Read Mizo_Old_version Genesis 44 Bible Online

Genesis 44 - Mizo_Old_version bible

Genesis 44

¹Tin, ani chuan a in enkawltu hnênah chuan, “Kha mite ip kha an phurh theih tâwkin buhin tikhat la, an tangka ṭheuh chu an ip rawng bulah dah ṭheuh rawh.

²Tin, ka no, tangkaraw no kha, an naupang ber ip rawng bulah dah rawh, a buh man tangka nên khân,” tiin thu a pe a. Tichuan, ani chuan Josefa thusawi ang chuan a ti ta a.

³Tin, khua a vâr veleh anni chu an sabengtungte nên chuan an kaltîr ta a.

⁴Tin, khua ata an kal chhuak chu an la thlen hlat hmain Josefa chuan a in enkawltu hnênah, “Tho la, mite kha va ûm rawh; tin, i ûm phâk veleh an hnênah, ‘Engtizia nge thil ṭha thil ṭha lova in rulh ni?

⁵Kha kha ka pu uain inna leh aienna ngei a ni lo vem ni? Hetiang in tih hi in tisual a ni,’ ti rawh,” a ti a.

⁶Tin, a ûm phâk a, chûng thu chu an hnênah a sawi a.

⁷Tin, anni chuan a hnênah, “Ka pu, engtizia nge ni hetiang thu i sawi? I chhiahhlawhte hian chutiang thil kan tih loh tûrzia mai chu.

⁸Ngai teh, kan ip rawng bula tangka kan hmuhte pawh kha Kanaan ram aṭangin i hnênah kan rawn ken leh kha. Engtin nge i pu ina mi tangkarua emaw, rangkachak emaw kan rûk theih ang le?

⁹I chhiahhlawhte zîngah hian tu pawh i hmuhna apiang chu thi rawh se, keini pawh kan pu bawihah kan awm mai ang e,” an ti a.

¹⁰Tin, ani chuan, “Aw le, in thu ang zêl chuan ni ang hmiang; amaherawhchu, tu pawh ka hmuhna apiang chu ka bawihah a awm ang a, nangni erawh chu sawisêl bovin in awm ang,” a ti a.

¹¹Chu veleh chuan hmanhmawh takin mahni ip chu leiah an la thla ṭheuh va, mahni ip chu an hawng ṭheuh bawk a.

¹²Tin, ani chuan an upa berah a ṭan a, an naupang ber thlengin a zawng a; tichuan, no chu Benjamina ipah chuan a hmu ta a.

¹³Chu veleh chuan an silhfênte chu an pawt thlêr a, mahni sabengtung chu an phurhtîr leh ṭheuh va, khuaah chuan an kîr leh ta a.

¹⁴Tin, Juda leh a unaute chuan Josefa in chu an va thleng a, ani chu chutah chuan a lo la awm cheu va; tin, a hmaah chuan an bawkkhup ta hlawm a.

¹⁵Tin, Josefa chuan an hnênah, “Eng thil nge ni in tih tâk ni? Keimah ang mi hian ai an en thiam ngei ang tih in hre lo vem ni?” a ti a.

¹⁶Tin, Juda chuan, “Ka pu, i hnênah eng nge kan sawi tâk ang? Eng nge kan hrilh ang? Engtin nge kan insawi ven tâk ang le? Pathianin i chhiahhlawhte sualna chu a hmuchhuak ta a nih hi; ngai teh, ka pu, i bawihte kan nih tâk hi, keimahni leh a kuta no an hmuhna pawh hi,” a ti a.

¹⁷Tin, ani chuan, “Chutiang chuan ka tih loh tûrzia mai chu; a kuta no an hmuhna chauh hi ka bawihah a awm ang. Nangni erawh zawng thlamuang takin in pa hnênah han kal rawh u,” a ti a.

¹⁸Chu veleh Juda chuan Josefa chu a va hnaih a, “Aw ka pu, khawngaih takin, ka pu, i chhiahhlawh hi i beng hriatah thu kam khat mi sawitîr la, i thinur chu i chhiahhlawh chungah hian alhtîr suh ang che; nang zawng Pharaoa ang mai i ni si a.

¹⁹Ka pu, nangin, ‘Pa emaw, unau emaw in nei em?’ tiin i chhiahhlawhte hi min zâwt a.

²⁰Tin, ka pu, keinin i hnênah hian, ‘Pa putar tak leh a tar lam fa, naupang tê kan nei a; chu mi u chu a thi a, a nu hrinah chuan amah chauh chu a la awm a, a pa chuan amah chu a hmangaih hle mai,’ kan ti a.

²¹Tin, nangin i chhiahhlawhte hnênah hian, ‘Amah chu ka mita ka hmuh theih nân ka hnênah rawn hruai thla rawh u,’ i ti a.

²²Tin, ka pu, keinin i hnênah, ‘Taitea chuan a pa a kalsan thei lo vang; a pa a kalsan zawngin a pa chu a thi mai dâwn si a,’ kan ti a.

²³Tin, nangin i chhiahhlawhte hnênah hian, ‘In tlum ber chu in hnêna a lo chhuk ve loh chuan ka hmêl in hmu leh tawh lo vang,’ i ti a.

²⁴Tin, heti hi a ni a, i chhiahhlawh ka pa hnên kan han thlen chuan, ka pu, i thu chu kan hrilh a.

²⁵Tin, kan pa chuan, ‘Kal leh tawh ula, buh tlêm tal kan tân zuk lei leh rawh u,’ a ti a.

²⁶Tin, keinin, ‘Kan zuk kal thei tawh lo vang; kan tlum ber hi kan hnêna a tel ve erawh chuan kan zuk kal mai ang; kan tlum ber hi kan hnêna a tel loh chuan chu mi hmêl chu kan hmu thei dâwn lo a ni,’ kan ti a.

²⁷Tin, i chhiahhlawh ka pa chuan kan hnênah, ‘Ka nupui chuan fapa pahnih mi hrinsak tih in hria e;

²⁸tin, a pakhat chu ka hnên ata a kal chhuak a, pawh sawm vekin a awm a ni ngei ang, ka ti a; chumi achinah chuan amah chu ka hmu ta lo vang vang a;

²⁹tichuan, he mi pawh hi ka hnên ata in hruai bova, tawhsual a zuk tawh chuan ka lu ṭuak hi lungngaihnain thlânah in liamtîr dâwn a ni,’ a ti a.

³⁰Chutichuan, Taitea hi kan hnêna tel lova i chhiahhlawh ka pa hnên ka han thlen chuan, a nunna chu Taitea nunna nên a inzawm tlat avângin,

³¹heti hi a ni ang a, Taitea hi a tel ve lo tih a hriat veleh a thi mai ang; tichuan, i chhiahhlawhte hian i chhiahhlawh kan pa lu ṭuak chu lungngaihnain thlânah kan liamtîr dâwn a nih hi.

³²I chhiahhlawh hian, ‘I hnêna ka rawn hruai leh loh chuan a mawh chu kumkhuain ka pa lakah ka phur ang,’ tiin, ka pa lakah chuan Taitea chungchâng thu-ah hian a mawhphurtuah ka insiam tawh si a.

³³Chutichuan, khawngaih takin i chhiahhlawh hi Taitea aiah, ka pu, i bawihah mi awmtîr la, Taitea hi a ute hnênah chhohtîr ang che.

³⁴Taitea ka hnêna tel lovin ka pa hnênah engtin nge ka chhoh theih ang? Ka pa chunga chhiatna thleng tûr chu ka hmu ang asin,” a ti a.