Read Mizo_Old_version Genesis 42 Bible Online

Genesis 42 - Mizo_Old_version bible

Genesis 42

¹Tin, Jakoba chuan Aigupta ramah buh a awm tih a lo hre ta a; tichuan, Jakoba chuan a fapate hnênah, “Engati nge in inen mai mai ni?” a ti a.

²Tin, amah vêk chuanin, “Ngai teh u, Aigupta ramah buh a awm tih ka lo hre ta; thi lova kan nun chhuah theihna tûrin chutah chuan zuk kal ula, chuta ta chu kan tân zuk lei rawh u khai,” a ti a.

³Tichuan, Josefa uteho sâwm chu Aigupta ram ata buh lei tûrin an zuk kal ta a.

⁴Josefa nau Benjamina erawh chu a ute hnênah chuan Jakoban a kaltîr ve lo va; “Tawhsual a zuk tâwk hlauh dah ang e,” a ti a ni.

⁵Tichuan, Israela fapate chu mi kalho zîngah chuan buh lei tûrin an kal ve a; Kanaan ramah pawh ṭâm a tla ve si a.

⁶Tin, Josefa chu Aigupta ram chungah chuan hotu a ni a, amah chu chumi rama mi zawng zawng hnênah a hralhtu a ni; tichuan, Josefa uteho chu an lo kal a, lei siin amah chibai an bûk hlawm a.

⁷Tin, Josefa chuan a uteho chu a lo hmu a, anni chu a lo la hre hlawm a; nimahsela, an lakah chuan chi dang angin a insiam a, ram takin a bia a; tin, an hnênah, “Khawi aṭanga lo kal nge in nih?” a ti a. Tin, anni chuan, “Buh lei tûrin Kanaan ram aṭanga lo kal kan ni,” an ti a.

⁸Tin, Josefa chuan a uteho chu a lo la hria a, anni erawh chuan ani chu an hre si lo.

⁹Tin, Josefa chuan anmahni chungchâng thu mumanga a hmuhte kha a hre chhuak a, an hnênah, “Enthlatute in nih hi! Ram ruahzia en tûrin in lo kal a nih hi le!” a ti a.

¹⁰Tin, anni chuan a hnênah, “Ka pu, ni suh e, i chhiahhlawhte hi buh lei tûra lo kal kan ni asin.

¹¹Mi pakhat fa vek kan ni; mi dik tak kan ni a, i chhiahhlawhte hi enthlatute kan ni awzâwng lo ve,” an ti a.

¹²Tin, ani chuan an hnênah, “Ka awih lo, ram ruahzia en tûra lo kal in nih hi maw,” a ti a.

¹³Tin, anni chuan, “Keini i chhiahhlawhte hi unau sâwm leh pahnih, Kanaan rama awm mi pakhat fa kan ni; tin, ngai teh, kan tlum ber chu tûnah chuan kan pa hnênah a awm a, pakhat chu a awm ta lo a ni,” an ti a.

¹⁴Tin, Josefa chuan an hnênah, “ ‘Enthlatute in ni’ ka tih che u kha, in nih ngei hi!

¹⁵Heti hian fiahin in awm ang: in tlum ber chu heta a lo kal loh chuan, Pharaoa nunna chhâlin, heta ta hi in chhuak lo vang ka ti che u a ni.

¹⁶Nangmahniah thutak a awm nge awm lo in thu fiah nân in zînga pakhat tîr ula, in nau chu rawn hruai rawh se, nangni erawh chu phuarin in lo awm rih ang; chuti lo chuan, Pharaoa nunna chhâlin, ‘Enthlatute in ni ngei mai!’ ka ti dâwn che u a ni,” a ti a.

¹⁷Tin, an za chuan ni thum a tântîr hlawm a.

¹⁸Tin, a ni thum niah chuan Josefa chuan an hnênah, “Heti hian ti ula in nung ang, Pathian ka ṭih si a:

¹⁹mi dik tak in nih chuan in unau zîngah hian pakhat phuarin awm rawh se; nangni erawh chu kal ta ula, in chhûngteho ṭâm tân chuan buh phur rawh u.

²⁰Tin, in tlum ber chu ka hnênah rawn hruai ang che u; chutichuan, in thu chu a fiah ang a, in thi dâwn lo nia,” a ti a. Tichuan, chutiang chuan an ti ta a.

