Read Mizo_Old_version Genesis 33 Bible Online

Genesis 33 - Mizo_Old_version bible

Genesis 33

¹Tin, Jakoba chu a han dâk a; tin, ngai teh, Esauva chu a hnêna mi zalite nên an lo kal a. Tichuan, a fate chu Leaii hnênah te, Rakili hnênah te, bawihnu pahnih hnênah te a sem thliah a.

²Tin, bawihnute leh an fate chu a hmatâwng berah a dah a, Leaii leh a fate chu a dawtah a dah a, Rakili leh Josefa chu a hnung berah a dah a.

³Tin, amah chu an hmaah chuan a kal a, a u bul a thlen hma chuan vawi sarih lei siin chibai a bûk a.

⁴Tin, Esauva chu amah lâwm tûrin a tlân a, a pawm a, a ir a chuktuah a, a fâwp a; tin, an ṭap dûn ta a.

⁵Tin, Esauva chu a han dâk a, hmeichhiate leh naupangte chu a hmu a; tichuan, “I rawn hruaite saw tute nge ni?” a ti a. Tin, ani chuan, “Pathianin khawngaih taka i chhiahhlawh a pêk naupangte an nih saw,” a ti a.

⁶Chutichuan, bawihnute chu anmahni leh an fate nên chuan an lo kal hnai a, an kûn a, chibai an bûk a.

⁷Tin, Leaii pawh a fate nên chuan an lo kal hnai a, an kûn a, chibai an bûk ve a; tin, chumi hnuah chuan Josefa leh Rakili chu an lo kal hnai a, an kûn a, chibai an rawn bûk bawk a.

⁸Tin, Esauva chuan, “Ran rual ka tawh zozaite kha engtizia nge ni?” a ti a. Tin, ani chuan, “Ka lalpa, i mit ka tlun theih nân ka ti a ni,” a ti a.

⁹Tin, Esauva chuan, “Kei pawhin ka ngah e, ka nau; i neih zawng zawng chu i ta ni rawh se,” a ti a.

¹⁰Tin, Jakoba chuan, “Ni lo ve, i mit ka tlun chuan, khawngaih takin ka lâwmman pêk che kha mi pawmsak rawh; Pathian hmêl hmu angin i hmêl ka hmu a, ka chungah i lâwm si a.

¹¹Pathianin mi khawngaih avâng leh, ka ngah avâng hian khawngaih takin ka thil rawn pêk che kha pawm rawh,” a ti a. Tichuan, a thlêm a thlêm a, a pawm ta a.

¹²Tin, Esauva chuan, “Hawh, i kal ang, hma ka hruaisak ang che,” a ti a.

¹³Tin, ani chuan a hnênah, “Naupangte hi an la têt leh, berâm rual leh bâwng rual ka hnêna awmte hi no hruai an nih, ka lalpa, i hria e; ni khat chauh pawh an khalh chak lutuk chuan ran rual zawng zawng hi an thi mai ang.

¹⁴Ka lalpa, khawngaih takin i chhiahhlawh hmaah hian kal la; kei chuan Seir tlângah, ka lalpa, i hnên ka thlen hma loh chuan, ka hmaa ran kal hi an kal theih tâwk ang zêl leh, naupangte kal theih tâwk ang zêlin, zawimuangin ka rawn chhawm zêl ang e,” a ti a.

¹⁵Tin, Esauva chuan, “Ka hnêna awm mi ṭhenkhatte hi ka hnutchhiah tal ang che chu,” a ti a. Tin, ani chuan, “Engah kher maw? Ka lalpa mit mi tluntîr mai rawh,” a ti a.

¹⁶Chutichuan, Esauva chu chumi ni vêk chuan Seir tlâng lam panin a kîr leh ta a.

¹⁷Tin, Jakoba chu Sukkoth hmunah chuan a kal a, ama tân in a sa a, a rante tân bûkte a sa bawk a; chuvângin, chumi hmun hming chu Sukkoth an ti ta a.

¹⁸Tin, Jakoba chu Paddan-aram ram ata a lo kal chu thlamuang takin Sekem khua, Kanaan rama awm chu a thleng a, daikiangah chuan a puan in chu a zâr ta a.

¹⁹Tin, a puan in zârna hmun chu, Sekema pa Hamora fate hnên aṭangin tangka zain a lei a.

²⁰Chutah chuan maichâm a siam a, a hmingah chuan El-Elohe-Israel a vuah a.