Read Mizo_Old_version Genesis 40 Bible Online

Genesis 40 - Mizo_Old_version bible

Genesis 40

¹Tin, chûng thil hnuah chuan heti hi a ni a, Aigupta lal uain petu leh a chhang siamtute chuan an pu Aigupta lal chu an tivui a.

²Tichuan, Pharaoa chu a chhiahhlawh hotu pahnih chungah, a uain pe hotu ber chungah leh a chhang siam hotu ber chungah chuan a thinur ta a.

³Tichuan, vêngtu pâwl hotu inah, tân in, Josefa phuara a awmnaah chuan a tântîr ta a.

⁴Tin, vêngtu pâwl hotu chuan Josefa chu anmahni a enkawltîr a; tichuan, ani chuan an rawng a bâwl ta a; tin, ni eng zât emaw lai an tâng rih a.

⁵Tin, tân ina phuara awm, Aigupta lal uain petu leh chhang siamtu chuan, an pahnihin zan khatah mumang awmze hrang ve ve an nei a.

⁶Tin, a tûk zîngah chuan Josefa chu an hnênah a va lût a, anni chu a va hmu a; tin, ngai teh, an lo lungngai hle a.

⁷Tichuan, ani chuan, “Engtizia nge vawiin chu lungngai hmêl in va pu ve?” tiin Pharaoa chhiahhlawh hotu, a pu ina tâng vete chu a zâwt a.

⁸Tin, anni chuan a hnênah “Mumang kan nei a, min hrilhfiah thei tu mah an awm si lo a ni,” an ti a. Tin, Josefa chuan an hnênah “Mumang hrilhfiahnate chu Pathian ta a ni lo vem ni? Khawngaih takin mi han hrilh teh u,” a ti a.

⁹Tichuan, uain pe hotu ber chuan a mumang chu Josefa a hrilh a, a hnênah, “Ka mumangah chuan ngai teh, ka hmaah hian grêp hrui a lo awm a;

¹⁰grêp hruiah chuan pêng pathum a awm bawk a; tin, chawr chhuak angin a lo awm a, a pârte a lo chhuak a; a pâr bâwrte chuan grêp hminte a rawn chhuah ta a.

¹¹Tin, Pharaoa no chu ka kutah hian a lo awm a; tichuan, grêp rahte chu ka lo va, Pharaoa novah chuan ka sâwr a, no chu Pharaoa kutah ka lo pe a,” a ti a.

¹²Tin, Josefa chuan a hnênah, “Hei hi a hrilhfiahna a ni: pêng pathum chu ni thum a ni.

¹³Tûn achin ni thumah Pharaoan i lu a chawi kâng ang a, i hnathawh chu a thawhtîr leh ang che; tichuan, a uain petu i nih laia i pêk dân pângngai ang khân Pharaoa no chu a kutah i pe leh dâwn a nih chu.

¹⁴Amaherawhchu, i chan ṭhat leh hunah chuan mi han hre reng la, khawngaih takin ka chungah khawngaihna rawn lantîr ang che; Pharaoa hnênah ka chanchin han sawi la, he in ata hi mi hruai chhuak ang che.

¹⁵Hebrai-ho ram ata miin a rûka an rûk bo ka ni a; he ramah pawh hian rip chhûnga mi khungna khawp eng mah ka tisual hek lo,” a ti a.

¹⁶Chhang siamtu chuan hrilhfiahna chu a ṭha tih a hriatin Josefa hnênah chuan, “Kei pawh mumang ka nei a; ngai teh, chhang vâr, fawng pathumin ka lo chhîpchhuan a.

¹⁷Tin, fawng chungnung berah chuan Pharaoa chaw, chhang siamtu siam, chi tinrêng hi a lo awm a; tin, chûng chu savaten ka fawng chhîpchhuan ata chu an lo ei noh noh va,” a ti a.

¹⁸Tin, Josefa chuan a chhâng a, “Hei hi a hrilhfiahna a ni: fawng pathum chu ni thum a ni.

¹⁹Tûn achin ni thumah chuan Pharaoan i taksa ata i lu a chawi kâng ang a, thing lêrah a khai ang che; tichuan, savaten i sa chu an ei noh noh dâwn a nih chu,” a ti a.

²⁰Tin, heti hi a ni a, a ni thum ni, Pharaoa pian champhaphâk niah chuan, ani chuan a chhiahhlawh zawng zawngte tân ruai a ṭheh a; tin, a chhiahhlawhte zinga mi uain pe hotu ber lu leh chhang siam hotu ber lu chu a chawi kâng ta a.

²¹Josefan anmahni a hrilhfiah ang takin, uain pe hotu ber chu uain petuah a ṭantîr leh a; tichuan, no chu Pharaoa kutah chuan a pe leh ta a;

²²chhang siam hotu ber erawh chu a khai hlum ta a.

²³Nimahsela, uain pe hotu ber chuan Josefa chu a hre reng ta awzâwng lo va; a theihnghilh ta mai a.