Read Mizo_Old_version Genesis 37 Bible Online

Genesis 37 - Mizo_Old_version bible

Genesis 37

¹Tin, Jakoba chu a pa mikhualna ram, Kanaan ramah chuan a awm ta a,

²Hêng hi Jakoba thlahte chanchin a ni. Josefa chu kum sawm leh kum sarih mi a nihin, a ute nên ran rual an thlah a; ani chu naupang a la ni a, a pa nupuite Bilhaii leh Zilpaii fapate hnênah a awm a; tin, Josefa chuan an sual thuthang chu an pa hnênah a thlen a.

³Tin, Israela chuan Josefa chu a tar lam fa a nih avângin a fate zawng zawng ai chuan a hmangaih zâwk a; tichuan, kawrfual ze hrang hranga zia a siamsak a.

⁴Tin, an pa chuan ani chu a ute zawng zawng aiin a hmangaih zâwk tih a ute chuan an lo hre ta a; tichuan, ani chu an haw ta hle a, ṭawngkam ṭha rêng rêng a chungah an rawlh thei ta lo va.

⁵Tin, Josefa chuan mumang a nei a, a ute hnênah chuan a hrilh a; tichuan, ani chu an haw lehzual ta a.

⁶Tin, ani chuan an hnênah, “Khawngaih takin ka mumang hi lo ngaithla teh u:

⁷ngai teh u, lovah hian buhphalte kan lo têl a; tin, ngai teh u, ka buhphal chu a lo tho va, a ding ta luah a; tin, ngai teh u, in buhphalte chuan an rawn hual vêl a, ka buhphal chu chibai an bûk hlawm a,” a ti a.

⁸Tin, a ute chuan a hnênah, “Nang tehchai hian kan chungah ro i rêl tehlul ang maw? Nang tehchai hian kan chungah thu i nei tehlul ang maw?” an ti a. Tichuan, a mumang avâng leh a thusawi avâng chuan amah chu an haw lehzual sauh va.

⁹Tin, mumang dang a nei leh a, a ute chu a hrilh leh a, “Ngai teh u, mumang ka nei leh ta a; ngai teh u, ni te, thla te, arsi sâwm leh pakhatte khian chibai mi lo bûk zuk nia maw le,” a ti a.

¹⁰Tin, a pa chu a hrilh a, a uteho pawh; tichuan, a pa chuan a zilh a, a hnênah, “Mumang i neih hi eng mumang nge maw ni? Kei leh i nu leh i ute hian lei siin chibai kan rawn bûk tehlul dâwn che maw?” a ti a.

¹¹Tin, a uten ani chu an îtsîk a; a pa erawh chuan a thusawi chu a rilruin a vawng reng a.

¹²Tin, a ute chu Sekem-ah chuan an pa ran rual chu thlahin an kal a.

¹³Tin, Israela chuan Josefa hnênah, “I uten Sekem-ah alâwm maw ran rual chu an thlah? Lo kal teh, an hnênah ka tîr ang che,” a ti a. Tin, ani chuan a hnênah, “Mi tîr ta che,” a ti a.

¹⁴Tin, ani chuan a hnênah. “Va kal ta la, i ute chu an dam emaw, ran rualte pawh an dam emaw va chian ta la, chanchin mi rawn hrilh leh ang che,” a ti a. Chutichuan, Hebron ruam ata chu a tîr chhuak a; tin, ani chuan Sekem chu a va thleng a.

¹⁵Tin, mi tuin emaw amah chu a hmu a, ngai teh, phûlah chuan a vâk a vâk a; tichuan, mi chuan, “Eng nge i zawn le?” tiin a zâwt a.

¹⁶Tin, ani chuan, “Ka ute ka zawng a ni; khawngaih takin ran rual an thlahna chu mi hrilh teh khai,” a ti a.

¹⁷Tin, mi chuan, “Heta ṭangin an chhuah tâk kha, ‘Dothan-ah i kal ang u,’ an tih chu ka hria,” a ti a, Tin, Josefa chuan a ute chu a ûm a. Dothan-ah chuan a va hmu a.

