Read Mizo_Old_version Genesis 41 Bible Online

Genesis 41 - Mizo_Old_version bible

Genesis 41

¹Tin, kum hnih zet hnuah chuan heti hi a ni a, Pharaoa chuan mumang a nei a; tin, ngai teh, lui kamah hian a lo ding a.

²Tin, ngai teh, bâwngpui pasarih nalh tak tak, thau tak tak hi tui aṭang chuan an lo chhuak chho va, phairuang zîngah hian an lo tla a.

³Tin, ngai teh, bâwngpui dang pasarih pawr tak tak, chêr tak tak hi tui aṭang vêk chuan an hnuah an lo chhuak chho leh a, bâwngpui dangte kiangah lui kamah chuan an lo ding hlawm a.

⁴Tin, bâwngpui pawr tak tak, chêr tak tak chuan bâwngpui nalh tak tak, thau tak tak chu an ei zo ta mai a. Chutichuan, Pharaoa chu a ṭhangharh ta a.

⁵Tin, a han muhîl leh a, mumang a nei leh a; tin, ngai teh, buh kûng khatah hian vui sarih lian tak tak, ṭha tak tak hi an lo chhuak a.

⁶Tin, ngai teh, chumi hnuah chuan vui sarih sîn tê tê, khawchhak thli chhêm ro rim rem hi an lo chhuak leh a.

⁷Tin, vui sîn tê tête chuan vui sarih lian tak tak, ṭha tak takte chu an lem zo ta mai a. Tin, Pharaoa chu a han ṭhangharh a; tin, ngai teh, mumang a lo ni a.

⁸Tin, a tûk zingah chuan heti hi a ni a, a rilru chu a lo mangang ta hle a; tichuan, mi a tîr a, Aigupta rama mitlâk dawithiam zawng zawng leh mi fing zawng zawng chu a ko va; tin, Pharaoa chuan a mumang chu a lo hrilh hlawm a; nimahsela, Pharaoa hrilhfiah thei tu mah an awm si lo va.

⁹Chumi lai chuan uain pe hotu ber chuan Pharaoa hnênah, “Vawiinah hian ka tihsual ka hre chhuak ta.

¹⁰Pharaoa a chhiahhlawhte chungah a thinur a; tichuan, vêngtu pâwl hotu inah chuan kei leh chhang siam hotu ber chu min tântîr a.

¹¹Tin, kei leh ani chuan zan khatah mumang kan nei a, mumang awmze hrang ve ve a ni kan neih ni.

¹²Tin, chutah chuan kan hnênah vêngtu pâwl hotu chhiahhlawh, Hebrai mi, tlangvâl pakhat a awm a; tin, ani chu kan hrilh a, ani chuan kan mumangte chu min hrilhfiah ta a; kan mumang ang zia zêlin a ni min hrilhfiah ve ve ni.

¹³Tin, heti hi a ni a, min hrilhfiah ang takin a lo awm ta ngei a ni; kei chu ka hnathawh hi mi thawhtîr leh a, chhang siamtu chu khai hlum a ni ta a,” a ti a.

¹⁴Chutichuan, Pharaoa chuan Josefa chu a kohtîr ta nghâl a; tichuan, hmanhmawh takin rip ata chu an hruai chhuak ta a; tin, ani chu a inmêt fai a, a silhfên chu a thlâk a, Pharaoa hnênah chuan a va lût a.

¹⁵Tin, Pharaoa chuan Josefa hnênah, “Mumang ka nei a, a hrilhfiah thei tu mah an awm lo va; nangin mumang hi a thu i hriat chuan i hrilhfiah thei tih i chanchin hi mi sawi ka lo hria a,” a ti a.

¹⁶Tin, Josefa chuan Pharaoa chu a chhâng a, “Chu chu keimaha awm a ni lo ve; Pathianin Pharaoa chu thlamuanthlâk takin a chhâng zawk ang,” a ti a.

¹⁷Tin, Pharaoa chuan Josefa hnênah, “Ka mumangah chuan, ngai teh, lui kamah hian ka lo ding a;

¹⁸tin, ngai teh, bâwngpui pasarih thau tak tak, nalh tak tak hi tui aṭang chuan an lo chhuak chho va, phairuang zîngah hian an lo tla a.

