Read Mizo_Old_version Genesis 14 Bible Online

Genesis 14 - Mizo_Old_version bible

Genesis 14

¹Tin, Sinar khaw lal Amraphela te, Ellasar khaw lal Arioka te, Elam khaw lal Kedorlaomera te, Goiim khaw lal Tidala te dam lai chuan heti hi a ni a,

²anni chuan Sodom khaw lal Bera chu an rûn a, Gomorra khaw lal Birsa te, Adma khaw lal Sinaba te, Zeboiim khaw lal Semebera te, Bela khaw lal te chu an rûn bawk a (Bela khua chu Zoar khua a ni a).

³Chûngho zawng zawng chu Siddim ruamah chuan an ṭang tlâng a (chumi ruam chu Tuifinriat Al a ni a).

⁴Kum sâwm leh kum hnih chhûng Kedorlaomera hnuaiah an awm a, a kum sâwm leh kum thumnaah erawh chuan an hel ta a.

⁵Tichuan, a kum sâwm leh kum linaah chuan Kedorlaomera leh a hnêna lal awmte chu an lo kal a, Asteroth-karnaim khuaah Rephaim-hote an that a, Ham khuaah Zuzim-hote an that a, Kiriathaim khuaah Emim-hote an that a,

⁶an awmna Seir tlângah, El-paran thlengin Hor-hote an that a (El-paran chu thlalêr depa awm a ni).

⁷Tin, an kîr leh a, En-mispat an thleng a (chu chu Kadesh a ni a). Amalek-ho rama mi zawng zawng leh Amor-ho, Hazazon-tamar khuaa awmte pawh chu an that leh a.

⁸Tichuan, Sodom khaw lal te, Gomorra khaw lal te, Adma khaw lal te, Zeboiim khaw lal te, Bela khaw lal te chu an chhuak a (Bela khua chu Zoar khua a ni a); tin, Siddim ruamah chuan anniho chu bei tûrin an ṭang tlat a;

⁹Elam khaw lal Kedorlaomera te, Goiim khaw lal Tidala te, Sinar khaw lal Amraphela te, Ellasar khaw lal Arioka te chu bei tûrin; lal paliin lal panga an bei a.

¹⁰Tin, Siddim ruam chu alkatra khurin a khat a; tin, Sodom leh Gomorra khaw lalte chu an tlânchhia a, chutah chuan an tla a, a tla bângte chu tlângah chuan an tlân bo ta a.

¹¹Tichuan, Sodom leh Gomorra mite sum zawng zawng leh an ei tûr zawng zawng chu an la a, an haw ta a.

¹²Lota, Abrama unauva fapa, Sodom khuaa awm chu, a sumte nên an la bawk a, an kal ta a.

¹³Tin, mi pakhat tlân chhuak chu a lo kal a, Hebrai mi Abrama chu a hrilh a; ani chu Amor mi Mamre-a sasaw kiangahte chuan a awm a. Mamre-a chu Eskola unau leh Anera unau a ni a; chûng mite chu Abrama te nêna ṭang za an ni a.

¹⁴Tin, Abraman a fa chu salah an hruai tih a hriat veleh, a ina piang, ama mi, zir thiam sa tawh, zathum leh sâwm leh pariat a hruai chhuak a, Dan khaw thlengin a ûm ta a.

¹⁵Tin, zânah chuan anmahni bei tûrin amah leh a bawihte chu an insem darh a, anniho chu an that a, Hoba khaw thlengin an ûm a (Hoba chu Damaska khaw hmâr lamah a awm a).

¹⁶Tin, sum zawng zawng chu a rawn la kîr leh vek a, a fa Lota leh a sumte chu a rawn la leh vek bawk a, hmeichhiate pawh a rawn hruai leh a, mi dang zawng zawngte nên.

¹⁷Tin, Kedorlaomera leh a hnêna lal awmte thata a hâwn hnuah chuan, Sodom lal chu Save ruamah chuan Abrama hmuakin a chhuak a (Save ruam chu Lal ruam a ni a).

¹⁸Tin, Salem khaw lal Melkisedeka chuan chhang leh uain a rawn la a; ani chu Pathian Chungnungbera puithiam a ni a.

¹⁹Tin, ani chuan Abrama chu mal a sâwm a, “Lei leh vân neitu Pathian Chungnungbera chuan Abrama malsâwm rawh se.

²⁰I hmêlmate i kuta petu, Pathian Chungnungbera chu fakin awm bawk rawh se,” a ti a. Tin, Abrama chuan ani chu engkim sâwma pakhat a pe a.

²¹Tin, Sodom khaw lal chuan Abrama hnênah, “Mihringte hi mi pe la, sumte hi chu nangman nei rawh,” a ti a.

²²Tin, Abrama chuan Sodom khaw lal hnênah chuan, “La zai khat tê pawh, pheikhawk chilhna pakhat tê pawh, i neih rêng rêng chu ka la lo vang, tiin lei leh vân neitu, LALPA, Pathian Chungnungbera lamah chuan ka kut ka phar tawh a ni; chuti lo chuan, ‘Abrama chu keima tihhausak alâwm,’ i ti dah ang e:

²⁴tlangvâlho ei ral leh ka mi kalpuite chanvo chauh lo chu ka la lo vang; Anera te, Eskola te, Mamre-a te chuan an chanvo chu la rawh se,” a ti a.