¹⁸Tin, anni chuan hla tak aṭangin an lo hmu a; tichuan, an kiang hnai a thlen hmain amah thah thu an phiar ta a.

¹⁹Tin, “En teh u, mang neia chu a lo kal saw. Hawh u, that ila, khuarkhurum pakhatah i thlâk ang u khai; tin, ‘Sakawlhin a seh ta,’ kan ti dâwn nia; tichuan, a mangte chu engtin nge a awm kan la hre mai ang,” an ti hlawm a.

²¹Tin, Reubena chuan chu chu a lo hria a, an kut ata a chhanchhuak a; “A thah êm chu i that suh ang u,” a ti a.

²²Tin, Reubena vêk chuan a pa hnêna a hruai lehna tûrin, an kut ata chu a chhanchhuah theih nân an hnênah chuan, “Thisen chu chhuah suh u; thlalêra khuarkhurumah hian thlâk ula, kut zawng a chungah thlâk suh u,” a ti a.

²³Tin, heti hi a ni a, Josefa chuan a ute hnên a va thlen chuan, Josefa chu a kawrfual, a kawrfual ze hrang hranga zia a hâk chu an lo hlihsak a;

²⁴tin, an hruai a, khuarkhurumah chuan an thlâk ta a; khuarkhurum chu a ruak, tui awm tawh lo a ni a.

²⁵Tin, chaw ei tûrin an han ṭhu hlawm a; tin, an han dâk a, an en a; tin, ngai teh, Ismael khualzinho, Gilead ram aṭanga an sanghâwngseia englo rimtui leh thinghnai damdawi leh murra phura, Aigupta rama zuk kal tûrte an lo kal a.

²⁶Tin, Juda chuan a unaute hnênah, “Kan nau kan thaha, a thisen chhuak kan zêp chuan eng nge hnemhnânna awm ang?

²⁷Hawh u, a chunga kut thlâk lovin, Ismael-ho hnênah sâwn i hralh zâwk ang u; amah hi kan nau, kan tisa ngei a ni si a,” a ti a. Tin, a unaute chuan a thu chu an zâwm ta a.

²⁸Tin, Midian-ho sumdâwngte an lo kal a; tichuan, Josefa chu khuarkhurum ata chu an kai chhuak a, Ismael-hote hnênah chuan, Josefa chu tangka sawmhnihin an hralh ta a, Tin, Josefa chu Aigupta ramah an hruai ta a.

²⁹Tin, Reubena chu khuarkhurumah a lo kal leh a; tin, ngai teh, Josefa chu khuarkhurumah chuan a lo awm ta lo va; tichuan, a silhfênte a pawt thlêr ta a.

³⁰Tin, a naute hnênah a kal leh a, “Taitea kha a awm ta lo, kei hi khawiah nge ka kal tâk ang le aw?” a ti a.

³¹Tin, Josefa kawrfual chu an la a, kêlpa an talh a, a thi-ah chuan kawrfual chu an hnim a;

³²tin, kawrfual ze hrang hranga zia chu an thawn a, an pa hnênah chuan an rawn la a; tin, “Hei hi kan hmu ngawt a, i fapaa kawrfual a ni nge ni lo en teh,” an ti a.

³³Tin, ani chuan a lo hre mai a, “Ka fapaa kawrfual a nih hi! Sakawlhin a seh ta zuk nia le; Josefa chu matheilovin pawh sawm vekin a awm a ni ngei ang,” a ti a.

³⁴Tichuan, Jakoba chuan a silhfênte a pawt thlêr a, saiip puan a fêng a, ni rei tak a fapa chu a sûn a.

³⁵Tin, a fapate zawng zawng leh a fanute zawng zawng chu amah thlamuan tûrin an tho va; nimahsela, ani chuan thlamuan a duh lo va; “Lusûn chungin thlânah ka fapa hnênah chuan ka liam dâwn e,” a ti a. Tichuan, a pa chu amah ngaiin a ṭap ṭhîn a.

³⁶Tin, Midian-ho chuan Josefa chu Aigupta ramah an luhpui a, Pharaoa hnuaia hotu pakhat, vêngtu pâwl hotu, Potiphara hnênah chuan an hralh a.