¹⁹Tin, bâwngpui dang pasarih berh tak tak, pawr êm êm, chêr tak tak, chutiang rêng rênga chhia Aigupta ram zawng zawng pawha ka la hmuh ngai loh hi, an hnuah an lo chhuak chho leh a.

²⁰Tin, bâwngpui chêr tak tak, pawr tak takte chuan bâwngpui pasarih thau tak tak lo chhuak hmasate chu an ei zo ta mai a.

²¹Tin, an ei zawh hnu pawh chuan an ei tih an hriat chuang loh; a tîr ang bawk khân an la pawr ta reng a. Chutichuan, ka ṭhangharh ta a.

²²Tin, ka mumang dang lehah chuan, ngai teh, buh kûng khatah hian vui sarih lian tak tak, ṭha tak tak hi a lo chhuak a.

²³Tin, ngai teh, chumi hnuah chuan vui sarih vuai sil sel, sîn tê tê, khawchhak thli chhêm ro rim remte hi an lo chhuak leh a.

²⁴Tin, vui sîn tê tête chuan vui sarih ṭha tak takte chu an lem zo ta maiin ka hmu a. Tin, mitlâk dawithiamhote chu ka hrilh a; nimahsela, mi hrilhfiah thei tu mah an awm si lo va,” tiin a sawi a.

²⁵Tin, Josefa chuan Pharaoa hnênah, “Pharaoa mumang hi hmun khat a ni; Pathianin a thiltih tûr chu Pharaoa a hriattîr a nih chu.

²⁶Bâwng pasarih ṭha tak takte chu kum sarih an ni a, vui sarih ṭha tak takte chu kum sarih an ni bawk a; mumang chu hmun khat a ni.

²⁷Tin, an hnua bâwng pasarih chêr tak tak, pawr tak tak lo chhuak chhote chu kum sarih an ni a, vui sarih a sî hlîr, khawchhak thli chhêm ro rim remte nên chuan; chûng chu ṭâm kum, kum sarih tûr a ni.

²⁸Chu chu a ni Pharaoa hnêna ka sawi kha; Pathianin a thiltih tûr chu Pharaoa a hriattîr a nih hi.

²⁹Ngai teh, Aigupta ram chhûng zawng zawngah hian hausak tawntaw kum, kum sarih a lo thleng dâwn;

³⁰chumi hnuah chuan ṭâm kum, kum sarih a lo awm leh ang; tichuan, hausakna zawng zawng kha Aigupta ramah hian theihnghilh vek a ni tawh ang; ṭâm chuan ram hi a ei chhe zo vang.

³¹Hausakna kha, a zuitu ṭâm avâng chuan he ramah hian an hre tawh lo vang; a nasa hle dâwn si a.

³²Tin, mumang Pharaoa vawi hnih a neih nawntîrna chu hemi avâng hian a ni, thiltih tûr chu Pathianin a tihngheha, Pathian vêkin a thlentîr lawk dâwn avângin.

³³Chutichuan, tûnah hian Pharaoa chuan mi pakhat bengvâr tak, fing tak mai zawng chhuak sela, Aigupta ram chungah hian hotuah awmtîr rawh se.

³⁴Pharaoan chu chu ti sela; tin, ram chungah hian hotute ruat sela, hausak kum, kum sarih chhûng chuan Aigupta ram buh hi hmun ngaa ṭhena hmun khat zêl khâwm rawh se.

³⁵Tichuan, anni chuan chûng kum ṭhat kum lo thleng tûra buh zawng zawng chu lâwr khâwmin, Pharaoa hnuaia awm tûrin khuaahte la ei atân buh chhûng khâwm sela, vawng tlat rawh se.

³⁶Tichuan, ṭâm avânga ram hi a boral loh nân buh chu ṭâm kum, kum sarih Aigupta rama lo thleng tûr atân chuan he ram atân hian inrin lâwkna tûr a ni ang,” a ti a.

³⁷Tin, chu thu chu Pharaoa leh a chhiahhlawhte zawng zawng chuan ṭha an tih zâwng tak a ni a.

³⁸Tin, Pharaoa chuan a chhiahhlawhte hnênah, “Hetiang, Pathian thlarau awmna mi hi kan hmu zo dâwn em ni?” a ti a.

³⁹Tin, Pharaoa vêk chuan Josefa hnênah, “Pathianin chûng zawng zawng chu a hriattîr che avângin, nang anga bengvâr leh fing rêng rêng hi an awm lo ve.

