Read Mizo_Old_version Genesis 31 Bible Online

Genesis 31 - Mizo_Old_version bible

Genesis 31

¹Tin, ani chuan Labana fapaten, “Jakoban kan pa ta zawng zawng chu a lâksak vek a, kan pa taa mi a ni, hêng ropuina zawng zawng hi a hmuh ni,” an tih thute a lo hre ta a.

²Tichuan, Jakoban Labana hmêl a en a; tin, ngai teh, tûn hma lam angin a chungah a ṭha ta lo tih a hria a.

³Tin, LALPA chuan Jakoba hnênah, “I thlahtute ramah leh i laichînte hnênah haw leh tawh rawh; i hnênah ka awm zêl dâwn nia,” a ti a.

⁴Tichuan, Jakoba chuan mi a tîr a, phûla a ran rual awmna lamah chuan Rakili leh Leaii chu a ko va;

⁵tin, an hnênah, “In pa hmêl ka hmuhin, tûn hma lam angin ka chungah a ṭha ta lo tih ka hria a; nimahsela, ka pa Pathian chu ka hnênah a awm reng a ni.

⁶Nangni pawhin in pa rawng hi ka theihtâwpin ka bâwl tih in hria a.

⁷Nimahsela, in pa chuan mi bum a, ka hlawh hi vawi sâwm lai mi tihdanglamsak tawh a; nimahsela, Pathianin ka pawi a khawih a phal lo a ni.

⁸‘A ze chik nukte chu i hlawh a ni ang,’ a tih leh, ran zawng zawng chuan a ze chik nukte an hring ṭhîn a; tin, ‘A ze tante chu i hlawh a ni ang,’ a tih leh, ran zawng zawng chuan a ze tante an hring ṭhîn.

⁹Chutiangin Pathianin in pa rante chu a lâksak a, keimah mi pe ta a nih hi.

¹⁰Tin, heti hi a ni a, rante chu an rai ṭan lai chuan, ka mumangah chuan ka han dâk a; tin, ngai teh, a pa, ran bawhtute chu, a ze tan te, a ze chik nuk te, a ze zeng zung te an ni tih ka hmu a ni.

¹¹Tin, ka mumangah chuan Pathian vântirhkohvin, ‘Jakob,’ mi lo ti a; tin, keiin, ‘Heta hi ka awm,’ ka ti a.

¹²Tin, ani chuan, ‘Han dâk la, en rawh, a pa, ran bawhtu zawng zawng saw, a ze tan te, a ze chik nuk te, a ze zeng zung te an nih saw; Labanan i chunga a thiltih zawng zawng hi ka hmu asin.

¹³Kei hi, lungphuna sahriak i hnawihna, ka hnêna thu i tiamna Bethel, kha Bethel Pathian kha ka ni; tûnah tho la, he ram ata hi chhuak la, i pianna ramah chuan haw leh tawh rawh,’ a ti a,” a ti a.

¹⁴Tin, Rakili leh Leaii chuan an chhâng a, a hnênah. “Kan pa inah chuan kan tân chanvo leh ro khâwm tûr rêng a la awm cheu em ni?

¹⁵Ani chuan mikhual ang lekah min ngai tawh a ni lâwm ni? Min hralh a, kan man pawh a ei zo vek tawh si a.

¹⁶Pathianin kan pa laka sum a lâksak zawng zawng chu keimahni leh kan fate ta a nih hi; chutichuan, Pathianin i hnêna a sawi apiang chu ti rawh khai,” an ti a.

¹⁷Tichuan, Jakoba chu a tho va, a fapate leh a nupuite chu sanghâwngsei chungahte a chuantîr a.

¹⁸Tin, Kanaan rama a pa Isaaka hnêna kal tûrin a ran zawng zawng leh, a sum khâwl khâwm zawng zawng, a ran hmuhte, Paddan-aram rama a khâwl khâwmte chu a kalpui ta vek a.

¹⁹Tin, Labana chu a berâm hmul mêt tûrin a kal daih a; tin, Rakili chuan a pa milemte a rûksak a.