²¹Tin, anni chuan, “Kan nau chunga kan thiltih kha kan thiam lo tak tak a nih hi, khawngaih tûra min ngen ṭâwk ṭâwk laia a thinlung manganzia hmu reng chunga kan ngaihthlâksak duh loh kha; chuvângin, he manganna hian min tlâkbuak a nih hi,” an inti a.

²²Tin, Reubena chuan, “ ‘Naupang chungah thil tisual suh u,’ tiin in hnênah ka sawi lo vem ni? In ngaithla duh lo a nih kha; chuvângin, ngai teh u, a thisen phuba chu an la a nih hi,” tiin anni chu a chhâng a.

²³An kârah ṭawng letlingtu a awm avângin Josefan an thusawi chu a hria tih an hre lo.

²⁴Tin, ani chuan a lehhawisan a, a va ṭap ta a; tin, an hnênah a kîr leh a, anni chu a bia a, an zing ata Simeona chu a hruai hrang a, an mit hmuhah chuan a phuar ta a.

²⁵Tin, Josefa chuan an bâwmte chu buha tikhat tûr leh an tangkate chu an ipa dah leh ṭheuh tûr leh, kalkawng atân ei tûr pe tûrin thu a pe a; tichuan, chutiang chuan an tihsak ta a.

²⁶Tin, an buh chu an sabengtungte chu an phurhtîr a, chuta ta chu an chhuak ta a.

²⁷Tin, an zînga mi pakhatin, riahbûkah a sabengtung chaw pe tûra a ip a han hawn chuan a tangka chu a hmu ta mai a; ngai teh, a ip rawng bulah chuan a lo awm ta a.

²⁸Tichuan, a unaute hnênah chuan, “Ka tangka kha an lo dah leh a nih hi maw le; ngai teh u, ka ipa hi a lo awm reng mai,” a ti a; tin, an thin a ṭhâwng zawk a, “Pathianin hetia min tih hi engtizia nge ni aw?” tiin khûr chungin an inen ta hlawm a.

²⁹Tin, Kanaan rama an pa Jakoba hnên chu an lo thleng a, an chunga thil thleng zawng zawng chu an hrilh a;

³⁰“Chumi ram hotu chuan ram takin min bia a, ram enthlatuah min puh a.

³¹Tin, keini chuan a hnênah, ‘Mi dik tak kan ni; enthlatu kan ni awzâwng lo ve.

³²Unau sâwm leh pahnih kan ni a, pa pakhat fapate kan ni vek a; pakhat chu a awm ta lo va, kan tlum ber chu tûnah hian Kanaan ramah kan pa hnênah a awm a ni,’ kan ti a.

³³Tin, chu mi, an ram hotu chuan kan hnênah, ‘Heti hian mi dik tak in ni tih ka la hria ang: in unau pakhat ka hnênah hnutchhiah ula, in chhûngteho ṭâm tân chuan buh phur ula, kal tawh rawh u.

³⁴Tin, in tlum ber chu ka hnênah rawn hruai ang che u; tichuan, enthlatu in ni lo va, mi dik tak in ni zâwk tih ka hria ang; chutichuan, in unaupa hi ka pe leh ang che u a, he ramah hian in sumdâwng dâwn nia,’ min ti a,” an ti a.

³⁵Tin, heti hi a ni a, an ipte chu an bun ruah laiin, ngai teh, an tangka fûn ṭheuh chu an ipah chuan a lo awm ta ṭheuh va! Tin, anniho leh an pa chuan an tangka fûnte chu an hmuh chuan an hlau hle a.

³⁶Tin, an pa Jakoba chuan an hnênah, “Nangni hian ka fate mi chântîr a nih hi; Josefa a awm tawh lo va, Simeona pawh a awm tawh hek lo, Benjamina lam pawh hruai bo in tum lehzêl a; chûng thil zawng zawng chuan mi tlâkbuak a nih hi,” a ti a.

³⁷Tin, Reubena chuan a pa hnênah, “I hnêna ka rawn hruai leh loh chuan ka fapate pahnih hi that mai ang che; ani chu ka kutah mi kawltîr la, i hnênah ka rawn hruai leh mai ang,” tiin a sawi a.

³⁸Nimahsela, ani chuan, “Ka fapa hi in hnênah a chhuk ve lo vang; a u a thi tawh a, amah chauh hi a ni tawh si a; in kalna kawnglakahte tawhsual a zuk tawh chuan ka lu ṭuak hi lungngaihnain thlânah in liamtîr dâwn a ni,” a ti a.