Read Mizo_Old_version Genesis 34 Bible Online

Genesis 34 - Mizo_Old_version bible

Genesis 34

¹Tin, Leaii fanu Dinaii, Jakoba a hrinsak chu chumi ram nulate hmu tûrin a va lêng chhuak a.

²Tin, Hiv mi Hamora, chumi ram lal fapa Sekema chuan ani chu a lo hmu a; tin, a man a, a mutpui a, a tlâwm ta a.

³Tin, a rilru chu Jakoba fanu Dinaii chungah chuan a awm tlat a, chu nula chu a hmangaih a, ani chu ṭawngkam ṭha takin a bia a.

⁴Tin, Sekema chuan a pa Hamora chu a bia a, “He nula hi nupuiah mi neihsak rawh,” a ti a.

⁵Tin, Jakoba chuan a fanu Dinaii chu Sekeman a tibawrhbâng tih a lo hria a; a fapate chu phûlah a ran zîngah an awm a; tichuan, an lo hâwn hma loh chuan Jakoba chu a ngawi reng a.

⁶Tin, Sekema pa Hamora chu Jakoba be tûrin a hnênah a kal a.

⁷Tin, Jakoba fapate chuan an hriat veleh phûl aṭang chuan an lo hâwng ta a; tin, Jakoba fanu mutpuiin Israel-ho zînga thil sual âtthlâk tak, thil tih hauh loh tûr chu a tih tâk avângin an lungngai a, an thinur ta êm êm a.

⁸Tin, Hamora chuan anmahni a bia a, “Ka fapa Sekema rilru chu in fanu chungah a awm tlat a; khawngaih takin nupuiah neihtîr ta che u.

⁹Tichuan, i innei tawn ang u; in fanute min neihtîr ula, kan fanute pawh nei bawk rawh u.

¹⁰Tichuan, kan hnênah in awm ang a, ram pawh hi a awm duai fo vang; hêngah hian awmin sumdâwng ula, hêngah hian lo intimuk rawh u,” a ti a.

¹¹Tin, Sekema chuan nula pa leh a nuṭate hnênah, “Mi khawngaih rawh u, ka hnêna in sawi apiang ka pe zêl ang che u.

¹²Man leh thilpêk chu eng zât pawh ngên ula, in tih ang zêlin ka pe ang che u; eng pawh ni sela, nula chu nupuiah mi neihtîr phawt mai rawh u,” a ti a.

¹³Tin, Jakoba fapate chuan an farnu Dinaii chu a tihbawrhbân avângin, Sekema leh a pa Hamora chu ngamthlêmnain an chhâng a, an sawi ve a,

¹⁴an hnênah, “He thil - serh tan lo mi, kan farnu pêk hi - kan ti thei lo vang; chu chu kan tân hmingchhiatna tûr a ni si a.

¹⁵Hetianga in tiam chauh hian in thu ang chu kan remti ang: in zînga mipa tawh phawt chu serh tanin keimahni angin awm ula;

¹⁶chutichuan, kan fanute kan neihtîr ang che u a, keini pawhin in fanute kan nei bawk ang a; tin, in hnênah kan awm ang a, chi khat kan lo ni dâwn nia.

¹⁷Nimahsela, serh tan kawnga kan thu in zawm dâwn loh chuan kan fanu chu kan hruai ang a, kan kal mai ang,” an ti a.

¹⁸Tin, an thu chuan Hamora leh Hamora fapa Sekema chu a tilâwm a.

¹⁹Tichuan, tlangvâl chuan Jakoba fanu chu a duh hle avângin, chu thil chu rei rial lovin a ti ta mai a; ani chu a pa chhûngte zawng zawng zînga mite zah ber a ni a.

²⁰Tin, Hamora leh a fapa Sekema chuan an khaw kulh kawngkhâr chu an thleng a, an khuate chu an bia a,

²¹“Saw mite saw min rem takin an awm a; chuvângin, he ramah hian awmin, hêngah hian sumdâwng rawh se; ngai teh u, an tân pawh ram hi a zau tâwk si a; an fanute saw nupuiahte nei ila, kan fanute pawh i neihtîr bawk ang u.

²²Nimahsela, chi khat kan lo nihna tûra kan hnêna awm chu hetianga kan tiam chauh hian, saw mite sâwn min remtihpui dâwn a ni: serhtan an nih angin kan zînga mipa tawh phawt chu serhtan lo ni ve ila.

²³An ran te, an sum te, an sa zawng zawng te kan ta a ni vek dâwn lâwm ni? An thu hi i remtihpui mai ang u; tichuan, kan hnênah an awm dâwn nia,” an ti a.

²⁴Tin, Hamora leh a fapa Sekema thu chu a khaw kulh kawngkhâra chhuak zawng zawngte chuan an zâwm a; a khaw kulh kawngkhâra chhuak zawng zawng, mipa tawh phawt chuan serh an tantîr ta vek a.

²⁵Tin, heti hi a ni a, a ni thum niah, an nat lai tak chuan Jakoba fapate zînga mi pahnih, Dinaii nuṭa Simeona leh Levia chuan, an khandaih keng ve vein, a rûkin khua chu an bei a, mipa zawng zawng chu an that zo phiar a.

²⁶Tichuan, Hamora leh a fapa Sekema chu khandaih hriamin an that a, Sekema in ata Dinaii chu an hruai a, an chhuak ta a.

²⁷Jakoba fapateho chuan an mi thahte chu an va nangchîng a, an farnu chu an tihbawrhbân avângin khua chu an rawk ta a.

²⁸An berâm rualte, an bâwng rualte, an sabengtungte, an khuaa thil awmte, an lova thil awmte chu an lâksak a;

²⁹an sum zawng zawng leh an fanau tê tête leh an nupuite zawng zawng, in chhûnga awm apiang chu an man a, an rawk bawk a.

³⁰Tin, Jakoban Simeona leh Levia hnênah chuan, “Nangnin he rama awmte zînga Kanaan-ho leh Periz-hote zîngah hian, huat mi phurhtîrin mi timangang hle a ni; kei tlêm tê ka nih avâng hian mi bei tûrin an inpun khâwm ang a, mi that mai ang; tichuan, tihboralin ka awm ang, kei leh ka chhûngte nên hian,” a ti a.

³¹Tin, anni chuan, “Kan farnu hi nawhchizuar tih angin a ti tûr em ni ang?” an ti a.