota chu chhak lamah chuan a insawn a. Tichuan, an inṭhen ta a.

¹²Abrama chu Kanaan ramah chuan a awm a, Lota chu phaizâwl khuaahte chuan a awm a, a puan in chu Sodom khaw thlengin a sawn zêl a.

¹³Tin, Sodom mite chu LALPA mit hmuhin nasa taka suaksual leh mi sual an ni a.

¹⁴Tin, a hnên ata Lota a awm hran hnu chuan LALPAN Abrama hnênah, “Dâk la, i awmna aṭang khân hmâr lam te, chhim lam te, chhak lam te, thlang lam te en rawh;

¹⁵i ram hmuh zawng zawng hi kumkhua atân nang leh i thlahte ka pe dâwn che u a ni.

¹⁶Tin, i thlahte chu leia vaivut ang maiin ka la siam ang; chutichuan, miin leia vaivut hi an chhiar sên chuan, i thlahte pawh chhiar sên an ni ang.

¹⁷Tho la, ram hi a dung leh a vâng fang chhuak rawh; ka pe dâwn che a ni,” a ti a.

¹⁸Tichuan, Abrama chuan a puan in chu a sawn a, Hebron-a awm Mamre sasaw kiangahte chuan awmhmun a va khuar a, chutah chuan LALPA tân maichâm a siam a.