Read Mizo_Old_version Genesis 43 Bible Online

Genesis 43 - Mizo_Old_version bible

Genesis 43

¹Tin, chumi ramah chuan ṭâm a tla nasa hle a.

²Tin, heti hi a ni a, Aigupta ram ata buh an phurh chhoh kha an ei zawh chuan an pa chuan an hnênah, “Kal leh tawh ula, buh tlêm tal kan tân zuk lei leh rawh u,” a ti a.

³Tichuan, Juda chuan a hnênah, “Chu mi chuan, ‘In nau chu in hnêna a rawn tel loh chuan ka hmêl in hmu tawh lo vang,’ tiin min phût tlat a ni.

⁴Kan nau hi kan hnênah i tirh chuan buh kan zuk leisak ang che.

⁵I tirh loh erawh chuan kan zuk kal lo vang; chu mi chuan kan hnênah, ‘In nau chu in hnêna a rawn tel loh chuan ka hmêl in hmu lo vang,’ a ti miau si a,” tiin a sawi a,

⁶Tin, Israela chuan, “Eng vângin nge nau dang in la neih thute lam in hrilh khera, ka tâna ṭha lo tak in tih ni?” a ti a.

⁷Tin, anni chuan, “Chu mi chuan, ‘In pa chu a la dam em? Unau dang in la nei em?’ tiin kan chanchin leh kan laichînte chanchin min zâwt tlat si a; tichuan, chûng a thu min zawh ang zêl chu kan hrilh a ni: ‘In nau chu rawn hruai chhuk rawh u,’ a ti ang tih tu nge hre kher ang i?” an ti a.

⁸Tin, Juda chuan a pa Israela hnênah, “Taitea chu ka hnênah kaltîr rawh; tichuan, kan tho vang a, kan kal mai ang e; keini leh nang leh kan fanau tê tête pawh hi thi lova kan nun theihna tûrin.

⁹A chungchâng thu-ah hian keiman a mawh ka phur zêl ang; keima kutah ngei amah dah ang che. Ani chu i hnênah ka rawn hruai leh lohva, i hmaah hian ka dintîr leh loh chuan a mawh chu kumkhuain ka phur nâng e.

¹⁰Awm rei suh ila chuan tûnah hian a vawi hnihna pawh kan lo thleng leh tawh ngei ngei ang,” a ti a.

¹¹Tin, an pa Israela chuan an hnênah, “Chutiang a nih si chuan heti hian ti rawh u: in bâwmahte khân he rama thil ṭha ṭha ṭhenkhat - thinghnai damdawi te, khawizu te, englo rimtui te, murra te, theipilsak te, vaiumkhal te tlêm ṭheuhvin chu mi tân chuan lâwmmanah sin thlâk rawh u.

¹²Tin, tangka a leh hnih keng ula, in ip rawng bula tangka a pêk kîr che u pawh kha keng leh rawh u; a tihpalh a ni mahna.

¹³In nau pawh chu hruai ula, tho ula, chu mi hnênah chuan kal leh rawh u.

¹⁴Tichuan, in unau pakhat leh Benjamina hi a chhuahsakna tûr che uin, Pathian Engkimtitheia chuan chu mi chu khawngaihtîr che u rawh se. Tin, ka fate chu chân a nih leh ka chân mai a ni ang chu,” a ti a.

¹⁵Tichuan, anni chuan lâwmman chu an keng a, tangka chu a leh hnih an keng bawk a, Benjamina pawh an hruai a; tin, an tho va, Aigupta ramah an zuk kal a, Josefa hmaah chuan an ding leh ta a.

¹⁶Tin, Josefa chuan Benjamina an hnêna awm chu a hmuh veleh, a in enkawltu hnênah chuan, “Saw mite saw in chhûngah hruai lût la, sa talh la, buatsaih rawh; saw mite sâwn chhûnah ka hnênah chaw an ei dâwn a ni,” a ti a.

