Read Mizo_Old_version Genesis 39 Bible Online

Genesis 39 - Mizo_Old_version bible

Genesis 39

¹Tin, Josefa chu Aigupta ramah an hruai chhuk a; tin, Pharaoa hnuaia hotu pakhat, vêngtu pâwl hotu, Aigupta mi, Potiphara chuan chuta rawn hruai chhuktu Ismael-hote kut ata chu a lei ta a.

²Tin, LALPA chu Josefa hnênah a awm a; tichuan, ani chu mi vânnei tak a ni a; tin, a pu Aigupta mi inah chuan a awm a.

³Tin, a pu chuan LALPA chu a hnênah a awm a, a thiltih apiang LALPAN a kutah a hlawhtlintîr tih a lo hre ta a.

⁴Tichuan, Josefa chuan a pu mit a tlung a, a rawng a bâwl ṭhîn a; tin, ani chuan a chhûngte chungah chuan hotuah a siam a, a neih zawng zawng a kutah a dah ta vek a.

⁵Tin, heti hi a ni a, inah chuan hotuah a siam a, a neih zawng zawng chunga hotua a siam achinah chuan, Josefa avângin LALPA chuan Aigupta mi chhûngte chu mal a sâwm ta a; in lam leh ram lama a neih zawng zawng chu LALPAN mal a sâwm ṭhîn a.

⁶Tichuan, a neih zawng zawng chu Josefa kutah a dah tlat a, a hnêna thil awm rêng rêng chu a hriatpui hauh lo va, ama chaw ei chauh lo chu a hre lo. Tin, Josefa chu mi tlâwntlai ṭha tak a ni a, a hmêl pawh a ṭha hle a.

⁷Tin, chûng hnuah chuan heti hi a ni a, a pu nupui chuan Josefa chu a ngaihmelh a; tin, “Mi mutpui rawh,” a ti a.

⁸Ani erawh chuan a duh lo va, a pu nupui hnênah chuan, “Ngai teh, ka pu chuan he inah hian ka hnênah eng eng nge awm a hre si lo va, a neih zawng zawng ka kutah hian a dah vek a;

⁹he inah hian ka aia lian zâwk tu mah an awm lo va; a nupui i nih avângin nangmah chauh lo chu ka lakah eng mah ui a nei hek lo; chutichuan, engtin nge he sual lian tak hi tiin Pathian chunga thil ka tihsual theih ang?” a ti a.

¹⁰Tin, heti hi a ni a, ni tin maiin Josefa chu be ṭhîn mah sela, amah mutpui lam thu emaw, ama hnêna awm lam thu emaw a pawm duh lo va.

¹¹Tin, chumi lai vêl chuan heti hi a ni a, a hna chu thawk tûrin in chhûngah a va lût a; tin, chutah chuan an in awm rêng rêng tu mah an awm lo va.

¹²Tichuan, ani chuan, “Mi mutpui rawh,” tiin a silhfênah a lo man a; tin, ani chuan a silhfên chu a kutah chuan a tlânsan a, a chhuak ta daih a.

¹³Tin, heti hi a ni a, a silhfên chu a kuta hnutchhiahin a tlân chhuak ta tih a hriat veleh,

¹⁴a in awmte chu a ko va, an hnênah, “En teh u, mi timualpho tûrin Hebrai mi pakhat kan hnêna a hruai luh tâk hi! Mi mutpui tumin ka hnênah hian a lo lût a; tichuan, aw ring takin ka au ta a.

¹⁵Tin, heti hi a ni a, aw chhuahin ring takin ka au tih a hriat veleh, ka kiangah a silhfên hi a tlânsan a, a chhuak ta daih a ni,” a ti a.

¹⁶Tin, Josefa pu a lo hâwn hma loh chuan a silhfên chu a kiangah a lo dah reng a.

¹⁷Tin, a hnênah hetiang thu hi a lo sawi a, “Hebrai chhiahhlawh kan hnêna i rawn hruai kha, mi tihmualpho tumin ka hnênah a lo lût a;

¹⁸tin, heti hi a ni a, aw chhuaha ka au veleh ka kiangah a silhfên hi hnutchhiahin a tlân chhuak ta a ni,” a ti a.

¹⁹Tin, heti hi a ni a, Josefa pu chuan a nupuiin a hnêna, “I chhiahhlawh hian heti hian mi ti,” tia a thusawi a han hriat chuan a thin a lo ur ta thut a.

²⁰Tichuan, Josefa pu chuan ani chu a hruai a, tân in, lal mi tâng phuara an awmnaah chuan a khung ta a; tichuan, chuta tân inah chuan a awm ta a.

²¹Nimahsela, LALPA chu Josefa hnênah a awm zêl a, a chungah ngil a nei a, tân in vêngtu pawh a khawngaihtîr a.

²²Tichuan, tân in vêngtu chuan tân ina tângho awm zawng zawng chu Josefa kutah a kawltîr ta vek a; tichuan, chuta an tih apiang chu Josefa chu a titu a ni zêl ṭhîn a.

²³LALPA chu Josefa hnênah a awm a, a thiltih apiang chu LALPA chuan a hlawhtlintîr ṭhin avângin, tân in vêngtu chuan a kuta thil awm rêng rêng chu a en duh ta lo va.