Read Mizo_Old_version Genesis 35 Bible Online

Genesis 35 - Mizo_Old_version bible

Genesis 35

¹Tin, Pathianin Jakoba hnênah chuan, “Tho la, Bethel-ah chho la, chutah chuan awm rawh; tin, i u Esauva hnên ata i tlân bo laia i hnêna inlâr Pathian tân khân chutah chuan maichâm siam rawh,” a ti a.

²Tichuan, Jakoban a chhûngte leh a hnêna awm zawng zawngte hnênah chuan, “In zînga mi dang pathian awmte chu dah bo daih ula, intithianghlimin in silhfênte thlâk rawh u;

³tho ila, Bethel-ah i chho vang u; tichuan, ka mangan laia mi chhânga, ka kalnaa ka hnêna awm zêl Pathian tân khân maichâm ka siam dâwn nia,” a ti a.

⁴Tichuan, mi dang pathian, an kuta awm zawng zawng leh an benga bengbeh an beh zawng zawng chu Jakoba an pe a; tin, Jakoba chuan Sekem khaw kianga sasaw hnuaiah chuan a thukru ta a.

⁵Tin, an kal a; an vêl khuate chuan an lo hlau nasa ta êm a, Jakoba fapate chu an ûm ta lo va.

⁶Chutichuan, Jakoba chuan Kanaan rama Luz khua chu a thleng a, amah leh a hnêna awm zawng zawngte nên (Luz chu Bethel a ni a).

⁷Tin, chutah chuan maichâm a siam a, a u hnên ata a tlân bo lai khân chutah chuan Pathian a hnêna a inlâr avângin, a hmun chu El-Bethel a ti ta a.

⁸Tin, Rebeki awmtu Debori chu a thi a, Bethel hnuaia sasaw hnuaiah chuan an phûm a; sasaw hming chu Allon-bakuth [1] an ti ta a.

⁹Tin, Jakoba chu Paddan-aram ram aṭanga a hâwnin Pathian a hnênah a inlâr leh a, mal a sâwm a.

¹⁰Pathian chuan a hnênah, “I hming hi Jakoba a ni a; i hming chu Jakoba an ti tawh lo vang, i hming chu Israela a ni zâwk ang,” a ti a; tichuan, a hmingah chuan Israela a ti ta a.

¹¹Tin, Pathian vêkin a hnênah, “Kei Pathian Engkimtitheia ka ni; chi tam tak thlahin lo pung rawh; chi tihtham zet leh chi hrang hrang tam tak pawh i lakah an lo la awm ang a, i ṭhâlbê aṭangin lalte pawh an lo la chhuak bawk ang;

¹²tin, Abrahama leh Isaaka ram ka pêk hi ka pe ang che, i awm loh hnua i thlahte pawh ram hi ka pe zêl ang,” a ti a.

¹³Tin, Pathianin amah a biakna hmun aṭang chuan Jakoba chu a chhohsan ta a.

¹⁴Tin, a biakna hmunah chuan Jakoban englo a phun a (lung a ni a phun ni); a chungah chuan thilhlan, in mi a leih a, a chungah sahriak a leih bawk a.

¹⁵Tin, Jakoba chuan Pathianin amah a biakna hmun hmingah chuan Bethel a vuah a.

¹⁶Tin, Bethel aṭang chuan an kal a; tin, Ephrath khaw thlenna tûr chu hla fe a la ni a; tin, Rakili chuan nau a vei a, na takin a vei ta a.

¹⁷Tin, heti hi a ni a, na taka a vei laiin nau chhar mi chuan, “Hlau suh; fapa dang i nei dâwn a nih hi,” a ti a.

¹⁸Tin, heti hi a ni a, a thlarau a chhuah dâwn laiin (a thi ta si a) a hmingah chuan Ben-onia a sa a; a pa erawh chuan Benjamina a sa a.

¹⁹Tichuan, Rakili chu a thi a, Ephrath kawngah chuan an phûm a (Ephrath khua chu Bethlehem khua a ni).

²⁰Tin, a thlân chungah chuan Jakoban lung a phun a; chu chu tûn thlengin Rakili thlân Lungphun a la ni.

²¹Tin, Israela chu a kal zêl a, Migdal Eder piahah chuan a puan in a zâr ta a.

²²Tin, heti hi a ni a, Israela chu chumi ramah chuan a awm laiin, Reubena chuan a pa hmei Bilhaii chu a va mutpui a; tin, Israela chuan chu chu a hre ta a. Tin, Jakoba fapate chu sâwm leh pahnih an ni a:

²³Leaii fapate chu Reubena (Jakoba fa tîr) te, Simeona te, Levia te, Juda te, Isakara te, Zebuluna te an ni a;

²⁴Rakili fapate chu Josefa leh Benjamina an ni a;

²⁵tin, Rakili bawihnu Bilhaii fapate chu Dana leh Naphtalia an ni a;

²⁶tin, Leaii bawihnu Zilpaii fapate chu Gada leh Asera an ni a. Chûng chu Jakoba fapa, Paddan-aram rama a neihte kha an ni.

²⁷Tin, Jakoba chuan Kiriath-arba khuaa Abrahama leh Isaaka awmna Mamre-a a pa Isaaka hnên chu a thleng ta a (Kiriath-arba khua chu Hebron a ni).

²⁸Tin, Isaaka dam chhûng chu kum za leh kum sawmriat a ni a.

²⁹Tin, Isaaka chuan a thlarau a thlah a, upa tak, tarkûna damin a thi a, a chipuite hnênah hruaiin a awm ve ta a; tin, a fapa Esauva leh Jakoba chuan an phûm ta a.