Read Mizo_Old_version Genesis 23 Bible Online

Genesis 23 - Mizo_Old_version bible

Genesis 23

¹Tin, Sari dam chhûng chu kum za leh kum sawmhnih leh kum sarih a ni a; chûng chu Sari dam chhûng kum chu a ni.

²Tin, Sari chu Kanaan rama Kiriath-arba khuaah chuan a thi a (chu chu Hebron khua a ni). Tin, Abrahama chu Sari sûn tûr leh ṭah tûrin a lo kal a.

³Tin, mitthi ruang hma ata chu a tho va, Hetha thlahte hnênah chuan,

⁴“In zîngah mikhual leh pêm mai ka ni a; ka mitthi ruang hi ka hmuh lohva ka phûm theihna tûrin in zîngah hian phûmna hmun ro mi pe rawh u,” tiin a sawi a.

⁵Tin, Hetha thlahte chuan Abrahama chu an chhâng a, a hnênah,

⁶“Ka pu, min ngaithla teh, nang chu kan zîngah hian lal ropui tak i ni a; kan thlânahte hian i duhna berah chuan i mitthi chu phûm ta che; i mitthi i phûmna tûrin kan zînga tu mahin kan thlân pêk che kan ui lo vang,” an ti a.

⁷Tichuan, Abrahama chu a tho va, chumi rama mi Hetha thlahte chu chibai a bûk a.

⁸Tin, “Ka mitthi chu ka hmuh lohva ka phûm rem in tih chuan mi ngaithla ula, Makpela pûk, a lo mawnga awm, a neih kha mi pe tûrin Zohara fapa Ephrona hnênah mi ngensak teh u. In zîngah phûmna hmun ro atâna a man tâwk ang zêlin mi pe rawh se,” tiin a bia a.

¹⁰Tin, Ephrona chu Hetha thlahte zîngah chuan a ṭhu ve reng a; tichuan, Hit mi Ephrona chuan Hetha thlahte hriatah, a khaw kulh kawngkaa lût apiangte hriat ngeiah chuan,

¹¹“Ni lo ve, ka pu, mi ngaithla teh; lo chu ka pe chia, a chhûnga pûk awm pawh chu ka pe bawk a che; ka chipuiho fate mit hmuhah hian ka pe a che; i mitthi chu phûm mai rawh,” tiin Abrahama chu a chhâng a.

¹²Tin, Abrahama chu chumi rama mite hmaah chuan a kûn a, chibai a bûk a.

¹³Tin, chumi rama mite hriatah chuan Ephrona hnênah, “Rem i tih phawt chuan khawngaih takin mi ngaithla teh; lo man chu ka pe zâwk ang che; ka hnên ata hi la la, chutah chuan ka mitthi chu ka phûm dawn nia,” tiin a sawi a.

¹⁴Tin, Ephrona chuan Abrahama chu a chhâng a, a hnênah,

¹⁵“Ka pu, mi ngaithla teh; lei hmun, tangka sekel zali hu mai te chu nang leh keia tân sawi tham em ni ang? I mitthi chu phûm mai rawh,” a ti a.

¹⁶Tichuan, Abrahama chuan Ephrona thu chu a zâwm ta a; tin, Abrahaman Hetha thlahte hriatah Ephronan tangka a sawi zât, tangka sekel zali, sumdâwnghovin an hman ṭhin chu a bûk a, Ephrona chu a pe ta a.

¹⁷Chutichuan, Ephrona lo, Mamre zâwna Makpela rama awm chu, a lo nên, a chhûnga pûk awm nên, lova thing awm zawng zawngte nên, a lo ri vêl zawng zawnga thing awmte nên chuan,

¹⁸Hetha thlahte mit hmuhah, a khaw kulh kawngkaa lût apiangte mit hmuhah chuan, ro atân Abrahama hnênah pêk nghehin a awm ta a.

¹⁹Chumi hnuah chuan Abrahaman a nupui Sari chu Kanaan rama Mamre zâwna (chu chu Hebron khua a ni a) Makpela lova pûkah chuan a phûm ta a.

²⁰Tichuan, lo leh a chhûnga pûk awm chu, phûmna hmun ro atân Abrahama chu Hetha thlahten an pe nghet ta a.