Read Mizo_Old_version Genesis 3 Bible Online

Genesis 3 - Mizo_Old_version bible

Genesis 3

¹Tin, LALPA Pathianin ramsa a siam zawng zawngah chuan rûl a fing vervêk ber a. Tichuan, ani chuan hmeichhe hnênah chuan, “Pathianin, ‘Huana thing rah rêng rêng hi in ei tûr a ni lo,’ a ti elo maw?” a ti a.

²Tin, hmeichhia chuan rûl hnênah chuan, “Ti lo ve, huana thing rahte hi kan ei thei asin;

³huan lai taka thing awm rah erawh chu Pathianin, ‘In ei tûr a ni lo, tawh pawh in tawk tûr a ni lo; chuti lo chuan, in thi ang,’ a ti a ni,” a ti a.

⁴Tin, rûl chuan hmeichhe hnênah chuan, “Thi teh suh e;

⁵in ei ni apang chuan in mit a lo vâr ang a, a chhia leh a ṭha hriain Pathian ang in lo ni dâwn tih Pathianin a hre reng a nih chu,” a ti a.

⁶Tichuan, hmeichhia chuan thing rah chu ei mi a ni tih leh, mit la tak a ni tih leh, mi tifing tûrin thing rah îtawm tak a ni tih a hriat chuan, a rah ṭhenkhat chu a lo va, a ei ta a; tin, a pasal a pe ve a, ani pawhin a ei ve ta a.

⁷Tichuan, an pahnih chuan an mit a lo vâr a, saruak an nih an lo inhre ta a; tichuan, theipui hnah an ṭhui khâwm a, pawnfên an insiam chawp a.

⁸Tin, LALPA Pathian chu huana tlai ni nêma a lêng thâwm chu an lo hria a; tichuan, Adama leh a nupui chuan huana thing zîngah chuan LALPA Pathian chu an lo bihrûksan ta a.

⁹Tin, LALPA Pathian chuan Adama chu a ko va, a hnênah, “Khawiah nge i awm?” a ti a.

¹⁰Tin, ani chuan, “Huana i thâwm ka hria a, saruaka awm ka nih avângin ka hlau ta a; tichuan, ka biru ta a ni,” a ti a.

¹¹Tin, ani chuan, “Saruak i nih tuin nge hrilh che? Thing rah ei loh tûr ka tih tlat che kha i ei ta a ni maw?” a ti a.

¹²Tin, Adama chuan, “Mi awmpui tûra i hmeichhe mi pêk ngei khân thing rah chu mi pe a, ka ei ta a ni,” a ti a.

¹³Tin, LALPA Pathian chuan hmeichhe hnênah chuan, “I thiltih hi engtizia nge ni le?” a ti a. Tin, hmeichhia chuan, “Rûlin mi tihder a, ka ei ta a ni,” a ti a.

¹⁴Tin, LALPA Pathian chuan rûl hnênah chuan, “Hetiang hi i tih avângin ran zawng zawng leh ramsa tinrêng zingah chuan ânchhe dawngin i awm bîk ang a; bawkkhupin i kal tawh ang a, i dam chhûng zawngin vaivut i ei bawk tûr a ni.

¹⁵Tin, nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang; chu mi chuan i lu a la tithitling ang a, nangin a keartui i la tithitling ang,” a ti a.

¹⁶Hmeichhe hnênah chuan, “I hrehawmna leh i nau paina chu nasa takin ka tipung ang a; hrehawm takin fa i hring thîn ang a; nimahsela, i duh zâwng chu i pasal lam a ni ang a, ani chuan i chungah thu a nei fo vang,” a ti a.

¹⁷Tin, Adama hnênah chuan, “I nupui thu i zawma, thing pakhat, ‘A rah i ei tûr a ni lo,’ tia thu ka pêk che kha, a rah i ei avângin lei hi nangmah avângin ânchhe dawngin a awm ta a ni; i dam chhûng zawngin rim taka thawkin a rah chu i ei tawh ang.

¹⁸Hlîng leh buarte pawh a chhuaksak ang che; tin, leia thlai chu i ei tawh ang.

¹⁹Tin, leia i kîr leh hma loh chuan i hmaia thlantui luang zawih zawihin chaw i ei tawh ang, lei aṭanga lâk chhuah i ni si a; vaivut i ni a, vaivutah i kîr leh tûr a ni,” a ti a.

²⁰Tin, Adama chuan a nupui chu mi nung zawng zawng nu a nih avângin a hmingah Evi a vuah a.

²¹Tin, LALPA Pathian chuan Adama tân leh a nupui tân chuan savun kawrfualte a siamsak a, a haktîr ta a.

²²Tin, LALPA Pathian chuan, “Ngai teh u, mihring chu a chhia leh a ṭha hriain keimahni ang a lo ni ta; tûnah chuan a kuta banin, nunna thing rah chu lova eiin, kumkhuain a nung dah ang e,” a ti a;

²³chuvângin, LALPA Pathian chuan amah a lâk chhuahna lei chu let tûrin Eden huan ata chu a tîr chhuak ta a.

²⁴Chutichuan, mihring chu a hnawt chhuak ta a; tin, nunna thing kawng chu vêng tûrin, Eden huan chhak lampangah chuan cherub-te leh mei khandaih vir tawn zawk zawk chu a awmtîr ta bawk a.