Read Mizo_Old_version Genesis 30 Bible Online

Genesis 30 - Mizo_Old_version bible

Genesis 30

¹Tin, Rakili chuan Jakoba chu fa rêng rêng a hrinsak lo tih a inhriat chuan, a laizâwnnu chu a îtsîk ta a; tin, Jakoba hnênah chuan, “Fate mi pe rawh; chuti lo chuan, ka thi ang,” a ti a.

²Tin, Rakili chungah chuan Jakoba thin chu a lo ur ta thut a; tichuan, “I rîla rah phal lotu Pathian aiawhtu ka ni em ni?” a ti a.

³Tin, ani chuan, “En teh, ka bawihnu Bilhaii saw, amah saw pâwl rawh; chutichuan, kei pawhin ama lakah fate ka neih ve theih nân, ka mal chungah hian fa a hring dâwn nia,” a ti a.

⁴Tichuan, a bawihnu Bilhaii chu a nupui atân a pe a; tin, Jakoba chuan ani chu a lo pâwl a.

⁵Tin, Bilhaii chu a rai a, Jakoba chu fapa a hrinsak ta a.

⁶Tin, Rakili chuan, “Pathianin mi ngaihtuah a, ka aw a hre bawk a, fapa mi pe a nih hi,” a ti a; chuvângin, a hmingah chuan Dana a sa a.

⁷Tin, Rakili bawihnu Bilhaii chu a rai leh a, Jakoba chu fapa dang a hrinsak leh a.

⁸Tin, Rakili chuan, “Pathian buanin ka laizâwnnu ka buan a, ka hneh ta,” a ti a; tichuan, a hmingah chuan Naphtalia sa a.

⁹Tin, Leaii chuan fa dang a hring leh ta rih lo fo tih a inhriatin, a bawihnu Zilpaii chu a hruai a, a nupui atân Jakoba a pe a.

¹⁰Tichuan, Leaii bawihnu Zilpaii chuan Jakoba chu fapa a hrinsak a.

¹¹Tin, Leaii chuan, “A va vânneihthlâk êm!” a ti a; tichuan, a hmingah chuan Gada a sa a.

¹²Tin, Leaii bawihnu Zilpaii chuan Jakoba chu fapa dang a hrinsak leh a,

¹³Tin, Leaii chuan, “Ka va nihlawh êm! Hmeichheho chuan nihlawh mi ti ngawt dâwn a nih hi,” a ti a; tichuan, a hmingah chuan Asera a sa a.

¹⁴Tin, buh lâk laiin Reubena chuan phûlah zâwlaidi a va hmu a, a nu Leaii hnênah a rawn la a. Chutichuan, Rakili chuan Leaii hnênah, “Khawngaih takin i fapa zâwlaidi ṭhenkhat kha mi lo pe teh,” a ti a.

¹⁵Tin, ani chuan a hnênah, “Ka pasal mi chhuhsak hi thil duai em ni? Ka fapaa zâwlaidi pawh hi mi chhuhsak i tum lehzêl maw?” a ti a. Tin, Rakili chuan, “A nih loh leh, i fapaa zâwlaidi aiah hian zâninah a mutpui ang che,” a ti a.

¹⁶Tin, tlai lamah chuan Jakoba chu phûl aṭang chuan a lo hâwng a; tin, Leaii chu a hmuak tûrin a chhuak a, “Mi pâwl tûr a ni; ka fapaa zâwlaidiin ka hawh tawh tlat si chia,” a ti a. Tichuan, chumi zân chuan a mutpui ta a.

¹⁷Tin, Pathianin Leaii ṭawngṭaina chu a ngaithla a; tichuan, a rai a, Jakoba chu fapa pangana a hrinsak leh a.

¹⁸Tin, Leaii chuan, “Ka bawihnu chu ka pasal hnêna ka pêk avângin Pathianin ka hlawh mi pe ta a nih hi,” a ti a; tichuan, a hmingah chuan Isakara a sa a.

¹⁹Tin, Leaii chu a rai leh a, Jakoba chu fapa parukna a hrinsak leh a.

²⁰Tin, Leaii chuan, “Pathianin thuam ṭha tak mi neihtîr a; tûnah zawng ka pasal chu, fapa paruk ka hrinsak tâk avângin ka hnênah a chêng tawh ang,” a ti a; tichuan, a hmingah chuan Zebuluna a sa a.

²¹Tin, chumi hnuah chuan fanu a hring leh a, a hmingah chuan Dinaii a sa a.

²²Tin, Pathianin Rakili chu a hre reng a; tichuan, Pathianin a ṭawngṭaina a ngaithla a, a chhûl a hawnsak ta a.

²³Tichuan, a rai a, fapa a hring ta a; tin, “Pathianin ka hmingchhia a chhilh ta,” a ti a;

²⁴tin, “Lalpa chuan fapa dang mi pêk belhchhah leh rawh se,” tiin a hmingah chuan Josefa a sa a.

