Read Mizo_Old_version Genesis 27 Bible Online

Genesis 27 - Mizo_Old_version bible

Genesis 27

¹Tin, heti hi a ni a, Isaaka chu a lo tar a, khaw hmu thei lo khawpa a mit a lo thim hnu chuan a fapa upa zâwk Esauva chu a ko va, a hnênah, “Ka fapa,” a ti a; tin, ani chuan a hnênah, “Heta hi ka awm,” a ti a.

²Tin, ani chuan, “Ngai teh, ka tar tawh êm a, ka thih ni tûr ka hre si lo va.

³Chutichuan, tûnah hian khawngaih takin i hriamhrei, i thal bâwm leh i thal ngul kha keng la, va ramchhuak la, sakhi mi va kahsak rawh;

⁴tin, ka thih hmaa mal ka sâwmsakna tûr chein, ka duh zâwng takin chawhmeh tui takah mi siamsak la, ka ei tûrin ka hnênah rawn la rawh,” a ti a.

⁵Tin, Isaakan a fapa Esauva a biak lai chu Rebeki chuan a lo hria a. Tin, Esauva chu sakhi kâpa rawn hâwn tûrin ramah chuan a kal ta a.

⁶Tin, Rebeki chuan a fapa Jakoba hnênah, “Ngai teh, i pa chuan i u Esauva hnênah,

⁷‘Sakhi mi rawn lâk la, ka eia, ka thih hmain LALPA hmaah mal ka sâwmsakna tûr chein, chawhmeh tui takah mi siam rawh,’ tia a sawi ka hria.

⁸Chutichuan, ka fapa, tûnah hian thu ka pêk che ang zêlin ka thu zâwm ang che.

⁹Ran rual zîngah va kal la, chuta ta chu kêlno pahnih ṭha tak mi va lâk rawh; tichuan, chumi chu a duh zâwng takin i pa tân chawhmeh tui takah ka lo siam ang e;

¹⁰tin, a thih hmaa mal a sâwmsakna tûr chein, a ei tûrin i pa hnênah i va kalpui tûr a ni,” tiin a sawi a.

¹¹Tin, Jakoba chuan a nu Rebeki hnênah, “Ngai teh, ka u Esauva chu mi hmul tak a ni a, kei zawng mi mâm tak ka ni si a.

¹²Ka pa chuan mi lo dap vêl mai thei a; tichuan, ama ngaihin bumtu ang ka lo ni ang a, malsâwm ahnêkin ânchhia indawntîr mai ka ni ang asin,” a ti a.

¹³Tin, a nu chuan a hnênah, “Ka fapa, i ânchhe dawn tûr chu ka chungah awm rawh se; ka thu zâwm la, mi va lâk mai rawh,” a ti a.

¹⁴Tin, a kal a, a va la a, a nu hnênah a rawn kalpui a; tichuan, a nu chuan a pa duh zâwng takin chawhmeh tui takah a siam a.

¹⁵Tin, Rebeki chuan a fapa upa zâwk Esauva silhfên ṭha tak, ina a hnêna awm chu a la a, a fapa naupang zâwk Jakoba chu a thuam a;

¹⁶tin, kêlno vunte pawh chu a kutah leh a nghâwng mâm laiah chuan a bel bawk a;

¹⁷tin, chawhmeh tui tak leh chhang a siamte chu a fapa Jakoba kutah a pe a.

¹⁸Tin, ani chu a pa hnênah a kal a, “Ka pa,” a ti a; tin, ani chuan, “Heta hi ka awm; ka fapa, tu zâwk nge i nih?” a ti a.

¹⁹Tin, Jakoba chuan a pa hnênah, “I fapa upa zâwk Esauva ka ni; mi tirh ang khân ka ti zo ta a, khawngaih takin tho la, mal mi sâwmsakna tûrin ṭhu la, ka sakhi sa hi ei rawh le,” a ti a.

²⁰Tin, Isaaka chuan a fapa hnênah, “Ka fapa, engtizia nge i va rawn hmu hma teh thut ve le?” a ti a. Tin, ani chuan, “LALPA i Pathian chuan mi hlawhtlintîr vâng a ni,” a ti a.

²¹Tin, Isaaka chuan Jakoba hnênah, “Ka fapa, khawngaih takin lo hnai teh khai, ka lo dap vêl teh ang che, ka fapa Esauva i ni meuh na emaw,” a ti a.

²²Tin, Jakoba chuan a pa Isaaka chu a va hnaih a; tin, ani chuan a lo dap vêl a, “A aw chu Jakoba aw a ni si a, a kutte erawh chu Esauva kut a ni si,” a ti a.

²³Tichuan, a u Esauva kut anga a kut a hmul avângin amah chu a hre lo va; chutichuan, mal a sâwm ta a.

²⁴Tin, “Ka fapa Esauva ngei i ni maw?” a ti a. Tin, ani chuan, “Ni e,” a ti a.

²⁵Tin, ani chuan, “Mi han lâk hnaih rawh; tichuan, mal ka sâwmsakna tûr chein ka fapa sakhi sa chu ka lo ei ang e,” a ti a. Tin, a rawn la hnai a, a ei ta a; uain pawh a lâksak a, a in bawk a.

²⁶Tin, a pa Isaaka chuan a hnênah, “Ka fapa, lo hnai la, mi fâwp rawh,” a ti a.