²⁰Tin, Jakoba chu Suria mi Labana hriat loh hlânin a kal ru ta daih a, a tlân bo tûr chu a hrilh lo va.

²¹Chutichuan, a neih zawng zawng nên chuan a tlân bo ta a; tin, a tho va, Luipui chu a kân a, Gilead tlâng lam chu hmachhawnin a pan zêl a.

²²Tin, a ni thum niah chuan Jakoba a tlân bo tih Labana chu an hrilh a.

²³Tichuan, a unaute a hruai a, ni sarih kal a ûm a; Gilead tlângah chuan a ûmpha ta a.

²⁴Tin, Suria mi Labana hnênah chuan zâna a mumangah Pathian a lo kal a, a hnênah, “Jakoba hnênah a chhia a ṭha enga mah sawi lo tûrin fîmkhur rawh,” a ti a.

²⁵Tin, Labana chuan Jakoba chu a ûmpha ta a. Tin, Jakoba chuan a puan in chu tlângah a lo zâr tawh a; tin, Labana pawhin a unaute nên chuan Gilead tlângah an zâr ve ta a.

²⁶Tin, Labana chuan Jakoba hnênah, “I thiltih hi engtizia nge ni le, ka hriat loh hlâna i kal rûk daiha, chemsen bawihte ang maia ka fanute i hruai bo hi?

²⁷Eng vângin nge a rûka i tlân bova, mi kal rûksana, hlimna te nên, hla te nên, khuangtê te nên, ṭingṭang te nên ka thlahna tûr chein mi hrilh lohva,

²⁸ka tute leh ka fanute ka fawh i phal loh ni? Atthlâk takin a ni thil i tih ni.

²⁹Tichhe thei che ka ni asin; nimahsela, i pa Pathian chuan nizânah khân, ‘Jakoba hnênah a chhia a ṭha a enga mah sawi lo tûrin fimkhur rawh,’ tiin mi bia a ni.

³⁰Tin, i pa in i ngaih tawh êm êm avângin kal châk hle mah la, eng vângin nge ka pathiante mi rûksak ni?” a ti a.

³¹Tin, Jakoba chuan a chhâng a, Labana hnênah, “Ka hlauh vâng a ni; i fanute hi mi lâk luihsak dah ang e, ka ti a ni.

³²Tu pawh i pathiante lo kawltu apiang chu an nung lo vang; kan unaute mit hmuhah hian i ta ka hnêna awm chu en chiang la, la ta che,” a ti a. Rakilin a lo ru tih Jakoban a hre si lo va.

³³Tin, Labana chu Jakoba puan inah te, Leaii puan inah te, bawihnu pahnih puan inah te a lût zêl a; nimahsela, a hmu lo va. Tin, Leaii puan in ata chu a chhuak a, Rakili puan inah chuan a lût leh a.

³⁴Tin, Rakili chuan milemte chu a lo la a, sanghâwngsei thuamhnaw zîngah a lo dah a, a lo ṭhut hnan diam a. Tin, Labana chuan a puan in chhûng zawng zawng chu a dap vêl vek a; nimahsela, a hmu lo va.

³⁵Tin, ani chuan a pa hnênah, “I hmaa ka thawh peih loh avâng hian, ka lalpa, thinur suh ang che; hmeichhe awm dân pângngai chu ka chunga a awm lai tak a ni si a,” a ti a. Tichuan, a zawng a zawng a; nimahsela, milemte chu a hmu zo ta lo va.

³⁶Tin, Jakoba chu a thinur ta a, Labana chu a hau va; Jakoba chuan Labana hnênah, “Eng nge ka bawhchhiata, eng nge ka sualna, mi rawn ûm vak mai ni?

³⁷Ka bungrua zawng zawng i dap vêl pawhin, i in chhûng bungrua rêng rêng eng nge i hmuh ni? Keini pahnih hi min ngaihtuah theihna tûrin ka unaute leh i unaute hmaah hian dah rawh.

³⁸Hei kum sawmhnih zet i hnênah ka awm ta a; i berâmpuite leh i kelpuite chuan an note an hring sual ngai lo va, i berâm rual zînga a pate pawh ka ei ngai si lo va.