⁴⁰Nang hi ka chhûngte chungah hotuah i awm ang a, ka khua leh tui zawng zawng hi i thu ang zêlin an awm ang; lalṭhutphaha ṭhut thu-ah chauh hian i aiin ka lal ang,” a ti a.

⁴¹Pharaoa vêk chuan Josefa hnênah, “Ngai teh, Aigupta ram zawng zawng chungah hian hotuah ka siam a che,” a ti a.

⁴²Tin, Pharaoan a kut ata a hming nemna zungbun chu a phawi a, Josefa kutah a buntîr a, puan zai sîna siam silhfênte a bel a, a nghâwngah rangkachak ṭhi a awrhtîr a.

⁴³Tin, a tawlailîr neih pahnihnaah chuan a chuantîr a; a hmaah chuan, “Ṭhingṭhi ru,” tiin an au zêl a; tichuan, Aigupta ram zawng zawng chungah chuan hotuah a siam ta a.

⁴⁴Tin, Pharaoa chuan Josefa hnênah, “Kei Pharaoa ka ni, nangma thu lo chuan Aigupta ram chhûng zawng zawngah hian tu mân an kut emaw, an ke emaw an lek lo vang,” a ti a.

⁴⁵Tin, Pharaoan Josefa hmingah chuan Zaphenath-panea a vuah a; On khaw puithiam Potiphara fanu Asenathi nupuiah a neihtîr bawk a. Tin, Josefa chu a chhuak a, Aigupta ram chu a fang ta a.

⁴⁶Tin, Josefa chu Aigupta ram lal Pharaoa hmaa a din lai chuan kum sawmthum mi a ni a. Tin, Josefa chu Pharaoa hnên ata a chhuak a, Aigupta ram zawng zawng chu a fang chhuak ta a.

⁴⁷Tin, kum ṭhat kum, kum sarih chhûng chuan lei chuan hlâwk takin buh a chhuah ṭhîn a.

⁴⁸Tin, Aigupta rama kum ṭhat kum, kum sarih lo thlenga buh zawng zawng chu a lâwr khâwm a, buh chu khuaahte chuan a chhûng khâwm ta a; khaw tinah a vêl lova buh ṭheuh chu a chhûng khâwm zêl a.

⁴⁹Tichuan, Josefa chuan buh chu tam tak, tuifinriata ṭiauvut zât laiin a chhûng khâwm rui a; a chhiar pawh chu a bâng ta hial a, chhiar sên rual a ni ta si lo va.

⁵⁰Tin, ṭâm lo thlen hma chuan Josefa chuan fapa pahnih a nei a, chu mite chu On khaw puithiam Potiphara fanu Asenathi chuan a hrinsak a ni.

⁵¹Tin, Josefan a fa tîr hmingah chuan Manasea a sa a; “Pathianin ka thawh rimna zawng zawng leh ka pa chhûngte zawng zawng chu mi theihnghilhtîr ta si a,” a ti a.

⁵²Tin, a fa pahnihna hmingah chuan Ephraima a sa a, “Pathianin ka hrehawm tuarna ramah hian chi mi thlahtîr ta si a,” a ti a.

⁵³Tin, kum ṭhat kum, kum sarih, Aigupta rama lo thleng chu a lo vei ta a;

⁵⁴tin, ṭâm kum, kum sarih tûr chu Josefa sawi ang takin a lo thleng ṭan ve ta a. Ram tinah ṭâm a lo tla ta a; Aigupta ram chhûng zawng zawngah erawh chuan ei tûr a awm a.

⁵⁵Tin, Aigupta rama mi zawng zawng chu an ṭâm veleh Pharaoa hnênah ei tûr dîlin an au va; tin, Pharaoa chuan Aigupta mi zawng zawng hnênah chuan, “Josefa hnênah kal ula; a hrilh apiang che u chu ti rawh u,” a ti a.

⁵⁶Tin, ṭâm chu lei chung zawng zawngah chuan a lo tla ta a; tichuan, Josefa chuan chhûn khâwmna in zawng zawng chu a hawng a, Aigupta mite hnênah chuan a hralh a; Aigupta ramah chuan ṭâm chu a tla nasa hle si a.

⁵⁷Tin, lei chung zawng zawngah ṭâm chu a tlâk nasat avângin, ram tina mite chu buh lei tûrin Aigupta ramah Josefa hnênah chuan an kal ṭhin a.