²⁷Tin, a va hnaih a, a fâwp a; tin, ani chuan a silhfên rim chu a hria a, mal a sâwm a, “Ngai teh, ka fapa rim hi LALPA malsâwm ram rim ang a ni.

²⁸Tichuan, Pathianin vân daifîm leh Lei ṭhatna leh, Buh tam tak leh uain tam tak pe che rawh se.

²⁹Hnam hrang hrangten i rawng bâwl sela, Chi hrang hrangten chibai bûk che rawh se. I unaute chungah lalah awm langin, I nu faten chibai bûk che rawh se. Anchhe lawhtu apiang che chu ânchhe lawhin awm sela, Malsâwmtu apiang che chu malsâwmin awm rawh se,” a ti a.

³⁰Tin, heti hi a ni a, Isaakan Jakoba mal a sâwm zawh veleh Jakoba chu a pa Isaaka hnên ata a chhuak hman chauh va, a u Esauva chu a sa pêl a lo hâwng a.

³¹Tin, ani pawh chuan chawhmeh tui takah a siam a, a pa hnênah a rawn la ve a; tin, a pa hnênah chuan, “Ka pa, tho la, mal mi sâwmsakna tûrin i fapaa sakhi sa hi ei rawh le,” a ti a.

³²Tin, a pa Isaaka chuan a hnênah, “Tu nge i nih?” a ti a. Tin, ani chuan, “I fapa, i fapa upa zâwk, Esauva ka ni,” a ti a.

³³Tichuan, Isaaka chu nasa takin a khûr chiam a, “Sakhi kâpa ka hnêna a sa rawn laa, i lo thlen hmaa ka ei zawh veka, mal ka sâwm tâka kha tu nge ni le? A ni, amah chu malsâwmin a awm tawh tho tho vang,” a ti a.

³⁴Esauva chuan a pa thusawi chu a hriatin nasa tak leh lungchhe takin a ṭap ta rawih a, a pa hnênah chuan, “Aw ka pa, kei hi, kei pawh hi mal mi sâwm ve lul rawh,” a ti a.

³⁵Tin, ani chuan, “I nau chuan mi rawn bum a, i malsâwmna chu a lâksak ta che a ni,” a ti a.

³⁶Tin, ani chuan, “A hmingah Jakoba an vuah dik hle lo vem ni? Hei vawi hnih mi lan tâk hi; ka fa tîr nihna chu mi lâksak a; tin, ngai teh, tûnah hian ka malsâwmna mi lâksak leh tâk hi,” a ti a. Tin, amah vêkin, “Malsâwmna mi la zuahsak lâwm ni?” a ti a.

³⁷Tin, Isaaka chuan a chhâng a, Esauva hnênah, “Ngai teh, amah chu i lalah ka siam a, a unau zawng zawngte pawh a chhiahhlawh atân ka pe vek a; buh leh uainin ka châwm ta bawk a; ka fapa, nanga tân eng nge ka tih ang le?” a ti a.

³⁸Tin, Esauva chuan a pa hnênah, “Ka pa, malsâwmna pakhat chauh em ni i neih? Aw ka pa, kei hi, kei pawh hi mal mi sâwm ve lul rawh,” a ti a. Tin, Esauva chu ring takin a ṭap ta a.

³⁹Tin, a pa Isaaka chuan a chhâng a, a hnênah, “Ngai teh, i awmna tûr chu lei ṭhatna hlatah leh, Chung lam ata vân daifîm hlatah a ni a awm dâwn ni;

⁴⁰I khandaihin a ni i nun dâwn ni, I nau rawng pawh i bâwl dâwn a ni; Tin, heti hi a ni ang a, i tâl chhuah hunah chuan A nghâwngkawl chu i nghâwng ata i thing thla tawh ang,” a ti a.

⁴¹Tin, a pain mal a sâwm avâng chuan Esauva chuan Jakoba chu a haw ta a; tin, Esauva chuan a rilruin, “Ka pa sûn ni tûr chu a hnai tawh a, chumi hunah chuan ka nau Jakoba chu ka that mai ang,” a ti a.

⁴²Tin, a fapa upa zâwk Esauva thusawi chu Rebeki an hrilh a; tichuan, mi a tîr a, a fapa naupang zâwk Jakoba chu a ko va, a hnênah, “Ngai teh, i u Esauva chuan i chungchâng thu-ah, nangmah tihhlum tumin a inhnêm a ni.

⁴³Chutichuan, ka fapa, tûnah ka thu hi awih rawh: tho la, Haran khuaa ka nuṭa Labana hnênah tlân bo rawh.

⁴⁴I u thinrimna hi a reh hma loh chuan a hnênah ni eng emaw zât va awm rih rawh;

⁴⁵i u thinurna hi i chunga a reha, a chunga i thiltih hi a theihnghilh hunah chuan mi ka tîr ang a, chuta ta chu ka rawn hruai chhuahtîr ang che; eng atân nge ni khatah in pahnihin ka chân ang che u?” a ti a.

⁴⁶Tin, Rebeki chuan Isaaka hnênah, “Hetha fanute avâng hian nun hi ka ning êm mai; Jakoba hian hemi ram nula, hêng ang Hetha fanuteho zînga mi hi nupuia a neih leh ve lek phei chuan, ka tân nun hi eng nge sâwt ang?” a ti a.