Read Mizo_Old_version Genesis 25 Bible Online

Genesis 25 - Mizo_Old_version bible

Genesis 25

¹Tin, Abrahama chuan nupui dang a nei a, a hming chu Keturi a ni a.

²Tin, ani chuan Zimrana te, Joksana te, Medana te, Midiana te, Isbaka te, Suaha te a hrinsak a.

³Tin, Joksana chuan fapa Seba leh Dedana a nei a. Tin, Dedana fapate chu Assurima te, Letusima te, Leummima te an ni a.

⁴Tin, Midiana fapate chu Epha te, Ephera te, Hanoka te, Abida te, Elda te an ni. Chûng zawng zawng chu Keturi fate an ni a.

⁵Tin, Abrahama chuan a neih zawng zawng chu Isaaka a pe a.

⁶A hmeiho fapate erawh chu Abrahama chuan lâwmmante a pe a; tin, amah a la dam lai ngei chuan a fapa Isaaka hnên ata chu khawchhak lamah, khawchhak ramah chuan a kal botîr ta hlawm a.

⁷Tin, Abrahama dam chhûng chu kum za leh kum sawmsarih leh kum nga a ni a.

⁸Tin, Abrahama chuan a thlarau a thlah a, lua kêlsam ṭo vek, putar tak, tar kûna damin a thi a, a chipuite hnênah chuan hruaiin a awm ve ta a.

⁹Tin, a fapa Isaaka leh Ismaela chuan Hit mi Zohara fapa Ephrona lova Mamre zâwna Makpela pûkah chuan an phûm ta a;

¹⁰chu lo chu Abrahaman Hetha thlahte laka a lei a ni; chutah chuan Abrahama chu an phûm a, a nupui Sari nên khân.

¹¹Tin, heti hi a ni a, Abrahama thih hnuah chuan Pathianin a fapa Isaaka chu mal a sâwm a; tin, Isaaka chu Beer-lahai-roi kiangah chuan a awm a.

¹²Tin, hêng hi Abrahama fapa Ismaela, Sari bawihnu, Aigupta mi, Hagarin Abrahama a hrinsaka thlahte chu an ni.

¹³Hêng hi an hming ṭheuh leh an thlahte ang zêlin Ismaela fapate hming chu a ni: Ismaela fa upa ber chu Nebaiotha a ni a; a naute chu Kedara leh Adbeela leh Mibsama leh,

¹⁴Misma leh Duma leh Masa an ni a;

¹⁵Hadada leh Tema, Jetura, Naphisa leh Kedema an ni bawk a.

¹⁶Chûng chu Ismaela fapate an ni a; chûng chu an khua ang zêl leh an riahbûk ang zêlin an hming ziak a ni a; an chi ang zêl chuan lal sâwm leh pahnih an ni a.

¹⁷Tin, Ismaela dam chhûng kum chu hei hi a ni, kum za leh kum sawmthum leh kum sarih hi. Tin, a thlarau a thlah a, a thi a, a chipuite hnênah chuan hruaiin a awm ve ta a.

¹⁸Tin, a fapate chu Havila ram aṭangin Assuria ram pan zâwngin Aigupta ram zâwn, Sur thlengin an awm a; an unau zawng zawng depah chuan an awm a.

¹⁹Tin, hêng hi Abrahama fapa Isaaka thlahte chu an ni: Abrahama chuan fapa Isaaka a nei a;

²⁰Isaakan Paddan-aram rama Suria mi Bethuela fanu, Suria mi, Labana farnu Rebeki chu a nupuia a neih lai chuan kum sawmli mi a ni a.

²¹Tin, a nupui chu a chin avângin Isaaka chuan LALPA hnênah a ngensak chiam a; tin, LALPAN a dîlna chu a ngaihthlâksak a; tichuan, a nupui Rebeki chu a rai ta a.

²²Tin, a nau paite chu a kawchhûngah chuan an insual a; tin, ani chuan, “Hetiang a nih si chuan eng vângin nge ka dam reng le?” a ti a. Tichuan, LALPA zâwt tûrin a kal ta a.

²³Tin, LALPA chuan a hnênah, “I chhûlah chuan chi hnih an awm a, I pum chhûng aṭang ngei chuan hnam hnih an inṭhen ang; Hnam pakhat chu hnam pakhat ai chuan a chak zâwk ang a; Tin, a upa zâwk chuan a naupang zâwk rawng chu a bâwl ang,” a ti a.

²⁴Tin, a nau hrin a hun chuan ngai teh, a chhûlah chuan phîr an lo awm a.

²⁵Tin, a hmasa zâwk chu a sena sen tur, puan hmul anga hmul thupin a lo chhuak a; tichuan, a hmingah chuan Esauva an sa a.

²⁶Chumi zawhah chuan a nau chu a lo chhuak leh a, a kutin Esauva keartui chu a chelh reng a; tichuan, ani hmingah chuan Jakoba an sa a; tin, Rebekin anmahni chu a hrin lai chuan, Isaaka chu kum sawmruk mi a ni a.

²⁷Tin, naupangte chu an lo ṭhang lian a; tin, Esauva chu sa pêl thiam tak, mi ramvachal a ni a; Jakoba erawh chu mi ni chuah, puan in lamtea awm mi a ni.

²⁸Tin, Isaaka chuan a sakhi sa a ei ṭhin avângin Esauva chu a ngaina a; Rebeki erawh chuan Jakoba chu a ngaina zâwk a.

²⁹Tin, Jakoba chuan englo a chhûm kawi a; tin, Esauva chu ram lam aṭangin a lo hâwng a, a chau hle a;

³⁰tin, Esauvan Jakoba hnênah chuan, “Khawngaih takin i englo sen chhum kawi ngei kha mi eitîr teh khai; ka chau êm mai,” a ti a. Chu vâng chuan a ni, a hming chu Edoma an tih ni.

³¹Tin, Jakoba chuan, “I fa tîr nihna mi leitîr zet la le,” a ti a.

³²Tin, Esauva chuan, “Ngai teh, ka thi lek lek a ni si a; fa tîr nihna mai hi ka tân eng nge sâwt ang?” a ti a.

³³Tin, Jakoba chuan, “Ka hnênah chhia chham zet rawh le,” a ti a; tin, a hnênah chhia a chham a; tichuan, a fa tîr nihna chu Jakoba hnênah a hralh ta mai a.

³⁴Tin, Jakoba chuan Esauva chu chhang leh dailuah chhum kawi a pe a; tichuan, a eiin a in a, a tho va, a kal ta a; chutiang chuan Esauva chuan a fa tîr nihna chu a ngainêp a ni.