²⁵Tin, heti hi a ni a, Rakili chuan Josefa chu a hrin hnuin, Jakoban Labana hnênah, “Keima awmna pângngaiah, kan ram lama ka hâwnna tûrin mi kaltîr tawh rawh khai.

²⁶I rawng ka bâwl chhan ka nupuite leh ka fate hi mi pe la, mi kaltîr rawh; i rawng ka bâwlsak zia che chu i hre si a,” a ti a.

²⁷Tin, Labana chuan a hnênah, “Mi khawngaih theih chuan la awm ta rih che, LALPA chuan nangma zâran mal mi sâwm tih aienin ka hria asin,” a ti a.

²⁸Tin, amah vêk chuan, “I hlawh tûr ruat la, mi hrilh teh; tichuan, ka pe dâwn che nia,” a ti a.

²⁹Tin, ani chuan a hnênah, “Engtin nge i rawng ka bâwla, engtin nge i ran chu ka hnênah an awm i hria alâwm.

³⁰Ka lo kal hma zawngin tlêm tê chauh i nei a, tûnah zawng tam taka an lo chan tâk hi; ka pênna lam apiangah LALPA chuan mal a sâwm zêl che a ni; amaherawhchu, eng tikah nge keima chhûngkaw tân ka thawh chhuah ve ang?” a ti a.

³¹Tin, ani chuan, “Eng nge ka pêk ang che?” a ti a. Tin, Jakoban, “Eng mah mi pe tûr a ni lo; he thil hi mi tihsak chuan i ran rual chu ka thlahin ka vêng leh ang e.

³²Vawiinah hian i ran rual chu ka va en chhuak vek ang a, berâm zînga a hângin a kah chik nuk leh a hângin a kah phoh phoh leh a hâng apiang leh, kêl zînga a vârin a kah chik nuk leh a vârin a kah phoh phohte chu chuta ta chu ka hruai hrang zêl ang; tin, tûn achina chutianga lo piang apiangte chu ka hlawh tûr ni ang hmiang.

³³Chutichuan, tûn achinah, i mit hmuha awm ka hlawh kawng thu-ah i lo kal hun chuan, ka felna hian mi chhânsak mai ang; kêl zînga a vârin a kah chik nuk loh leh a vârin a kah phoh phoh loh leh, berâm zînga a hâng lo ka hnêna i hmuh apiang chu ka rûkah i ruat mai tûr a ni,” a ti a.

³⁴Tin, Labana chuan, “Ngai teh, i sawi ang tak chu ni ang hmiang,” a ti a.

³⁵Tichuan, chumi ni tak chuan kêlpa, a vâra ze tan leh a vârin a kah phoh phoh zawng zawng leh, kêlnu, a vârin a kah chik nuk leh a vârin a kah phoh phoh zawng zawng, a vâr tel apiang chu, berâm zînga a hâng zawng zawngte nên chuan a hruai hrang a, a fapate kutah a pe a;

³⁶tin, amah leh Jakoba kârah chuan ni thum kalah a awmtîr a; tin, Jakoba chuan Labana ran rual dang zawng zawng chu a thlah leh ta a.

³⁷Tin, Jakoba chuan hriang leh vaiumkhal leh thingse tiang hring a la a, a pil a khawk vâr thliah a, tiangahte chuan a vâr chu a tilang a.

³⁸Tin, a tiang pil khawhte chu ran rualten an rawn in ṭhinna tui inna thlêngah te, tui luannaah te chuan, ran rualte hma zâwn zêlah a dah ta a; tin, tui in tûra an lo kal lai chuan an lo rai ṭan ṭhîn a.

³⁹Tichuan, ran rualte chu tiang zâwnahte chuan an rai ṭan a, a ze tan te, a ze chik nuk te, a ze phoh phoh te an rawn hring ṭhîn a.

⁴⁰Tin, Jakoba chuan berâmnote chu a dah hrang a; tin, ran rualte chu Labana ran rual zînga a ze tan leh a hâng zawng zawng lam chu a hawitîr ṭhîn a; ama ran rualte chu a dah hrang ṭhîn a; Labana ran zîngah chuan a dah lo va.

⁴¹Tin, heti hi a ni a, ran chak deuhte chu an rai ṭan apiangin tiang zînga an rai ṭan theihna tûrin, Jakoba chuan tui luannaah, ran mit hmuhah chuan tiangte chu a dah ṭhîn a.

⁴²Amaherawhchu, ran chu an ṭan a ṭhat loh chuan a dah ṭhîn lo; chutichuan, a no ṭanṭha lo deuhte chu Labana ta a ni zêl a, a chak deuhte chu Jakoba ta a ni zêl a.

⁴³Tichuan, Jakoba chu nasa takin a lo pung a, ran rual, rual lian tak tak te, bawihnu te, bawihpa te, sanghâwngsei te, sabengtung te a lo nei ta a.