Read Mizo_Old_version Genesis 46 Bible Online

Genesis 46 - Mizo_Old_version bible

Genesis 46

¹Tin, Israela chu a neih zawng zawng nên a chhuak a, Beer-seba chu a thleng a, a pa Isaaka Pathian hnênah chuan inthawinate a hlân a.

²Tin, Pathianin zâna a mumangahte chuan Israela chu a bia a, “Jakob, Jakob!” a ti a. Tin, ani chuan, “Heta hi ka awm,” a ti a.

³Tin, ani chuan, “Kei Pathian, i pa Pathian chu ka ni; Aigupta rama zuk kal chu hlau suh, chutah chuan chi ropui takah ka siam dâwn che a ni.

⁴Aigupta ramah chuan i hnênah ka zuk kal ve ang a, ka hruai chho leh ngei ngei bawk ang che; tin, Josefa chuan i thih hunah i mit a siamsak dâwn che nia,” a ti a.

⁵Tichuan, Jakoba chu Beer-seba aṭang chuan a chhuak a; Israela fapate chuan an pa Jakoba leh an fanau tê tête leh an nupuite chu a chuan nâna Pharaoa tawlailîr thawnahte khân an chuantîr a.

⁶Tichuan, Jakoba leh a thlahte zawng zawng chuan Kanaan rama an dehchhuah an rante leh an bungruate chu an chhawm a, Aigupta ram chu an thleng ta a;

⁷a fapate, a tupate, a fanute, a tunute, a thlahte zawng zawng chu Aigupta ramah chuan a luhpui ta hlawm a.

⁸Tin, hêng hi Israela thlah Aigupta rama lût, Jakoba leh a fapate hming chu a ni: Reubena, Jakoba fa tîr chu.

⁹Tin, Reubena fapate chu Hanoka te, Palua te, Hezrona te, Karmia te an ni a.

¹⁰Tin, Simeona fapate chu Jemuela te, Jamina te, Ohada te, Jakina te, Zohara te, Kanaan hmeichhe laka a fapa Saula te an ni a.

¹¹Tin, Levia fapate chu Gersona te, Kohatha te, Meraria te an ni a.

¹²Tin, Juda fapate chu Era te, Onana te, Sela te, Pereza te, Zera te an ni a; Era leh Onana erawh chu Kanaan ramah chuan an thi ta a ni. Pereza fapate chu Hezrona leh Hamula an ni a.

¹³Tin, Isakara fapate chu Tola te, Puva te, Ioba te, Simrona te an ni a.

¹⁴Tin, Zebuluna fapate chu Sereda te, Elona te, Jahleela te an ni a.

¹⁵Chûngho zawng zawng chu Leaii fapa, a fanu Dinaii nên, Paddan-aram rama Jakoba a hrinsakate chu an ni a; a fapate leh a fanute zawng zawng chu sawmthum leh pathum an ni a.

¹⁶Tin, Gada fapate chu Ziphiona te, Hagia te, Sunia te, Ezbona te, Eria te, Arodia te, Arelia te an ni a.

¹⁷Tin, Asera fapate chu Imna te, Isva te, Isvia te, Beria te an ni, an farnu Seri nên; tin, Beria fapate chu Hebera leh Malkiela an ni a.

¹⁸Chûngho chu Zilpaii, Labanan a fanu Leaii hnêna a pêka fapate chu an ni, chûngho chu Jakoba a hrinsak a, mi sâwm leh parukte chu.

¹⁹Tin, Jakoba nupui Rakili fapate chu Josefa leh Benjamina an ni a.

²⁰Tin, Josefa chuan Aigupta ramah fapa Manasea leh Ephraima a nei a, chu mite chu On khaw puithiam Potiphara fanu Asenathi chuan amah a hrinsak a ni.

²¹Tin, Benjamina fapate chu Bela te, Bekera te, Asbela te, Gera te, Naamana te, Ehia te, Rosa te, Mupima te, Hupima te, Arda te an ni a.

²²Chûngho chu Rakili fapa, Jakoba a hrinsakte chu an ni; an za chuan sâwm leh pali an ni.

²³Tin, Dana fapa chu Husima a ni a.

²⁴Tin, Naphtalia fapate chu Jazeela te, Gunia te, Jezera te, Silema te an ni a.

²⁵Chûngho chu Bilhaii, Labanan a fanu Rakili hnêna a pêka fapate chu an ni, chûngho chu Jakoba a hrinsak a; an za chuan pasarih an ni.

²⁶Jakoba fapate nupuiho chhiar lovin, Jakoba hnêna Aigupta rama lût ve, a ṭhâlbea chhuak zawng zawngte chu an za chuan sawmruk leh paruk an ni a;

²⁷tin, Josefan Aigupta rama fapa a neihte chu pahnih an ni. Jakoba chhûngte zawng zawng Aigupta rama lûtte chu sawmsarih an ni.

²⁸Tin, Jakoba chuan Gosen ram lam kawng lo kawhhmuh tûrin Juda chu Josefa hnênah a kal hmasaktîr a; tichuan, Gosen ramah chuan an lût ta a.

²⁹Tin, Josefa chuan a tawlailîr chu a buatsaih a, Gosen ramah chuan a pa Israela hmuak tûrin a han kal ta a; tin, a hnênah a inhriattîr a, a ir a chuktuah a, rei fe a ir chuktuahin a ṭap a.

³⁰Tin, Israela chuan Josefa hnênah, “Nungdama i lo la awma, i hmêl ka hmuh leh tâk avâng hian tûnah chuan duh leh thi tawh rawh i,” a ti a.

³¹Tin, Josefa chuan a unaute leh a pa chhûngte hnênah, “Ka han kal ang a, Pharaoa ka hrilh ang a, a hnênah, ‘Ka unaute leh ka pa chhûngte, Kanaan rama awmte kha, ka hnênah an lo thleng ta;

³²anni chu ran vulhtute an nih avângin berâm vêngtute an ni a; an berâm rualte leh an bâwng rualte leh an neih zawng zawng an rawn chhawm vek a ni,’ tiin ka han sawi ang.

³³Tin, heti hi a ni ang a, Pharaoan a koh che ua, ‘Eng hna nge in thawh ṭhin?’ a tih hunah chuan,

³⁴nangnin, ‘I chhiahhlawhte hi kan thlahtute chenin, kan naupan têt ata tûn thlengin ran vulhtute kan ni,’ ti ang che u; chutichuan, Gosen ramah in awm thei dâwn nia,” a ti a. Berâm vêngtute rêng rêng chu Aigupta mite ten zâwng tak an ni si a.