Read Mizo_Old_version Genesis 38 Bible Online

Genesis 38 - Mizo_Old_version bible

Genesis 38

¹Chumi lai chuan heti hi a ni a, Juda chu a unaute hnên ata a chhuk a, Adulam mi pakhat a hming Hira chu a zuk bêl ta a.

²Tin, Juda chuan chutah chuan Kanaan mi pakhat a hming Sua fanu a hmu a; tin, ani chu a nei a, a pâwl ta a.

³Tichuan, a rai a, fapa a hring a; tin, Judan a hmingah chuan Era a sa a.

⁴Tin, a rai leh a, fapa a hring leh a; tin, a nuin a hmingah chuan Onana a sa a.

⁵Tin, fapa a hring leh pek a, a hmingah chuan Sela a sa a; chu mi chu a hrin lai chuan Juda chu Kezib khuaah a awm a.

⁶Tin, Juda chuan a fa tîr Era chu nupui a neihsak a, a hming chu Tamari a ni a.

⁷Tin, Juda fa tîr Era chu Lalpa mit hmuhin mi sual a ni a; tichuan, LALPAN ani chu a tihlum ta a.

⁸Tin, Juda chuan Onana hnênah, “I u nupui chu pâwl la, pasalte unau tih tûr chu tihsak la, i u tân chuan chi thlahsak rawh,” a ti a.

⁹Tin, Onana chuan chi thlah tûr chu ama thlah a ni dâwn lo tih a hria a; tichuan, heti hi a ni a, a u nupui a pâwl apiangin, a u tân chi a thlahsak lohna tûrin leiah chuan a titla ṭhîn a.

¹⁰Tin, a thiltih dân chu LALPA mit hmuhah chuan sual tak a ni a; tichuan, ani pawh chu a tihlum ta a.

¹¹Tin, Juda chuan a monu Tamari hnênah chuan, “Ka fapa Sela hi a puitlin hma loh chuan i pa in lamah pasal nei lovin lo awm rih ang che,” a ti a. “Chuti lo chuan, ani pawh hi a ute angin a thi dah ang e,” a ti a ni. Tichuan, Tamari chu a pa in lamah chuan a va awm ta a.

¹²Tin, a nakinah chuan Sua fanu Juda nupui chu a thi a; tin, Juda chuan a ngaih a lo reh a, Timna khuaah a berâm hmul mêttute hnên lamah chuan, amah leh a ṭhian Adulam mi Hira chu an chho ta a.

¹³Tin, miin Tamari chu, “I pu chu a berâm hmul mêt tûrin Timna khuaah a chho dâwn,” tiin an hrilh a.

¹⁴Tichuan, ani chuan a pasal sûnna silhfênte chu a hlîp a, inkhuhna puanin a inkhuh a, a intuam tlat a, Timna khaw kawnga Enaim kulh kawngkaah chuan a lo ṭhu a; Sela chu a puitling tawh si a, a pa chuan a nupuiah a neihsak lo zo a ni tih a hria a ni.

¹⁵Tin, Juda chuan ani chu a hmuh chuan nawhchizuarah a ruat a; a hmai a inkhuh tlat si a.

¹⁶Tichuan, kawng sira hmeichhe lam chu a va pan a, “Hawh, khawngaih takin i mu dûn ang,” a ti a; a mo kha a ni tih a hre si lo va. Tin, ani chuan, “Mi mutpui chuan eng nge mi pêk ang?” a ti a.

¹⁷Tin, ani chuan, “Ran rual zinga mi kêlno ka thawn ang che,” a ti a. Tin, ani chuan, “Chu chu i rawn thawn hmaa lo hrên tûr eng emaw tal mi pe ang em?” a ti a.

¹⁸Tin, ani chuan, “Hrên tûr eng nge ka pêk ang che?” a ti a. Tin, ani chuan, “I hming nemna leh i hrui, i tiang ken nên khân,” a ti a. Tichuan, a pe a, a mutpui ta a; tin, a lakah chuan fa a pai ta a.

¹⁹Tin, a tho va, a inkhuhna puan chu a hlîp a, a hmeithaina silhfênte chu a inbel leh ta a.

²⁰Tin, Juda chuan a thil hrên chu chu hmeichhe kut ata la tûrin a ṭhianpa, Adulam mi kutah chuan kêlno chu a thawn a; nimahsela, ani chuan amah chu a va hmu zo si lo va.

²¹Chutichuan, hmeichhe awmna hmuna mite hnênah chuan, “Kawng sîra Enaim-a nawhchizuar awm kha khawiah nge a awm tâk?” tiin a zâwt a. Tin, anni chuan, “Nawhchizuar rêng hetah an awm lo ve,” an ti a.

²²Tin, Juda hnênah chuan a kîr leh a, “Amah chu ka hmu zo lo, a hmuna mite pawhin, ‘Nawhchizuar rêng rêng hetah an awm lo,’ an ti bawk a,” a ti a.

²³Tin, Juda chuan, “Nei hlen mai rawh se; chuti lo chuan, kan mualpho dah ang e; ngai teh, he kêlno hi ka thawn a, amah i hmu zo si lo va,” a ti a.

²⁴Tin, thla thum emaw lai chinah chuan miin Juda chu, “I monu Tamari chuan tlangvâl a ngai a; chu lo pawh chu, ngai teh, sâwn a pai nghe nghe asin,” tiin an hrilh a. Tin, Juda chuan, “Hruai chhuak ula, hâl hlumin awm rawh se,” a ti a.

²⁵Tin, an hruai chhuah chuan Tamari chuan, “Hêng thil neitupa lakah hian a ni, nau ka pai ni,” tiin a pu hnênah chuan mi a tîr ta a; amah vêkin, “Khawngaih takin hêng hming nemna te, hrui te, tiang te hi tu ta nge ni, en chiang teh khai,” a ti bawk a.

²⁶Tin, Juda chuan chûng thil chu a ta a ni tih a lo hria a, “Ani chu ka aiin a fel zâwk a ni; ka fapa Sela ka neihtîr ta si lo va,” a ti a. Tin, Juda chuan ani chu a pâwl leh ta hauh lo va.

²⁷Tin, nau a vei lai chuan heti hi a ni a, ngai teh, a chhûlah chuan phîr an lo awm a.

²⁸Tin, heti hi a ni a, nau a vei chuan pakhat chuan a kut a rawn zen chhuak a; tichuan, nau chhar mi chuan, “Hei hi a chhuak hmasa zâwk a nih hi,” tiin a chelh a, a kutah chuan la sen a buntîr a.

²⁹Tin, heti hi a ni a, a kut chu a lâk luh leh lai chuan, ngai teh, a unau chu a lo chhuak ta a; tichuan, nau chhar mi chuan, “Engati nge chhuahna i insiam ni?” a ti a; chuvângin, a hmingah chuan Pereza an sa a.

³⁰Tin, chumi hnuah chuan a unau, a kuta la sen bun kha a lo chhuak leh a; a hmingah chuan Zera an sa a.