Read Mizo_Old_version Genesis 4 Bible Online

Genesis 4 - Mizo_Old_version bible

Genesis 4

¹Tin, Adama chuan a nupui Evi chu a pâwl a; tichuan, a rai a, Kaina a hring a, “LALPA ṭanpuiin mipa ka lo nei ta,” a ti a.

²Tin, a nau Abela a rawn hring leh a. Tin, Abela chu berâm vêngtuah a awm a, Kaina erawh chu lei lettuah a awm.

³Tin, a nakinah chuan heti hi a ni a, Kaina chuan LALPA hnêna hlan atân lova mi a rawn la a.

⁴Tin, Abela pawh chuan a berâm rual zînga piang hmasa berte leh a thau chu a rawn la bawk a. Tin, LALPA chuan Abela leh a thilhlan chu a lâwm a;

⁵Kaina leh a thilhlan erawh chu a lâwm ve lo va. Tichuan, Kaina chu a thinur êm êm a, a hmêl chu a lo dur ta khup a.

⁶Tichuan, LALPA chuan Kaina hnênah chuan, “Engati nge i thin a ur? Engati nge i hmêl a lo dur tâk?

⁷Thil i tih ṭhat chuan lawm i hlawh dâwn lo vem ni? I tih ṭhat loh erawh chuan sual chu kawngka bulah a bawk reng a ni; a duh zâwng chu nangma hnên lam a ni ang a, a chungah thu i nei tûr a ni,” a ti a.

⁸Kaina chuan a nau Abela hnênah, “Lovah i feh ang,” a ti a. Tin, heti hi a ni a, lova an awm laiin Kaina chuan a nau Abela chu a bei a, a that ta mai a.

⁹Tichuan, LALPA chuan Kaina hnênah chuan, “I nau Abela kha khawiah nge a awm tâk?” a ti a. Tin, ani chuan, “Ka hre lo. Ka nau vêngtu ka ni em ni?” a ti a.

¹⁰Tin, ani chuan, “Eng nge i tih tâk ni? I nau thisen aw chuan lei aṭangin mi au asin.

¹¹Chuvângin, lei, i kut ata i nau thisen dawng tûra a kâ lo ângtu ata hi ânchhe dawng i ni ta.

¹²Lei i leh pawhin a ṭhatna chu a pe phal tawh lo vang che. Leiah hian tlân bo leh vâkvai i lo ni tawh ang,” a ti a.

¹³Tin, Kaina chuan LALPA hnênah, “I mi hremna hi a nasa êm a, ka tuar zo lo vang.

¹⁴Ngai teh, nangin vawiinah hian lei chung ata mi hnawt chhuak ta si a, i mit hmuh phâk lohva thuhrûkin ka awm dâwn ta a; leiah hian tlân bo leh vâkvai ka lo ni dâwn ta si a; tichuan, heti hi a ni ang a, tu pawh mi hmu apiangin mi that mai ang,” a ti a.

¹⁵Tin, LALPA chuan a hnênah, “Chuti a nih chuan, tu pawh Kaina that apiang chu a leh sarihin a chungah phuba lâk a ni ang,” a ti a. Tichuan, miin amah an hmuha an thah loh nân Lalpan Kaina chu a chhinchhiah ta a.

¹⁶Tichuan, Kaina chu LALPA hnên ata chu a chhuak a, Eden chhak lama Nod ramah chuan a awm ta a.

¹⁷Tin, Kaina chuan a nupui a pâwl a; tichuan, a rai a, Enoka a hring a. Tin, khua a siam a, a khaw hmingah chuan a fapa hming chawiin Enok a ti a.

¹⁸Tin, Enoka chuan fapa Irada a nei a, Irada chuan fapa Mehujaela a nei a, Mehujaela chuan fapa Methusaela a nei a, Methusaela chuan fapa Lameka a nei a.

¹⁹Tin, Lameka chuan nupui pahnih a nei a: pakhat hming chu Adai a ni a, pakhat hming chu Zillai a ni.

²⁰Tin, Adai chuan Jabala a hring a; ani chu puan ina awm ran vulhtuho thlahtu a ni.

²¹A nau hming chu Jubala a ni a; ani chu ṭingṭang leh phênglâwng tumtuho zawng zawng thlahtu a ni.

²²Tin, Zillai pawh chuan Tubal-kaina, dâr leh thîr hriamhrei tinrêng chhertu a hring a. Tin, Tubal-kaina farnu chu Naami a ni.

²³Tin, Lameka chuan a nupuite hnênah chuan: “Adai leh Zillai-te u, ka aw hria ula; Lameka nupuite u, ka thusawi hi ngaithla rawh u. Mi tihhliam avângin mi ka that a, Mi vuak thitlin avângin tlangvâl ka that a ni.

²⁴Kaina phuba mah a leh sariha an lâk dâwn chuan, Lameka phuba chu a leh sawmsarih leh pasarihin an la ngei ngei ang,” a ti a.

²⁵Tin, Adama chuan a nupui chu a pâwl leh a; tichuan, ani chuan fapa a hring leh a, a hmingah chuan Setha a sa a: “Pathianin Abela aiah chi thlah dang mi ruatsak ta; Kaina chuan amah a that ta si a,” a ti a.

²⁶Tin, Setha chuan, amah ngei pawh chuan fapa a nei ta a; a hmingah chuan Enosa a sa a. Chumi lai chuan miten LALPA hming chu an lo lam ṭan ta a.