Read Mizo_Old_version Genesis 32 Bible Online

Genesis 32 - Mizo_Old_version bible

Genesis 32

¹Tin, Jakoba chu a kal ta zêl a; tin, Pathian vântirhkohten an lo tâwk a.

²Tin, Jakoban anni chu a hmuh chuan, “Hêng hi Pathian pâwlho an ni,” a ti a; tichuan, chumi hmun hmingah chuan Mahanaim a vuah a.

³Tin, Jakoba chuan Seir rama Edom phûl lamah, a u Esauva hnênah chuan a hmaah zualkote a kaltîr a.

⁴An hnênah, “Ka lalpa Esauva hnênah chuan heti hian in sawi tûr a ni, ‘I chhiahhlawh Jakoban heti hian a ti a ni: “Labana hnênah chuan ka mikhual a, tûn thlengin ka awm ta reng a;

⁵bâwngpa te, sabengtung leh berâm te, bawihpa leh bawihnu te ka nei hlawm a; tichuan, i mit ka tlun theih nân ka lalpa hrilh tûrin mi ka rawn tîr a ni,” a ti,’” tiin anni chu thu a pe a.

⁶Tin, zualkote chu Jakoba hnênah an lo kîr leh a, “I u Esauva hnên kan va thleng a; tin, mi zali rawn hruaiin hmuak tûr chein a lo kal nghe nghe asin,” tiin an sawi a.

⁷Chutichuan, Jakoba chuan a hlau êm êm a, a mangang ta a; tichuan, a hnêna mi awm te, berâm rual te, bâwng rual te, sanghâwngsei te chu pâwl hnihah a siam a;

⁸“Esauva chu pâwl pakhat hnênah a lo kala a thah chuan, pâwl pakhat la awm chu an tlân bo thei ang,” a ti a.

⁹Tin, Jakoba vêk chuan, “Aw, ka pu Abrahama Pathian, ka pa Isaaka Pathian, aw LALPA, ‘I ram lamah leh i laichînte hnênah haw leh tawh rawh; tichuan, ka ti ṭha ang che,’ mi titu,

¹⁰i chhiahhlawh chunga khawngaihna zawng zawng i lantîr zîngahte hian, a tenau ber pawh hmu tlâk ka ni lo ve; he Jordan lui hi ka tiang nên chauh ka kân a; tûnah zawng pâwl hnih zet ka lo nih tâk hi.

¹¹Khawngaih takin ka u kut ata, Esauva kut ata ngei chu mi chhanhim ang che; nunau chawpa mi rawn thah ka hlau si a.

¹²Nangin, ‘Ka ti ṭha ngei ngei ang chia, i thlahte chu tuifinriata ṭiauvaivut chhiar sên loh khawp hiala a tam angin ka siam ang e,’ i ti a,” a ti a.

¹³Tin, chumi zân chuan chutah chuan a riak ta a; tin, a neih zînga mi, kêlpui zahnih leh kêlpa sawmhnih, berâmpui zahnih leh berâmpa sawmhnih, sanghâwngsei sâwr lai sawmthum an note nên, bâwngpui sawmli leh bâwngpa sâwm, sabengtungpui sawmhnih leh sabengtungno sâwm chu a u Esauva tân lâwmmanah a la hrang a.

¹⁶Tin, chûngte chu pâwl tin a hrang ṭheuhvin, a chhiahhlawhte kutah a kawltîr a; tin, a chhiahhlawhte hnênah chuan, “Ka hmaah kal kai ula, pâwl tin hi kâr neihtîr zêl rawh u,” a ti a.

¹⁷Tin, a hma hruaitu hnênah chuan, “Ka u Esauva chuan a tawh chia, ‘Tu mi nge i nih? Khawiah nge i kal dâwn? I hmaa awmte hi tu ta nge?’ tia a zawh hun che chuan,

¹⁸‘I chhiahhlawh Jakoba ta an ni; ka pu Esau, i tân lâwmmanah a thawn che a nih hi; ngai teh, amah pawh kan hnungah sâwn a awm,’ ti ang che,” tiin thu a pe a.

¹⁹Tin, a dawttu leh, a dawt lehtu leh, ran rual khalhtu dang zawng zawng hnênah pawh, “Esauva in hmuh hun chuan chutiang bawk chuan in sawi tûr a ni;

²⁰tin, ‘Ngai teh, i chhiahhlawh Jakoba chu kan hnungah sâwn a awm,’ ti bawk ang che u,” tiin thu a pe ṭheuh va. “Lâwmman ka hmaa kal hianin a thin ka tidam ang a, chumi hnuah chuan a hmêl ka hmu ang; tichuan, mi lo lâwm mahna,” a ti a ni.

²¹Chutichuan, lâwmman chu a hmaah chuan a kal kai ta a; ani erawh chu, chumi zân chuan a pâwl zîngah chuan a riak ta a.

²²Tin, zânah chuan a tho va, a nupuite pahnih leh, a bawihnute pahnih leh, a fa sâwm leh pakhatte chu a hruai a, Jabok lui kaiah chuan a kai ta a.

²³Tichuan, anni chu a hruai a, lui chu a kaitîr a, a neih zawng zawng pawh a kaitîr bawk a.

²⁴Tin, Jakoba chu amah chauhvin a awm ta a; tin, mi pakhatin ani chu khawfîngchah thlengin a buan a buan a.

²⁵Tin, a hneh lo tih a inhriatin a malpui ruh chuktuahah chuan a khawihsak a; tichuan, a buan lai chuan Jakoba malpui ruh chuktuah chu a lo pelhsawlh ta a.

²⁶Tin, ani chuan, “Mi thlah rawh, khawfîng pawh a chah dâwn tawh hi,” a ti a. Tin, ani chuan, “Mal mi sâwm loh chuan ka thlah lo vang che,” a ti a.

²⁷Tin, ani chuan a hnênah, “I hming eng nge ni?” a ti a. Tin, ani chuan, “Jakoba,” a ti a.

²⁸Tin, ani chuan, “I hming chu Jakoba an ti tawh lo vang a, Israela an ti zâwk tawh ang; Pathian leh mihring i bei a, i hneh tawh si a,” a ti a.

²⁹Tin, Jakoba chuan ani chu a zâwt a. “Khawngaih takin i hming mi hrilh rawh,” a ti a. Tin, ani chuan, “Eng vângin nge ni ka hming mi zawh?” a ti a. Tin, chutah chuan mal a sâwm ta a.

³⁰Tin, Jakoba chuan chumi hmun hmingah chuan Peniel a vuah ta a: “Pathian chu a hmaihma ngeiah ka hmu a, ka nunna hi zuah a ni si,” a ti a ni.

³¹Tin, Penuel a pelh lai chuan ni a lo chhuak a, amah chu a rawn chhun a, a malpui avâng chuan a lo bai ta a.

³²Chuvângin, tûn thlengin Israela thlahte chuan malpui ruh chuktuaha khêl tha awm hi an ei ngai lo; Jakoba malpui ruh chuktuah chu a khêl ṭha lai taka a khawih avângin.