Read Mizo_Old_version Genesis 15 Bible Online

Genesis 15 - Mizo_Old_version bible

Genesis 15

¹Chûng thil hnuah chuan, “Abram, hlau suh, kei hi i phaw leh i lâwmman nasa tak mai ka ni asin,” tiin, LALPA thu chu Abrama hnênah mumang angin a lo thleng a.

²Tin, Abrama chuan, “Aw Lalpa PATHIAN, eng nge mi pêk ang, fa nei lovin ka awm hlen dâwn a, ka ro khâwmtu tûr chu Damaska khuaa mi Eliezera hi a ni si a?” a ti a.

³Tin, Abrama vêkin, “Ngai teh, chi rêng rêng mi thlahtîr si lo va; en teh, ka ina piang hi ka ro luahtu tûr a ni,” a ti a.

⁴Tin, ngai teh, “Kha mi kha i ro luahtu tûr a ni lo vang; nangma rîla lo la rah tûr ngei chu i ro luahtu tûr a ni zâwk ang,” tiin LALPA thu chu a hnênah a lo thleng a.

⁵Tin, ani chu pâwnah a hruai chhuak a, “Vân lam khi en la, arsite khi i chhiar theih chuan chhiar teh khai,” a ti a. Tin, amah vêkin a hnênah, “I thlahte chu khiti zât khi an la ni ang,” a ti a.

⁶Tin, ani chuan LALPA chu a ring a; tichuan, ani chuan chu chu a felnaah a ruat ta a.

⁷Tin, a hnênah, “He ram hi luah tûra pe tûr chea Kaldai-ho khua Ur ata hruai chhuaktu che LALPA kha ka ni,” a ti a.

⁸Tin, ani chuan, “Aw Lalpa PATHIAN, ka luah ang tih engtin nge ka hriat ang?” a ti a.

⁹Tin, ani chuan a hnênah, “Bâwngla kum thum mi leh kêlpui kum thum mi leh berâmpa kum thum mi leh ṭhuro leh pârvano mi rawn lâk rawh,” a ti a.

¹⁰Tichuan, chûng zawng zawng chu a rawn lâksak a, a lai takah a phel ṭheuh va, a phel pakhat chu a phel lehlam zâwnah chuan a dah ṭheuh zêl a; savate erawh chu a phel ve lo va.

¹¹Tin, sava sa hel ei mite chu saruangahte chuan an zuk fu ṭhîn a, Abrama chuan a lo hnawt kiang zêl a.

¹²Tin, ni tlâk dâwn suar suar lai chuan Abrama chu a lo muhîl ta dêr mai a; tin, ngai teh, thim nasa tak, thil râpthlâk zet hian amah a rawn khuh a.

¹³Tin, Pathian chuan Abrama hnênah, “I thlahte chu anmahni ram lovah chuan mikhualin an la awm ang a, an rawng an la bâwlsak ang tih chiang takin hre rawh khai; tin, kum zali an tirethei ang a.

¹⁴Tin, an rawng an bâwlsakate chi pawh chu ka la ngaihtuah ang a; tin, chumi hnuah chuan sum tam tak neiin an lo la chhuak ang.

¹⁵Nang erawh chu i thlahtute hnênah thlamuang takin i kal ang a; i lua kêlsam ṭo vekin an phûm ang che.

¹⁶Tin, chhuan linaah chuan hetah hian an lo kal leh ang; Amor-ho sualnate hi a la kim rih si lo,” a ti a.

¹⁷Tin, heti hi a ni a, ni a tlâka khua a lo thim chuan, ngai teh, rawh tuina mei khu mup mup leh chûng sa phel kârah chuan, meichher alh hluah hluah kal kal a lo awm a.

¹⁸Chumi ni chuan LALPA chuan, “He ram hi, Aigupta lui aṭanga lui lian pui (Euphrates lui) thlengin i thlahte ka pe tawh:

¹⁹Ken-ho te, Keniz-ho te, Kadmon-ho te,

²⁰Hit-ho te, Periz-ho te, Rephaim-ho te,

²¹Amor-ho te, Kanaan-ho te, Girgas-ho te, Jebus-ho te nên hian ka pe bawk a,” tiin Abrama hnênah chuan thu a thlung ta a.