Read Mizo_Old_version Genesis 24 Bible Online

Genesis 24 - Mizo_Old_version bible

Genesis 24

¹Tin, Abrahama chu a lo upa a, a lo tar ta hle a; tin, LALPA chuan Abrahama chu thil engkimah mal a sâwm tawh a.

²Tin, Abrahama chuan a chhiahhlawh, a chhûngte zînga upa ber, a neih zawng zawng chunga thuneitu hnênah chuan, “Khawngaih takin i kut kha ka malpui hnuaiah rawlh rawh;

³tichuan, LALPA, vân Pathian leh lei Pathian chu chhâlin, ka awmna Kanaan-ho nula zînga mi hi ka fapa nupuia neihsak lo tûrin chhia ka chhamtîr dâwn che a ni;

⁴kan ram lamah, ka laichînte hnêna kalin ka fapa Isaaka hi nupui i neihsak zâwk tûr a ni,” a ti a.

⁵Tin, chhiahhlawh chuan a hnênah, “Hmeichhia chuan hemi ram lamah hian mi zui duh kher lo thei a; i fapa hi i lo chhuahna ram lamah chuan ka hruai kîr leh dâwn em ni ang?” a ti a.

⁶Tin, Abrahama chuan a hnênah, “Ka fapa hi chutah chuan hruai kîr leh lo tûrin fîmkhur rawh.

⁷LALPA, vân Pathian, ka pa in ata leh ka pianna ram ata mi hruai chhuaktu leh, mi betu leh, ‘He ram hi i thlahte ka la pe ang,’ tia ka hnêna chhechhamtu chuan, amah ngeiin a vântirhkoh chu i hmaah a kaltîr ang a, chuta ṭang chuan ka fapa hi nupui i rawn neihsak dâwn nia.

⁸Tin, hmeichhia chuan a zui duh loh che chuan, ka hnêna i chhechham kawngah hian i thiang mai ang; eng pawh ni rawh se, ka fapa hi chutah chuan i hruai kîr leh tûr a ni lo,” a ti a.

⁹Tichuan, chhiahhlawh chuan a kut chu a pu Abrahama malpui hnuaiah chuan a rawlh a, chumi thu-ah chuan a hnênah chhia a chham ta a.

¹⁰Tin, chhiahhlawh chuan a pu sanghâwngsei zînga mi sanghâwngsei sâwm a hruai a, a pu thil ṭha tinrêng kengin a chhuak ta a; tichuan, a tho va, Mesopotamia rama Nahora te khuaah chuan a kal a.

¹¹Tin, tlai lama hmeichheho tui chawi tûra an chhuah hun lai tak chuan, dai kianga tuichhunchhuah kiangah chuan a sanghâwngseite chu a ṭhingṭhittîr a.

¹²Tin, “Aw LALPA, ka pu Abrahama Pathian, khawngaih takin vawiinah hian mi hlawhtlintîr la, ka pu Abrahama chungah chuan khawngaihna lantîr ang che.

¹³En teh, tuikhur kiangah ka ding a, khuaa mite fanuho pawh tui chawi tûra an lo kal hi;

¹⁴tichuan, heti hian ni rawh se, nula tu hnênah pawh, ‘Khawngaih takin ka in tûrin i tui bêl kha han tihniam teh khai,’ ka tiha, ‘In rawh, i sanghâwngseite pawh hi in tûr ka pe ang e,’ titu apiang, chu mi ngei chu i chhiahhlawh Isaaka tâna i mi ruat chu ni rawh se; tin, chumiah chuan ka pu chungah khawngaihna i lantîr tih ka hre dâwn nia,” a ti a.

¹⁵Tin, heti hi a ni a, a sawi zawh hma chuan, ngai teh, Abrahama nau Nahora nupui Milkai fapa Bethuela fanu Rebeki chu, a kokia tui bêl puin a lo chhuak a.

