Read Mizo_Old_version Genesis 26 Bible Online

Genesis 26 - Mizo_Old_version bible

Genesis 26

¹Tin, chumi ramah chuan Abrahama dam laia ṭâm lo tla hmasa zâwk tih loh kha, ṭâm a lo tla leh a. Tichuan, Isaaka chu Philistin-ho lal Abimeleka hnênah Gerar khuaah a zuk kal a.

²Tin, LALPA chu a hnênah a rawn inlâr a, “Aigupta ramah chuan zuk kal suh; ram ka hrilh tûrah che chuan awm rawh;

³he ramah hian awm rih la; tichuan, i hnênah ka awm ang a, mal ka sâwm dâwn che nia; hêng ram zawng zawng hi nangmah leh i thlahte pein, i pa Abrahama hnêna chhia ka chham kha ka tinghet dâwn a ni;

⁴tin, vâna arsi zâtin i thlahte chu ka la tipung ang a, hêng ram zawng zawng hi i thlahte ka la pe bawk ang; tin, i thlahah chuan khawvêla chi tin an la thawveng ang.

⁵Abrahama chuan ka thu a awih a, ka thuhrilhte, ka thupêkte, ka thuruatte, ka dânte pawh a zawm avâng khân,” a ti a.

⁶Tichuan, Isaaka chuan Gerar khuaah chuan awmhmun a khuar ta a;

⁷tin, chumi khuaa mite chuan a nupui chanchin an zâwt a; tin, ani chuan, “Ka farnu a ni,” a ti a; a hmêl a ṭhat avângin, “He khuaa mite hian Rebeki vângin mi that dah ang e,” tiin, “Ka nupui a ni,” a ti ngam lo a ni.

⁸Tin, heti hi a ni a, chutah chuan rei tak a awm hnuin, Philistin-ho lal Abimeleka chuan tukverh aṭangin a han thlîr a; tin, ngai teh, Isaakan a nupui Rebeki a chhaih lai a han hmu a.

⁹Tichuan, Abimelekan Isaaka chu a ko va, “Ngai teh, i nupui a nih ngei hi le; engati nge, ‘Ka farnu a ni,’ i tih mai le?” a ti a. Tin, Isaaka chuan a hnênah, “ ‘Amah vângin ka thi dah ang e,’ ka tih vâng a ni,” a ti a.

¹⁰Tin, Abimeleka chuan, “Kan chunga i thiltih hi engtizia nge ni le? Mite zînga mi tu pawh hian i nupui hi an lo mutpui mai thei asin; tichuan, kan chungah hian thiam lohna i rawn thlentîr a ni dâwn asin,” a ti a.

¹¹Tin, Abimeleka vêk chuan, “Tu pawh he mi hi emaw, a nupui hi emaw khawih apiang chu tihhlum ngei ngei tûr a ni,” tiin mi zawng zawng chu thu a pe a.

¹²Tin, Isaaka chuan chumi ramah chuan buh a chîng ve a, chumi kum chuan a leh za a hmu a; LALPAN mal a sâwm bawk a.

¹³Tichuan, ani chu a lo ropui ta hle a, nasa taka mi ropui lo ni khawpin a lo lian ta tulh tulh a;

¹⁴berâm rualte leh bâwng rualte a nei a, chhiahhlawh tam tak a nei bawk a; tichuan, Philistin-ho chuan an îtsîk ta a.

¹⁵Tin, a pa Abrahama dam laia a pa chhiahhlawhten tuichhunchhuah an laih zawng zawng chu Philistin-hoten an hnawh a, leiin an lo tikhat vek mai a.

¹⁶Tin, Abimeleka chuan Isaaka hnênah, “Kan hnên ata kal bo daih rawh, kan aiin i chak zâwk si a,” a ti a.

¹⁷Tichuan, Isaaka chu chuta ta chu a chhuak a, Gerar ruamah chuan a puan in a zâr a, chutah chuan awmhmun a khuar ta a.

