Read Mizo_Old_version Genesis 20 Bible Online

Genesis 20 - Mizo_Old_version bible

Genesis 20

¹Tin, Abrahama chu chuta ṭang chuan chhim ram lam panin a insawn a, Kadesh khua leh Sur kârah chuan awmhmun a khuar a; Gerar khuaah chuan a awm ta rih bawk a.

²Tin, Abrahaman a nupui Sari chu, “Ka farnu a ni,” a ti a; tichuan, Gerar lal Abimeleka chuan mi a tîr a, Sari chu a va hruaitîr ta a.

³Nimahsela, Pathian chu zânah a mumangah Abimeleka hnênah a lo kal a, a hnênah, “Ngai teh, i hmeichhe hruai avâng hian mitthi mai i ni ta; mi nupui a ni si a,” a ti a.

⁴Abimeleka erawh chuan a la pâwl rih lo va; tichuan, “Lalpa, mi fel takte pawh i tihlum dâwn em ni?

⁵Amah ngei pawhin ka hnênah, ‘Ka farnu a ni,’ a ti lâwm ni? Tin, ani ngei pawhin, ‘Ka nuṭa a ni,’ a ti bawk si a; thinlung ṭha tak pu leh kut thianghlim tak nei chungin hei hi ka ti a ni,” a ti a.

⁶Tin, Pathianin a mumangah chuan, “Ni, hei hi thinlung ṭha tak pu chungin i ti a ni tih ka hria e. Tichuan, kei pawhin ka chunga thil i tihsual tûr chu ka khap che a ni; chuvângin a ni, amah i khawih ka phal loh ni.

⁷Chutichuan, tûnah mi nupui kha pe kîr leh rawh; ani chu zâwlnei a ni si a, a ṭawngṭaisak ang chia, i dam dâwn nia. I pêk kîr leh loh zawngin i thi ngei dâwn tih hre rawh, nang leh i neih zawng zawng nên,” a ti a.

⁸Tichuan, Abimeleka chu zîng takah a tho va, a chhiahhlawh zawng zawng a ko va, an beng hriatah chûng thu zawng zawng chu a hrilh a; tin, mite chuan an hlau ta êm êm a.

⁹Chutichuan, Abimeleka chuan Abrahama a ko va, a hnênah, “Kan chunga i thiltih hi engtizia nge ni le? Eng kawngah nge i chungah thil ka tihsuala, kei leh ka khua leh tuite chungah hian thil sual nasa tak i rawn thlen hi le? Thil tih âwm loh tak ka chungah i tih tâk hi,” a ti a.

¹⁰Tin, Abimeleka vêk chuan Abrahama hnênah, “Eng nge i hmuha, hetiang thil hi i tih le?” a ti leh a.

¹¹Tin, Abrahama chuan, “He khuaah hian Pathian ṭihna a awm hauh lo ngei ang a, ka nupui vâng hian mi tihlum mai ang tih ka rin vâng a ni.

¹²Chu achhapah ka farnu a ni rêng bawk si a, ka pa fanu a ni a, ka nu fanu erawh chu a ni lo; tin, ka nupuiah a lo awm ta a ni.

¹³Tin, heti hi a ni a, Pathianin ka pa in ata mi vahvaihtîr lai khân, a hnênah, ‘Hei hi i khawngaihna ka chunga i lantîr tûr chu a ni: kan thlenna hmun apiangah, “Ka nuṭa a ni,” ti zêl ang che,’ ka ti rêng a ni,” a ti a.

¹⁴Tin, Abimeleka chuan berâmte leh bâwngpate leh bawihpate leh bawihnute a hruai a, Abrahama chu a pe a, a nupui Sari pawh chu a pe kîr leh ta a.

¹⁵Tin, Abimeleka chuan, “En teh, ka ram chu a awm duai alâwm, i duhna apiangah hian awm rawh,” a ti a.

¹⁶Tin, Sari hnênah chuan, “En teh, i nuṭa hi tangka sângkhat ka pe ta a; ngai teh, i hnêna awm zawng zawngte lakah chuan i tân mit khuhna tûr a nih hi; i chung thu rêng rêngah hian i fel leh tawh vek a ni,” a ti a.

¹⁷Tichuan, Abrahama chuan Pathian hnênah a ṭawngṭaisak a; tin, Pathianin Abimeleka leh a nupui leh a bâwihnute chu a tidam leh a; tichuan, fate an hring leh ta a.

¹⁸Abrahama nupui Sari avâng chuan, LALPA chuan Abimeleka chhûngte zawng zawng chu a tiching ta tlat hlawm si a.