Read Mizo_Old_version Genesis 29 Bible Online

Genesis 29 - Mizo_Old_version bible

Genesis 29

¹Chumi hnuah chuan Jakoba chu a kal ta zêl a, khawchhak fate ram chu a thleng ta a.

²Tin, a han en a, ngai teh, phûlah hian tuichhunchhuah a lo awm a; a kiangah chuan berâm rual thum hi an bawk reng a; chumi tuichhunchhuah ata chu berâm rualte chu tui an intîr ṭhîn a ni. Tuichhunchhuah kawngkaa lung awm chu a lian hle a.

³Tin, chutah chuan berâm rual zawng zawng an kal khâwm ṭhîn a; tin, tuichhunchhuah kawngka ata lung chu an lum sawn a, berâmte chu tui an intîr a, lung chu tuichhunchhuah kawngkaa a awmna pângngaiah chuan an dah leh ṭhîn a.

⁴Tin, Jakoba chuan an hnênah, “Ka unaute u, khawi lama mi nge in nih?” a ti a. Tin, anni chuan, “Haran khuaa mi kan ni,” an ti a.

⁵Tin, ani chuan an hnênah, “Nahora fapa Labana in hria em?” a ti a. Tin, anni chuan, “Hria e,” an ti a.

⁶Tin, ani chuan an hnênah, “A dam lai em ni?” a ti a. Tin, anni chuan, “Dam lai rih e; en teh, a fanu Rakili pawh berâm hruaia a lo kal saw,” an ti a.

⁷Tichuan, ani chuan, “Ngai teh u, ni a la sâng hle a; ran hruai khâwm pawh a la hun hek lo. Berâmte hi tui intîr ula, va thlah rawh u khai,” a ti a.

⁸Tin, anni chuan, “Kan thei lo vang, berâm rual zawng zawng an kal khâwm a, tuichhunchhuah kawngka ata lung hi an lum sawn hma loh chuan; chumi hnuah chuan berâmte chu tui kan intîr ṭhîn a ni,” an ti a.

⁹Tin, anmahni a la biak lai chuan, Rakili chu a pa berâmte hruaiin a lo thleng ta a; ani chuan a vêng ṭhîn a ni.

¹⁰Tin, heti hi a ni a, Jakoba chuan a nu nuṭa Labana fanu Rakili leh, a nu nuṭa Labana berâm rual chu a hmuh chuan Jakoba chuan a va hnaih a, tuichhunchhuah kawngka ata lung chu a lum sawn a, a nu nuṭa berâmte chu tui a intîr ta a.

¹¹Tin, Jakoba chuan Rakili chu a fâwp a, ring takin a ṭap ta a.

¹²Tin, Jakoba chuan a pa tupa a nih leh Rebeki fapa a ni tih Rakili chu a hrilh a; tichuan, Rakili chu a tlân a, a pa a va hrilh ta a.

¹³Tin, heti hi a ni a, Labana chuan a farnua fapa Jakoba chanchin chu a hriat veleh a hmuak tûrin a tlân a, a pawm a, a fâwp a, a inah a hruai ta a. Tin, Jakoba chuan chûng thu zawng zawng chu Labana chu a hrilh a.

¹⁴Labana chuan a hnênah, “Ka ruh leh ka tisa ngei i nih chu le,” a ti a. Tin, a hnênah thla khat a awm ta a.

¹⁵Tin, Labana chuan Jakoba hnênah, “Ka tupa i nih avângin a thlâwnin ka rawng i bâwl tûr em ni? Eng nge i hlawh ang? Mi hrilh teh khai,” a ti a.

¹⁶Tin, Labana chuan fanu pahnih a nei a: a upa zâwk hming chu Leaii a ni a, a naupang zâwk hming chu Rakili a ni.

¹⁷Tin, Leaii mit chu a pâwl a; Rakili erawh chu mi tituai ṭha tak a ni a, a hmêl pawh a ṭha hle a.

¹⁸Tin, Jakoba chuan Rakili chu a hmangaih a; tichuan, “I fanu naupang zâwk Rakili nei tûrin kum sarih i rawng ka bâwlsak ang che,” a ti a.

¹⁹Tin, Labana chuan, “Ani chu mi dang ka pêk ai chuan ka pêk che a ṭha zâwk ang chu; ka hnênah awm reng mai rawh,” a ti a.

²⁰Tichuan, Jakoba chuan Rakili nei tûr chuan kum sarih chu rawng a bâwl ta a; nimahsela, a hmangaih hle avângin ni rei lo tê ang chauhvin a hria a.

²¹Tin, Jakoba chuan Labana hnênah. “Ka pâwl theihna tûrin ka nupui chu mi pe rawh le, ka hun a kim tawh si a,” a ti a.

²²Tichuan, Labana chuan chumi khuaa mi zawng zawng chu a khâwm vek a, ruai a ṭheh a.

²³Tin, heti hi a ni a, thimhlimah chuan a fanu Leaii chu a hruai a, Jakoba hnênah a hruai lût a; tin, ani chu a lo pâwl a.

²⁴Tin, Labana chuan a bawihnu Zilpaii chu a fanu Leaii hnênah a bawihnu atân a pe a.

²⁵Tin, heti hi a ni a, zîng a lo nih chuan, ngai teh, Leaii a lo ni si a; tichuan, Jakoba chuan Labana hnênah, “Ka chunga i thiltih hi engtizia nge ni le? Rakili nei tûrin i rawng ka bâwl lo vem ni? Eng vângin nge mi bum mai le?” a ti a.

²⁶Tin, Labana chuan, “Kan ramah hian chutianga fa u hmaa a naupang zâwk kaltîr chu dân a ni lo asin.

²⁷Hemia ni sarih hi tlingtla rih la; tichuan, kum sarih dang ka rawng i bâwl leh tûr aiah chuan mi dang pawh chu kan pe ang che,” a ti a.

²⁸Tichuan, Jakoba chuan chutiang chuan a ti a, a ni sarih chu a tlingtla a; tichuan, a fanu Rakili chu nupuiah a pe ta a.

²⁹Tin, Labana chuan a bawihnu Bilhaii chu a fanu Rakili hnênah a bawihnu atân a pe a.

³⁰Tin, Rakili chu a pâwl bawk a, Leaii ai chuan Rakili chu a hmangaih zâwk bawk a, Labana rawng chu kum sarih dang a bâwl leh ta a.

³¹Tin, LALPA chuan Leaii chu huatin a awm tih a hria a; tichuan, a chhûl a hawnsak a; Rakili erawh chu a ching a.

³²Tin, Leaii chu a rai a, fapa a hring a, a hmingah chuan Reubena a sa a; “LALPA chuan ka hrehawmzia a hmuh avâng a nih hi; tûnah zawng ka pasalin mi hmangaih tawh ang,” a ti a.

³³Tin, a rai leh a, fapa a hring leh a; “LALPA chuan huatin ka awm tih a hriat avângin hei pawh hi mi pe a nih hi,” a ti a; tichuan, a hmingah chuan Simeona a sa a.

³⁴Tin, a rai leh a, fapa a hring leh a; “Tûnah zet chuan fapa pathum ka hrinsak tâk avângin ka pasalin mi zâwm tawh ang,” a ti a; chuvângin, a hmingah chuan Levia an sa a.

³⁵Tin, a rai leh a, fapa a hring leh a; “Tûn ṭumah hi chuan LALPA ka fak ang,” a ti a; chuvângin, a hmingah chuan Juda a sa a; tin, fa a hring leh ta rih lo va.