¹⁸Tin, Isaaka chuan a pa Abrahama dam laia an tuichhunchhuah laihte chu a lai leh a; Abrahama thih hnu khân Philistin-ho chuan an lo hnawh khat vek tawh si a; tin, a pain a hming a lo vuah ang zêl khân a hming a vuah hlawm a.

¹⁹Tin, Isaaka chhiahhlawhten ruamah chuan an lai a, chutah chuan tuichhunchhuah hna nei an hmu ta hlauh va.

²⁰Tichuan, Gerar khuaa ranpute chu, “Tui hi kan ta a ni,” tiin Isaaka ranpute nên chuan an inhnial a; tichuan, amah nên an inhnial avângin tuichhunchhuah hmingah chuan “Esek” a vuah ta a.

²¹Tin, tuichhunchhuah dang an lai leh a, chumi pawh chu chuh tumin an inhnial leh a; tichuan, a hmingah chuan “Sitna” a vuah leh a.

²²Tin, chuta ta chu a insawn a, tuichhunchhuah dang a lai leh a; chu chu chuh tumin an inhnial ta lo va; tichuan, “Tûnah zawng LALPAN hmun zau tak mi siamsak ta a, he ramah hian chi tam tak kan thlah tawh ang,” tiin, a hmingah chuan “Rehoboth” a vuah ta a.

²³Tin, chuta ṭang chuan Beer-seba-ah a han chho va.

²⁴Chumi zân ngei chuan LALPA chu a hnênah a rawn inlâr a, “Kei hi i pa Abrahama Pathian chu ka ni; hlau suh, i hnênah ka awm alâwm, mal ka sâwm ang chia, ka chhiahhlawh Abrahama avângin i thlahte chu ka la tipung dâwn asin,” a ti a.

²⁵Tichuan, chutah chuan maichâm a siam a, LALPA hming chu a lam a, chutah chuan a puan in a zâr bawk a; tin, Isaaka chhiahhlawhte chuan chutah chuan tuichhunchhuah an lai leh a.

²⁶Tin, Gerar khua aṭangin Abimeleka chu a ṭhian Ahuzzatha nên, a sipai pâwl hotu Phikola nên a hnênah an kal a,

²⁷Tin, Isaaka chuan an hnênah, “Mi hua a, in hnên ata mi kal botîr si a, eng vângin nge ka hnêna in lo kal le?” a ti a.

²⁸Tin, anni chuan, “LALPA chu i hnênah a awm tih chiang takin kan hria a; tichuan, ‘I pawi kan khawih ngai loh ang leh, thil ṭha chauh lo chu i chungah eng mah rêng rêng kan tih lohva, tlang taka kan kal botîr ta che ang khân, keini pawh kan chhiatna tûr rêng rêng i tih lohna tûrin kan kârah, keini leh nangma kâr ngeiah hian, chhechhamna lo awm tawh sela, i hnênah thu min thluntîr rawh,’ kan ti; tûnah chuan nang zawng LALPA malsâwm dawngtu i nih tawh hi,” an ti a.

³⁰Tin, ani chuan an tân ruai a ṭheh a; tichuan, an eiin an in ta a.

³¹Tin, zîng lamah chuan zîng takah an tho va, chhia an chham tawn a; tin, Isaakan anni chu a kaltîr a; tichuan, a hnên aṭang chuan tlang takin an chhuak ta a.

³²Tin, heti hi a ni a, chumi ni vêk chuan Isaaka chhiahhlawhte chu an lo kal a, an tuichhunchhuah laih chanchin an rawn hrilh a, a hnênah, “Tui kan hmu ta,” an ti a.

³³Tichuan, chu tuichhunchhuah chu “Siba” a vuah a; chuvângin, chumi khaw hming chu tûn thlengin “Beer-seba” a la ni a.

³⁴Tin, Esauva chuan kum sawmli mi a nihin, Hit mi Beeria fanu Judithi leh, Hit mi Elona fanu Basemathi nupuiah a nei a;

³⁵chûngte chu Isaaka leh Rebeki thinlung tiretheitute an ni a.