Read Mizo_Old_version Genesis 2 Bible Online

Genesis 2 - Mizo_Old_version bible

Genesis 2

¹Tichuan, lei leh vân chu an chunga awmho zawng zawngte nên chuan siam zawh a ni ta a.

²Tin, Pathianin ni sarih niah chuan a thil siam chu a ti zo va, ni sarih niah chuan a thil siam zawng zawng chu a chawlhsan ta a.

³Tichuan, Pathianin ni sarih ni chu mal a sâwm a, a serh ta a; chumi niah chuan Pathianin a thil siam zawng zawng, thu ngawta a siam leh kuta a siamte chu a chawlhsan tâk avângin.

⁴Lei leh vân siam dân chu hetiang hi a ni, LALPA Pathianin lei leh vân a siam ni khân,

⁵leia hnim rêng rêng hi leiah a la awm lo va, leia thlai rêng rêng pawh hi a la ṭo hek lo. LALPA Pathianin lei chungah ruah a la sûrtîr si lo va, lei lettu tûrin mihring lah an la awm hek lo;

⁶amaherawhchu, lei aṭangin chhûm a lo chhuak a, lei chung zawng zawng chu a tihnâwng ṭhîn a ni.

⁷Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a; tichuan, mihring chu mi nung a lo ni ta a.

⁸Tin, LALPA Pathianin chhak lamah, Eden-ah chuan huan a siam a, a mihring siam chu chutah chuan a awmtîr ta a.

⁹Tin, lei aṭangin LALPA Pathianin thing mit la tak leh ei mi tinrêng a ṭotîr a. Nunna thing pawh huan lai takah chuan a ṭotîr a, a chhia leh a ṭha hriatna thing pawh.

¹⁰Tin, Eden aṭangin huan tihnâwng tûrin lui a luang chhuak a; chuta ṭang chuan a pêng darh a, pêng li a lo ni ta a.

¹¹A pakhatna hming chu Pison a ni a; chu chu Havila ram zawng zawng hualtu chu a ni a, chutah chuan rangkachak a awm.

¹²Chumi rama rangkachak chu ṭha tak a ni. Chutah chuan bedolak leh berul lung pawh a awm.

¹³Tin, lui pahnihna hming chu Gihon a ni a; chumi chu Kus ram zawng zawng hualtu chu a ni.

¹⁴Tin, lui pathumna hming chu Hiddekel a ni a; chu chu Assuria ram chhak lama luang chu a ni. Tin, lui palina chu Euphrates a ni.

¹⁵Tin, LALPA Pathian chuan mihring chu a hruai a, Eden huanah chuan a enkawl leh a vêng tûrin a dah ta a.

¹⁶Tin, LALPA Pathian chuan mihring hnênah chuan, “Huana thing tinrêng rahte hi i duh duhin i ei thei e;

¹⁷a chhia leh a ṭha hriatna thing rah erawh hi chu i ei tûr a ni lo, i ei chuan i ei ni la lain i thi ngei tûr a ni,” tiin thu a pe a.

¹⁸Tin, LALPA Pathian chuan, “Mihring amah chauhva awm hi a ṭha lo ve; amah ṭanpuitu tûr a kawppui âwm mi ka siamsak teh ang,” a ti a.

¹⁹Tin, LALPA Pathian chuan leiin ramsa tinrêng leh chunglêng sava tinrêng chu a siam a, an hmingah eng nge a vuah dâwn tih hriat nân Adama hnênah a hruai hlawm a; tin, thil nung tinrêngte chu Adaman an hminga a lo vuah apiang chu an hming a lo ni hlen ta a.

²⁰Tichuan, Adama chuan ran zawng zawng te, chunglêng sava te, ramsa tinrêng te chu hming a vuah ṭheuh va; nimahsela, Adama tân chuan ṭanpuitu tûr a kawppui âwm mi a awm lo va.

²¹Tichuan, LALPA Pathian chuan Adama chu tui takin a muthilhtîr a; tichuan, a muhîl ta a; tin, a nâkruh pakhat a la a, chu chu tisain a awh phuitîr ta a.

²²Tin, LALPA Pathian chuan Adama laka a lâk nâkruh chu hmeichhiaah a siam a, Adama hnênah a hruai ta a.

²³Tin, Adama chuan, “Hei zet chu ka ruh ang ruh neia, ka tisa ang tisa nei ngei chu a ni; mipa laka lâk chhuah a nih avângin ‘hmeichhia’ tih tûr a ni ang,” a ti a.

²⁴Chuvângin, mipain a nu leh a pa a kalsan ang a, a nupui a vuan ang; tichuan, tisa pumkhat an lo ni tawh ang.

²⁵Tin, Adama leh a nupui chu an pahnihin saruakin an awm a, an zak lêm lo va.