³⁹Ramsa sehte pawh i hnênah ka rawn thlen ngai lo va; keiin a bo ai chu ka tuar zâwk ṭhîn a; chhûna rûk emaw, zâna rûk emaw ka rulh i phût ṭhîn.

⁴⁰Hetiangin ka awm ṭhîn; chhûna ni sa leh zâna khaw vâwtin mi tihrehawm êm êm ṭhîn a; mut pawh ka hmu ngai ṭhîn lo va.

⁴¹Chûng kum sawmhnih chhûng zawng chu i inah ka awm a; i fanute pahnih hlawh tûrin kum sâwm leh kum li i rawng ka bâwl a, i rante hlawh tûrin kum rûk ka bâwl leh a; ka hlawh lah chu vawi sâwm lai i tidanglam si a.

⁴²Ka pa Pathian, Abrahama Pathian, Isaaka ṭiha chu ka hnênah awm lo phei sela chu, tûnah pawh hian ruak ngawta mi hâwntîr ngei ngei tûr i nih hi. Pathianin ka hrehawmzia leh ka thawh rimzia chu a hmu a, nizânah chuan a zilh che a nih chu,” a ti a.

⁴³Tin, Labana chuan a chhâng a, Jakoba hnênah. “Fanute hi keima fanu an ni a, naupangte hi keima naupang an ni a, rante hi keima ran an ni a, i hmuh zawng zawng hi keima ta vek an ni; vawiinah hian hêng ka fanute chungah leh, an fa hrinte chungah hian eng nge ka tih theih ang?

⁴⁴Hawh teh, kei leh nang hian thu i thlung teh ang; chu chu kei leh nanga kârah hriatna ni rawh se,” a ti a.

⁴⁵Tichuan, Jakoba chuan lung a la a, lungphun atân a phun a.

⁴⁶Tin, Jakoban a unaute hnênah, “Lung la khâwm rawh u,” a ti a; tin, lung an la a, an tiang khâwm a; tin, lung tian khâwm kiangah chuan chaw an ei a.

⁴⁷Tin, Labana chuan chu lung tian khâwm chu Jegar-sahadutha a vuah a; Jakoba erawh chuan Galeed a vuah a.

⁴⁸Tin, Labana chuan, “He lung tian khâwm hi vawiinah hian kei leh nanga kârah hriatna a nih hi,” a ti a. Chuvângin, a hmingah chuan Galeed vuah a ni ta a;

⁴⁹Mizpa vuah a ni bawk a, Labanan, “Inṭhena kan awm hunin LALPA chuan min vêng tawn rawh se.

⁵⁰Ka fanute hi i tihretheiha, ka fanute lo hi nupui dangte i neih chuan, tu mah kan hnênah an awm lo na a, en teh, Pathian chu kei leh nanga kârah hretu a ni,” a ti si a.

⁵¹Tin, Labana vêkin Jakoba hnênah, “He lung tian khâwm hi en la, keimah leh nangma inkâra he lung ka phun pawh hi en teh.

⁵²Pawi inkhawihsak tûrin kei hi he lung tian khâwm hi pêlin i hnên lamah ka lo kal lo vang, tih leh, nang pawh he lung tian khâwm leh he lungphun hi pêlin ka hnên lamah i lo kal lo vang tih, he lung tian khâwm hi hriatna ni sela, he lungphun pawh hi hriatna ni bawk rawh se.

⁵³Abrahama Pathian, Nahora Pathian, an pa Pathian chuan kan kâra thu ngaihtuah rawh se,” a ti leh a. Tin, Jakoba chuan a pa Isaaka ṭiha chu chhâlin chhia a chham ta a.

⁵⁴Tin, Jakoban tlângah chuan inthawina a hlân a, a unaute chu chhang ei tûrin a ko va; tichuan, chhang an ei a, tlângah chuan an riak ta hlawm a.

⁵⁵Tin, zîng takah Labana chu a tho va, a tute leh a fanute chu a fâwp a, mal a sâwm a; tin, Labana chu a kal a, ama awmna lamah a haw leh ta a.