Read Mizo_Old_version Genesis 21 Bible Online

Genesis 21 - Mizo_Old_version bible

Genesis 21

¹Tin, LALPA chuan a sawi tawh angin Sari chu a zuk kan a, LALPA chuan a sawi tawh angin Sari chungah a tihsak ta bawk a.

²Tichuan, Sari chu a rai a, Pathianin a hnêna a sawi hun ruat takah chuan Abrahama chu a tar hnuin fapa a hrinsak ta a.

³Tin, Abrahaman a fapa neih, Sarin a hrinsaka chu a hmingah Isaaka a sa a.

⁴Tin, Pathianin thu a pêk ang khân Abrahaman a fapa Isaaka chu ni riat a tlinin a serh a tansak a.

⁵Tin, Abrahama chu a fapa Isaaka a neih lai chuan kum za mi a ni a.

⁶Tin, Sari chuan, “Pathianin mi tinui ta; mi tin a hria apiangin mi nuihpui ang,” a ti a.

⁷Tin, amah vêkin, “ ‘Sarin nautête a la pawm ang,’ tih tuin nge Abrahama hnênah sawi ngaihna hria ang? A tar hnu hian fapa ka hrinsak tâk hi,” a ti a.

⁸Tin, nautê chu a lo ṭhang lian a, a hnute hnêk an bântîr ta a; tin, Isaaka chu a hnute hnêk an bântîr ni chuan Abrahaman ruai ropui tak a ṭheh a.

⁹Tin, Aigupta mi Hagari fapa, Abrahama tâna a hrina chuan a nuihsan lai Sarin a hmu a.

¹⁰Chumi avâng chuan Abrahama hnênah chuan, “He bawihnu leh a fapa hi hnawt chhuak rawh; he bawihnu fapa hi ka fapa Isaaka ro luahpuitu tûr a ni thei lo vang,” a ti a.

¹¹Tin, chu thu chu a fapa avângin Abrahama ngaih chuan thil ṭha lo tak a ni.

¹²Nimahsela, Pathianin Abrahama hnênah chuan, “Naupang chungchâng thu leh i bawihnu chungchâng thu leh bawih chungchang thu hi i ngaihin thil ṭha lo tak ni suh se; Sarin i hnêna thu a sawi zawng zawng chu zâwm rawh; Isaaka-ah hian i thlahte an la ti dâwn si a.

¹³Tin, bawihnu fapaah pawh hian, i thlah a nih avângin chi tihtham zet ka la siam ang,” a ti a.

¹⁴Tichuan, Abrahama chu zîng takah a tho va, chhang leh tuithâwl tuia khat a la a, Hagari a pe a, a kokiah a chhuansak a, naupang pawh chu a kaltîr ta a; tichuan, a kal a, Beer-seba thlalêrah chuan a vâk a vâk ta a.

¹⁵Tin, tuithâwla tui chu a lo awm ta lo va; tichuan, naupang chu hnimbuk pakhat hnuaiah a dah ta mai a.

¹⁶Tin, “Naupang thi tûr chu ka en ngam lo ve,” a tih avângin a kal a, hla fe, thal kah phâk tâwk angah hian a hma zâwnah chuan a va ṭhu ta chawt a. Tichuan, a hma zâwnah chuan a ṭhu a, ring takin a ṭap ta a.

¹⁷Tin, Pathianin naupang aw chu a hria a; tin, Pathian vântirhkohvin vân aṭangin Hagari chu a zuk au va, a hnênah, “Hagar, eng i ti nge ni le? Hlau suh; a awmnaa naupang aw kha Pathianin a hria asin.

¹⁸Tho la, naupang kha kai tho la, i kutin chelh rawh, amah chu chi ropui takah ka siam dâwn asin,” a ti a.

¹⁹Tin, Pathianin a mit a tihvârsak a, tuichhunchhuah a hmu ta a; tichuan, a va kal a, tuithâwlah chuan tui chu a thun khat a, naupang chu a intîr ta a.

²⁰Tin, Pathian chu naupang hnênah chuan a awm ṭhîn a, a lo ṭhang lian zêl a, thlalêrah a awm ṭhîn a, thal kah thiam mi a lo ni ta a.

²¹Paran thlalêrah chuan a awm a; tin, a nu chuan Aigupta ram ata nupui a neihsak a.

²²Tin, heti hi a ni a, chumi lai vêl chuan Abimeleka leh a sipai pâwl hotu Phikola chuan Abrahama hnênah, “I thiltih apiangah Pathian i hnênah a awm zêl ṭhîn a;

²³chutichuan, tûnah hetah hian Pathian hming chhâlin, kei leh ka fapa leh ka fapaa fapa pawh tihder lovin, ka lo khawngaih tâk che ang khân, kei leh i awmna ram hi khawngaih ve thung zâwk tûrin ka hnênah chhia chham rawh khai!” tiin a sawi a.

²⁴Tin, Abrahama chuan, “Ka chham ang chu,” a ti a.

²⁵Tin, Abimeleka chhiahhlawhten tuichhunchhuah an chhuhsak avâng chuan Abrahaman Abimeleka chu a zilh a.

²⁶Tin, Abimeleka chuan, “Chumi thil titu chu tu nge ni, ka hre hauh lo mai; nang lahin mi hrilh si lo va, vawiinah chauh lo chuan ka la hre ve hauh lo mai,” a ti a.

²⁷Tichuan, Abrahama chuan berâmte leh bâwngpate a hruai a, Abimeleka hnênah a pe a; tin, an pahnih chuan thu an thlung ta a.

²⁸Tin, Abrahaman a berâm rual zînga mi berâmno a nu pasarih a dah hrang a.

²⁹Tichuan, Abimeleka chuan Abrahama hnênah, “Berâmno a nu pasarih a hranga i dah hi engtizia nge ni?” a ti a.

³⁰Tin, ani chuan, “He tuichhunchhuah hi keimahin ka laih a ni tih mi hriatpuina tûrin, hêng berâmno a nu pasarih hi ka kut ata i la tûr a ni,” a ti a.

³¹Chumi avâng chuan chumi hmun chu Beer-seba a vuah a; chutah chuan an pahniha chhia an chham dun avângin.

³²Chutichuan, Beer-seba-ah chuan thu an thlung ta a; tin, Abimeleka chu a tho va, a sipai pâwl hotu Phikola nên Philistin-ho ramah chuan an hâwng leh ta a.

³³Tin, Abrahama chuan Beer-seba-ah chuan fâr thing a phun a, chutah chuan LALPA, Chatuana Pathian hming chu a lam a.

³⁴Tichuan, Abrahama chu Philistin-ho ramah chuan rei tak a awm a.