¹⁷Tichuan, ani chuan Josefa thupêk angin a ti a; Josefa inah chuan a hruai lût a.

¹⁸Tin, Josefa inah hruai luha an awm avângin an hlau va, “Kal hmasak ṭuma kan ipa tangka min pêk kîrte avâng khân a nih hi min hruai luh ni; kan chungah remchâng zawnga min beiin, keimahni leh kan sabengtungte nên hian bawih atân min man a tum a nih hi,” an ti a.

¹⁹Tin, Josefa in enkawltu kiangah chuan an va kal a, kawngka bulah chuan an bia a,

²⁰“Aw ka pu, kan lo kal hmasak ṭum khân buh lei tûr ngawta lo chhuk kan ni a;

²¹tin, heti hi a ni a, riahbûk kan thlen chuan kan ipte chu kan han hawng a; tin, ngai teh, kan tangka ṭheuh chu kan ip rawng bulah a lo awm ta ṭheuh va, kan tangka chu a bûk ngai thênin a lo awm a; tichuan, kan rawn keng leh a ni.

²²Tin, buh leina tûrin tangka dang pawh kan rawn keng a; kan tangka chu tuin nge kan ipah dah kan hre si lo,” an ti a.

²³Tin, ani chuan, “Thlamuang takin awm ula, hlau suh u; in Pathian, in pa Pathian chuan in ipahte chuan ro a pe che u a nih chu; in tangka kha ka hmu si a,” a ti a. Tin, Simeona chu an hnênah a rawn hruai chhuahsak ta a.

²⁴Tin, anni chu Josefa in chhûngah a hruai lût a, tui a pe a, an ke an sil ta a; an sabengtungte pawh chu chaw a pe bawk a.

²⁵Tin, an lâwmman ken chu Josefa chawfâka a lo kal hmain an lo buatsaih lâwk a; chutah chuan chaw an ei dâwn tih an hre si a.

²⁶Tin, Josefa chu ina a lo hâwn veleh, an kuta lâwmman awm chu in chhûngah a hnênah an keng lût a, lei siin chibai an bûk hlawm a.

²⁷Tin, ani chuan an chanchin a zâwt a, “In pa, a chanchin in sawi putar kha, a dam lai a ni em? Nungdamin a la awm em?” a ti a.

²⁸Tin, anni chuan, “Kan pa, i chhiahhlawh chu a dam lai a ni a, nungdamin a la awm e,” an ti a. Tin, an lu an kûn a, chibai an bûk leh a.

²⁹Tin, ani chu a dâk a, a nau Benjamina, a nu fapa chu a hmu a, “Kha kha in tlum ber, a chanchin mi hrilha kha em ni?” a ti a. Tin, amah vêkin, “Ka fapa, Pathianin khawngaih che rawh se,” a ti a.

³⁰Tin, Josefa chuan a nau a hmuh chuan a lung a chhiat tâk êm avângin, hmanhmawh takin ṭahna hmun a zawng ta thuai a, a pindan chhûngah a lût a, chutah chuan a ṭap chhuak ta a.

³¹Tin, a hmai a phih a, a va chhuak leh a, a insûm hrâm hrâm a, “Chaw ei siam rawh u,” a ti a.

³²Tichuan, ama tân a hrangin, anniho tân a hrangin, Aigupta mi a eipuiteho tân a hrangin an siam ta a (Aigupta-hovin Hebrai-ho chu an eipui thei si lo; chutiang tih chu Aigupta-ho tân chuan a thiang lo a ni).

³³Tichuan, upa ber chu fa tîr nihna angin, naupang ber chu a tlum ber nihna angin Josefa hmaah chuan an ṭhu zêl a; chutichuan, mak an ti hlawm ṭheuh va.

³⁴Tin, Josefa chuan a hnêna mi chanvote chu an hnênah a hlan chhâwntîr a, Benjamina chanvo phei chu an chanvo zawng zawng ai chuan a leh ngain a tam bîk a ni. Tin, uain te an in a, a hovin an hlim ta hle a.