Read Mizo_Old_version Genesis 17 Bible Online

Genesis 17 - Mizo_Old_version bible

Genesis 17

¹Tin, Abrama chu kum sawmkua leh kum kaw mi a nihin, LALPA chu Abrama hnênah chuan a rawn inlâr a, a hnênah, “Kei, Pathian Engkimtitheia ka ni; ka hmaah awm la, ṭha famkimin awm rawh.

²Tichuan, nangmah nêna kan inkârah thu ka thlung ang a, nasa takin ka tipung ang che,” a ti a.

³Tin, Abrama chu a bawkkhup ta a; tin, Pathianin ani chu a bia a,

⁴“Ngai teh, kei zawngin ka thuthlung chu i hnênah a ni ka thlun ni; tichuan, chi hrang hrang tam tak thlahtu i ni tawh ang.

⁵I hming pawh Abrama a ni tawh lo vang a, i hming hi Abrahama a ni tawh zâwk ang; chi hrang hrang tam tak thlahtu tûra ka siam tâk che hi.

⁶Tin, nasa takin chi ka thlahtîr ang chia, nangmahah chuan chi tih tham zet zette ka siam ang a, nangmah aṭang chuan lalte an lo chhuak bawk ang.

⁷Tin, kei leh nang leh i hnua i thlahte, an thlah chhâwng zêlte thleng pawhin ka thuthlung hi, i tân leh i hnua i thlahte tâna an Pathian ni tûrin, kumkhaw thuthlung atân ka tinghet ang.

⁸Tin, i hnênah leh i hnua i thlahte hnênah chuan i mikhualna ram, Kanaan ram zawng zawng hi kumkhaw ro atân ka pe dâwn che u a ni; tin, kei hi an Pathian ka ni ang,” a ti a.

⁹Tin, Pathian vêkin Abrahama hnênah chuan, “Tin, nang zawngin ka thuthlung hi i zâwm tûr a ni; nangin i zâwm tûr a ni a, i hnua i thlahte, an thlah chhâwng zêlte thleng pawhin an zâwm ve tûr a ni.

¹⁰Hei hi kei leh nang leh i hnua i thlahte kâra ka thuthlung i zawm tûr chu a ni; in zînga mipa tawh phawt chu serh tan tûr a ni.

¹¹Tichuan, in serh vun tisaah chuan serh tanin in awm tûr a ni; chu chu nangmah nêna kan inkâra thuthlung chhinchhiahna a ni ang.

¹²Tichuan, in zînga ni riat mi chu, in thlah chhâwng zêlte thleng pawhin, i thlah ni kher lo pawh, i ina piang emaw, mikhual tu laka mi pawh tangka suma i lei emaw pawh ni sela, mipa tawh phawt chu serh tan tûr a ni.

¹³I ina piang leh i tangka suma i lei pawh serh tan ngei tûr a ni; tichuan, ka thuthlung chu kumkhaw thuthlung atân in tisaah a awm tawh ang.

¹⁴Tin, mipa serh tan loh, a serh vun tisaa serh tana awm lo chu, chu mi ngei chu a chipui zîng ata tihboral a ni ang; ani chuan ka thuthlung chu a bawhchhia a ni,” a ti leh a.

¹⁵Tin, Pathian vêkin Abrahama hnênah, “I nupui Saraii pawh, a hmingah Saraii i ti tawh lo vang a, a hming chu Sari a ni tawh zâwk ang.

¹⁶Tin, ani chu mal ka sâwm ang a, chu lo pawh chu ama lakah chuan fapa ka pe ang che; a ni, amah chu mal ka sâwm ang a, chi hrang hrang thlahtunu a ni tawh ang; hnam hrang hrang lalte ama lakah chuan an lo la chhuak ang,” a ti leh pek a.

¹⁷Chutichuan, Abrahama chu a bawkkhup a, a nui a, a rilruin, “Kum za mi hian fa a nei dâwn em ni ang? Sari, kum sawmkaw mi chuan fa a hring dâwn em ni ang?” a ti a.

¹⁸Tin, Abrahama vêk chuan Pathian hnênah, “Ismaela hi i hmaah awm thei sela aw!” a ti a.

¹⁹Tin, Pathianin, “Ni lo ve, i nupui Sarin fapa a hrinsak zâwk ang che, a hmingah chuan Isaaka i sa tûr a ni; tin, ka thuthlung chu ama hnua a thlahte tân, kumkhaw thuthlung atân a hnênah chuan ka tinghet ang.

²⁰Ismaela chung thu pawh hi ka ngaihthlâksak che a ni; ngai teh, amah chu mal ka sâwm tawh a, chi tam tak ka thlahtîr ang a, nasa takin ka tipung bawk ang; ani chuan lal sâwm leh pahnih a hring ang a, amah chu chi ropui takah ka la siam ang.

²¹Ka thuthlung erawh chu Isaaka, Sarin nakkum hetih hun taka a hrinsak tûr che hnênah chuan a ni ka tihngheh zâwk dâwn ni,” a ti a.

²²Tichuan, a hnêna a thusawi chu a bâng a; tin, Pathian chuan Abrahama chu a chhohsan ta a.

²³Tin, Abrahama chuan a fapa Ismaela leh, a ina piang zawng zawngte leh a tangka suma a lei zawng zawng, Abrahama chhûngte zînga mi mipa tawh phawt chu a hruai a, Pathianin a hnêna a sawi tawh angin, chumi ni ngei chuan an serh vun tisa chu a tansak ta a.

²⁴Tin, Abrahama chu a serh vun tisaa a serh an tan lai chuan kum sawmkua leh kum kaw mi a ni a.

²⁵Tin, a fapa Ismaela chu a serh vun tisaa a serh an tan lai chuan kum sâwm leh kum thum mi a ni a.

²⁶Chumi ni ngei chuan Abrahama leh a fapa Ismaela chu serh tan an lo ni ta a.

²⁷A chhûngte zînga mipa zawng zawng, a ina piangte leh mikhual laka tangka suma a leite pawh, ama rual chuan serh tan an lo ni ta vek a.