¹⁶Chu nula chu a hmêl a ṭha êm êm a, nula thianghlim a ni a; mipa rêng rêngin an la pâwl ngai hauh lo. Tin, tuikhurah chuan a chhuk a, a tui bêl chu a tikhat a, a chho leh a.

¹⁷Tin, chhiahhlawh chu a tâwk tûrin a tlân a, “Khawngaih takin i tui bêla tui kha tlêm tê mi intîr teh khai,” a ti a.

¹⁸Tin, ani chuan, “In ta che, ka pu,” a ti a; tin, rang takin a tui bêl chu a kutah a chawi thla a, a intîr ta a.

¹⁹Tin, a intîr hnuin, “I sanghâwngseite tân pawh an in kham hma loh chuan ka chawi zêl ang e,” a ti a.

²⁰Tin, rang takin a tui bêl chu a ran thlêngah chuan a ruak a, tui chawi tûrin tuichhunchhuah lamah chuan a tlân leh a, a sanghâwngseite zawng zawng tân chuan a chawi ta zêl a.

²¹Tin, chhiahhlawh chuan ani chu a en reng a; LALPAN a va zinna chu a hlawhtlintîr leh tîr loh hriat nân a ngawi reng mai a.

²²Tin, heti hi a ni a, sanghâwngseite chuan an in kham veleh, chhiahhlawh chuan rangkachak hnârvuah duli bûk leh a kut atân banbun pahnih rangkachak tangka sâwm bûk a phawrh a;

²³tin, a hnênah, “Tu fanu nge i nih? Khawngaih takin mi hrilh teh. I pa inah kan riahna tûr hmun a awm ang em?” a ti a.

²⁴Tin, ani chuan a hnênah, “Bethuela, Milkai fapa, Nahora tân a hrinsaka fanu ka ni,” a ti a.

²⁵Tin, amah vêkin a hnênah, “Buhpâwl leh ran chaw kan ngah ve ve a, riahna hmun pawh kan nei,” a ti bawk a.

²⁶Tichuan, chhiahhlawh chuan a lu a kûn a, LALPA chu chibai a bûk a,

²⁷“Ka pu chunga a khawngaihna leh a rinawmna bâng chuang lo LALPA, ka pu Abrahama Pathian chu fakin awm rawh se; kei pawh hi LALPA chuan ka pu unaute in lamah mi hruai a lo nih hi,” a ti a.

²⁸Tin, nula chu a tlân a, chûng thu chu a nu chhûngte a va hrilh a.

²⁹Rebeki chuan nuṭa a nei a, a hming chu Labana a ni a; tichuan, Labana chu a chhuak a, tuikhur lamah mi hnênah chuan a tlân ta a.

³⁰Heti hi a ni a, hnârvuah leh a farnu kuta banbunte chu a hmu a, “Mi chuan chutin khatin mi ti a,” tia a farnu Rebeki thusawite chu a hriat veleh chuan, mi hnênah chuan a kal ta a; tin, ngai teh, ani chu tuikhura sanghâwngseite kiangah chuan a lo ding reng a.

³¹Tin, Labana chuan, “Nang LALPA malsâwm dawngtu, lo kal la, ka inah lût rawh. Engah nge pâwna i din reng? In leh sanghâwngseite tân hmun ka buatsaih tawh asin,” a ti a.

³²Tin, mi chu inah chuan a lût a; tin, Labana chuan sanghâwngsei thuamhnaw chu a phelh a; tin, sanghâwngseite tân buhpâwl leh ran chaw a pe a, a ke leh a ṭhiante ke sil nân tui a pe bawk a.

³³Tin, Abrahama chhiahhlawh hmaah chuan ei tûr an hlui a; nimahsela, ani chuan, “Ka rawn kal chhan thu ka sawi hma loh chuan ka ei lo vang,” a ti a. Tin, ani chuan, “Sawi ta che,” a ti a.

