Read Mizo_Old_version Genesis 22 Bible Online

Genesis 22 - Mizo_Old_version bible

Genesis 22

¹Tin, heti hi a ni a, chûng thil hnuah chuan Pathianin Abrahama chu a fiah a, a hnênah, “Abraham,” a ti a; tin, ani chuan, “Heta hi ka awm,” a ti a.

²Tin, ani chuan, “I fapa, i fapa neih chhun, i hmangaih tak, Isaaka ngei kha hruai la, Moria ramah chuan kal la, chutah chuan ka hrilh tûr che tlâng pakhatah chuan hâlral thilhlanah hlân rawh,” a ti a.

³Tin, Abrahama chu zing takah a tho va, a sabengtung a siam a, a hnênah a chhiahhlawh tlangvâl pahnih a hruai a, a fapa Isaaka nên; tin, hâlral thilhlan atân thing a ek a, a tho va, Pathianin a hrilhna hmun lamah chuan a kal ta a.

⁴Tin, ni thum niah chuan Abrahama chu a han dâk a, a hmun chu hla takah a han hmu a.

⁵Tichuan, Abrahaman a chhiahhlawh tlangvâlte hnênah chuan, “Hetah sabengtung nên hian lo awm rawh u, kei leh naupang hi sawtah sâwn kan va kal ang a; tin, Pathian kan va bia ang a, in hnênah kan lo kîr leh ang,” a ti a.

⁶Tin, Abrahama chuan hâlral thilhlanna thing chu a la a, a fapa Isaaka chu a puttîr a; ani chuan mei leh chemtê a keng a; tichuan, an pahnihin an kal dûn ta a.

⁷Tin, Isaaka chuan a pa Abrahama chu a bia a, “Ka pa,” a ti a; tin, ani chuan, “Ka fapa, heta hi ka awm,” a ti a. Tin, ani chuan, “En teh, mei leh thing chu a awm a; nimahsela, hâlral thilhlan tûr berâmno chu khawiah nge a awm?” a ti a.

⁸Tin, Abrahama chuan, “Ka fapa, Pathianin ama tâna hâlral thilhlan tûr berâmno chu a ngaihtuah chawp mai ang chu,” a ti a; chutichuan, an pahnih chuan an kal dûn ta zêl a.

⁹Tin, Pathianin a hrilh hmun chu an va thleng ta a; tin, Abrahama chuan chutah chuan maichâm a siam a, thing chu a chhep khâwm a, a fapa Isaaka chu a phuar a, maichâma thing chungah chuan a muttîr a.

¹⁰Tin, Abrahama chuan a kutin a ban a, a fapa tihhlum nân chemtê chu a la a.

¹¹Tin, LALPA vântirhkoh chuan vân aṭangin amah chu a zuk au va, “Abraham, Abraham,” a zuk ti a; tin, ani chuan, “Heta hi ka awm,” a ti a.

¹²Tin, ani chuan, “Naupang chungah khân i kut thlâk suh la, amah kha eng mah tih hek suh; i fapa, i neih chhun tak pawh mi pêk i ui loh avângin Pathian i ṭih tih tûnah ka hre ta a ni,” a ti a.

¹³Tin, Abrahama chu a han dâk a, a en a; tin, ngai teh, a hnung lamah chuan berâmpa, a ki thing hnawka lo tâng tlat a awm a; tichuan, Abrahama chuan berâmpa chu a va man a, chumi chu a fapa aiah hâlral thilhlanah chuan a hlân ta zâwk a.

¹⁴Tichuan, Abrahaman chumi hmun hmingah chuan Jehova-jire a vuah a; vawiin thlenga, “LALPA tlângah ngaihtuah a ni ang chu,” an tih ṭhin ang hian.

¹⁵Tin, LALPA vântirhkoh chuan a vawi hnihnaah vân aṭangin Abrahama chu a zuk au leh a,

¹⁶“He thil hi i tih tâk avâng leh i fapa, i neih chhun tak pawh i ui loh avângin mal ka sâwm ngei ngei ang chia,

¹⁷vâna arsi zât leh tuifinriat kama ṭiauvaivut zâtin i thlahte chu ka la tipung ngei ngei ang tih leh, i thlahte chuan an dote kulh kawngkhâr chu an la neihsak ang tih leh,

¹⁸ka thu i awih tâk avângin i thlahah chuan khawvêla chi tin an la thawveng ang tih, mahni leh mahni inchhâlin chhia ka chham ta, LALPAN a ti,” a zuk ti a.

¹⁹Chutichuan, Abrahama chu a chhiahhlawh tlangvâlte hnênah chuan a kîr leh a; tin, an tho va, Beer-seba-ah chuan an kal za ta hlawm a; tin, Abrahama chu Beer-seba-ah chuan a awm ta reng a.

²⁰Tin, heti hi a ni a, chûng thil hnuah chuan miin Abrahama hnênah chuan, “Ngai teh, Milkai pawh khân i nau Nahora chu fate a hrinsak ta asin,” tiin an hrilh a.

²¹A fa tîr chu Uza a ni a, a nau chu Buza a ni a, Kemuela, Arama pa nên,

²²Keseda te, Hazova te, Pildasa te, Jidlapha te, Bethuela te pawh an ni a.

²³Tin, Bethuela chuan fanu Rebeki a nei a; chûng pariatte chu Milkai chuan Abrahama nau Nahora chu a hrinsak a ni.

²⁴A hmei, a hming Reumai pawhin Teba te, Gahama te, Tahasa te, Maaka te a hring bawk a.