³⁴Tin, ani chuan, “Abrahama chhiahhlawh ka ni.

³⁵Tin, LALPA chuan ka pu chu nasa takin mal a sâwm a, mi lian tak a lo ni ta a; LALPA chuan a hnênah berâm rual te, bâwng rual te, tangkarua te, rangkachak te, bawihpa te, bawihnu te, sanghâwngsei te, sabengtung te a pe bawk a.

³⁶Ka pu nupui Sarin a tar hnuin ka pu tân fapa a hring a; ama hnênah chuan a neih zawng zawng a pe vek a.

³⁷Tin, ka pu chuan, ‘Ka awmna rama Kanaan-ho nula zînga mi hi ka fapa nupuiah i neihsak tûr a ni lo;

³⁸ka pa in lamah, ka laichînte hnêna kalin ka fapa tân nupui i neihsak zâwk tûr a ni,’ tiin chhia mi chhamtîr a.

³⁹Tin, keiin ka pu hnênah chuan, ‘Hmeichhia chuan mi zui duh kher lo thei a,’ ka ti a.

⁴⁰Tin, ani chuan ka hnênah, ‘LALPA, a hmaa ka awm ṭhinna chuan a vântirhkoh chu i hnênah a tîr ang a, i kalna tûrah chuan a hlawhtlintîr ang che; tichuan, ka fapa tân ka laichînte leh ka pa chhûngte zînga mi nupuiah i neihsak dâwn nia;

⁴¹ka laichînte hnên ngei i thlen hunah chuan ka hnêna i chhechham lakah hian i thiang ang; nula chu an pêk loh che chuan ka hnêna i chhechham lakah hian i thiang ang,’ a ti a.

⁴²“Tichuan, vawiinah hian tuikhur chu ka lo thleng a, ‘Aw LALPA, ka pu Abrahama Pathian, rem i tih chuan ka kalnaah hian mi hlawhtlintîr ang che.

⁴³En teh, tuikhur kiangah ka din hi; tin, heti hi ni rawh se, nula tui chawi tûra lo chhuak tu hnênah pawh, “Khawngaih takin in atân i tui bêla tui kha tlêm tê mi pe teh,” ka tiha,

⁴⁴anin ka hnênah, “In rawh, i sanghâwngseite tân pawh hian ka chawi ang e,” titu apiang, chu mi ngei chu ka pu fapa tâna LALPA hmeichhe ruat chu ni rawh se,’ ka ti a.

⁴⁵Tin, ka rilrua ka sawi zawh hma chuan ngai teh, Rebeki hi a tui bêl puin a lo chhuak a; tin, tuikhurah chuan a chhuk a, tui a zuk chawi a; tin, a hnênah, ‘Khawngaih takin tui mi intîr teh khai,’ ka ti a.

⁴⁶Tin, ani hian rang takin a koki ata chu a tui bêl a chawi thla a, ‘In rawh, i sanghâwngseite pawh hi in tûr ka pe ang e,’ a ti a; chutichuan, ka in a, sanghâwngseite pawh a intîr bawk a.

⁴⁷Tin, keiin, ‘Tu fanu nge i nih?’ tiin ka zâwt a. Tin, ani hian, ‘Bethuela, Nahora fapa, Milkain a hrinsaka fanu,’ a ti a; tin, hnârvuah chu a hnârah ka vuah a, bânbunte chu a bânah ka buntîr bawk a.

⁴⁸Tin, ka lu ka kûn a, LALPA chu chibai ka bûk a, LALPA, ka pu Abrahama Pathian, ka pu nauva fanu hi a fapa tân nupuia neihsak tûra kawng dik taka mi hruaitu chu ka fak ta a.

⁴⁹Tichuan, tûnah ka pu chu in khawngaiha, a chunga rinawm taka in tih dâwn chuan mi hrilh rawh u; chutichuan, ding lam emaw, vei lam emaw ka hawi thei ang,” a ti a.

⁵⁰Tin, Labana leh Bethuela chuan an chhâng a, “He thil hi LALPA hnên aṭanga chhuak a nih hi; a chhia a ṭha pawh i hnênah kan sawi thei lo ve.

⁵¹En teh, Rebeki chu i hmaa hi a awm alâwm; hruai la, kal ta che, LALPAN a sawi tawh angin i pu fapaa nupuiah awm rawh se,” an ti a.

⁵²Tin, heti hi a ni a, Abrahama chhiahhlawh chuan an thu chu a hriat velah lei siin LALPA chibai a bûk ta a.

⁵³Tin, Abrahama chhiahhlawh chuan tangkaraw incheinate leh rangkachak incheinate leh silhfênte a la chhuak a, Rebeki chu a pe a; a nuṭa leh a nu pawh chu thil hlu takte a pe bawk a.

⁵⁴Tin, amah leh a ṭhiante chuan an eiin an in a, an riak ta a; tin, zîngah an tho va, “Ka pu hnênah mi kaltîr tawh rawh u,” a ti a.

⁵⁵Tin, a nuṭa leh a nu chuan “Chêmtei hi ni rei lo tê, ni sâwm lek tal kan hnênah awm rih rawh se; chumi hnuah chuan a kal dâwn nia,” an ti a.

⁵⁶Tin, ani chuan an hnênah, “Mi tikhawtlai suh u khai, LALPA chuan ka kalnaah hian mi hlawhtlintîr ta si a; ka pu hnêna ka hâwn theihna tûrin mi kaltîr zâwk teh u khai,” a ti a.

⁵⁷Tin, anni chuan, “Chêmtei chu kan ko vang a, ama kâ ngei kan bia ang,” an ti a.

⁵⁸Tichuan, Rebeki chu an ko va, a hnênah, “He mi hnênah hian i kal duh ang em?” an ti a. Tin, ani chuan, “Duh ang chu,” a ti a.

⁵⁹Tichuan, an farnu Rebeki leh a awmtu leh Abrahama chhiahhlawh leh a hote chu an kaltîr a.

⁶⁰Tin, Rebeki chu mal an sâwm a, a hnênah, “Kan farnu, nang chu sîng hlîra sâng tam tak nu lo ni la, i thlahte chuan anmahni hawtute kulh kawngkhâr chu neihsak rawh se,” an ti a.

⁶¹Tichuan, Rebeki chu a tho va, a bawihnute nên, sanghâwngsei chungahte chuan an chuang a, mi chu an zui ta a; tichuan, Abrahama chhiahhlawh chuan Rebeki chu a hruai a, a kal ta a.

⁶²Tin, Isaaka chu Beer-lahai-roi lam aṭang chuan a lo kal a, Chhim rama awm a ni si a.

⁶³Tin, Isaaka chu tlai lamah phûlah inngaihtuah tûrin a va lêng chhuak a; tin, a han dâk a, a en a; tin, ngai teh, sanghâwngseite an lo kal a.

⁶⁴Tin, Rebeki chu a han dâk a, Isaaka a hmuh veleh chuan sanghâwngsei ata a chhuk ta a.

⁶⁵Tin, Abrahama chhiahhlawh hnênah chuan, “Phûla min hmuak tûra lo kal saw tu nge ni?” a ti a. Tin, chhiahhlawh chuan, “Ka pu a nih saw,” a ti a; tichuan, a inkhuhna puan a la a, a inkhuh ta a.

⁶⁶Tin, chhiahhlawh chuan a thiltih zawng zawng chu Isaaka a hrilh a.

⁶⁷Tin, Isaaka chuan Rebeki chu a nu Sari puan inah chuan a hruai lût a; tin, Rebeki chu a nei a, a nupui a lo ni ta a; tin, amah chu a hmangaih hle a; tichuan, Isaaka chu a nu thih hnuah pawh chuan a lo thlamuang thei ta a.