Read Mizo_Old_version Genesis 47 Bible Online

Genesis 47 - Mizo_Old_version bible

Genesis 47

¹Tichuan, Josefa chuan Pharaoa chu a han hrilh a, a hnênah, “Ka pa te, ka unau te, an berâm rual te, an bâwng rual te, an neih zawng zawngte nên Kanaan ram ata an lo thleng thla ta a; tin, ngai teh, Gosen ramah an awm,” a ti a.

²Tin, a unaute zînga mi, mi panga a hruai a, Pharaoa chu a hriattîr a.

³Tin, Pharaoa chuan a unaute hnênah, “Eng hna nge in thawh ṭhin?” a ti a. Tin, anni chuan Pharaoa hnênah, “I chhiahhlawhte hi kan thlahtute chenin, berâm vêngtute kan ni,” an ti a.

⁴Tin, anni vêk chuan Pharaoa hnênah, “He rama awm rih tûr hian kan lo kal a ni, kan ramah i chhiahhlawhteho berâm rualte tân ei tûr a awm ta si lo; ṭâm hi Kanaan ramah a tla nasa hle si a; chutichuan, khawngaih takin i chhiahhlawhte hi Gosen ramah min awmtîr ang che,” an ti a.

⁵Tin, Pharaoa chuan Josefa a bia a, “I pa leh i unaute chu i hnênah an lo kal ta a.

⁶Aigupta ram chu a awm duai alâwm; i pa leh i unaute chu ram ṭha lai apiangah hian awmhmun khuartîr ta che; Gosen ramah awmhmun khuar rawh se. Tin, an zîngah mi thiltithei tak hriat i neih phei chuan ka ran chunga hotuahte siam ang che,” a ti a.

⁷Tin, Josefa chuan a pa Jakoba chu a hruai lût a, Pharaoa hmaah chuan a dintîr a; tichuan, Jakoba chuan Pharaoa chu mal a sâwm ta a.

⁸Tin, Pharaoa chuan Jakoba hnênah, “Kum eng zât nge i nih tawh?” a ti a.

⁹Tin, Jakoba chuan Pharaoa hnênah, “Ka khualzin kum chin chu kum za leh kum sawmthum a ni a; ka dam chhûng kumte hi a tlêmin a hrehawm a ni, mi thlahtute an khualzin laia an dam chhûng kum pawh a zât ve hek lo,” a ti a.

¹⁰Tin, Jakoba chuan Pharaoa chu mal a sâwm leh a, Pharaoa hnên ata chu a chhuak ta a.

¹¹Tichuan, Josefa chuan a pa leh a unaute chu awmhmun a khuartîr a, Pharaoa thupêk angin Aigupta rama ram ṭha ber laiah, Rameses ramah chuan ro atân ram a pe ta a.

¹²Tin, Josefa chuan a pa leh a unaute leh a pa chhûngte zawng zawng chu an chhûngkua ang zêlin ei tûr a pe a, a châwm ta a.

¹³Tin, chumi ram zawng zawngah chuan ei tûr rêng rêng a awm ta lo va; ṭâm a tla nasa êm êm si a; chutichuan, ṭâm avâng chuan Aigupta ram leh Kanaan ram chu a chau ta a.

¹⁴Tin, Josefa chuan an buh leina manah, Aigupta ram leh Kanaan rama tangka awm zawng zawng chu a khâwm ta vek a; tin, Josefa chuan chu tangka chu Pharaoa inah chuan a la ta a.

¹⁵Tin, Aigupta ram leh Kanaan rama tangka zawng zawng an deh ral zawh chuan, Aigupta mi zawng zawng chu Josefa hnênah an lo kal a, “Ei tûr min pe rawh khai; i hmaah hian kan thi mai dâwn em ni ang le? Tangka lah a awm tawh si lo,” an ti a.

¹⁶Tin, Josefa chuan, “In rante rawn pe mai rawh u; tangka a awm tawh loh chuan in ran manah ei tûr ka pe ang che u,” a ti a.

¹⁷Tichuan, an rante chu Josefa hnênah an hruai a; tin, Josefa chuan chûng sakawr manah te, berâm rual manah te, bâwng rual manah te, sabengtung manah te chuan ei tûr a pe zêl a; chumi kum chuan an ran zawng zawng manah ei tûr a pe a, a châwm ta hlawm a.

¹⁸Tin, chumi kum a veia, kum lo thar lehah chuan a hnênah an lo kal leh a, a hnênah, “Kan tangka zawng zawng kan deh ral tawhzia leh, ka pu, kan ran rualte i ta a nih tawhziate hi, ka pu, i lakah hian kan zêp lo vang; ka pu, i mit hmuhah hian kan taksa leh kan ramte chauh lo chu eng mah a awm tawh hauh lo mai.

¹⁹I hmaah hian keini leh kan ram hi kan boral mai dâwn em ni ang le? Keimahni hi kan ram chawpin ei tûrin min lei rawh; tichuan, keini leh kan ram hi Pharaoa chhiahhlawhte kan ni mai ang e; tin, thi lova nungdama kan awm theihna tûr leh, ram hi a ṭiau lohna tûrin buh chi min pe ang che,” an ti a.

²⁰Tichuan, Josefa chuan Pharaoa tân Aigupta ram zawng zawng chu a lei ta a; ṭâm chu an chunga a thlen nasat êm avângin Aigupta mite chuan an lo chu an hralh ṭheuh si a; tichuan, ram chu Pharaoa ta a ni ta vek a.

²¹Mihringte chu Aigupta ramri lehlam tâwp aṭanga a lehlam tâwp thlengin, khuaahte chuan a insawntîr ta hlawm a.

²²Puithiamho ram chauh a lei lo va; puithiamhote chuan Pharaoa lakah chanvo an nei a, Pharaoan an chanvo a pêk chu an ei ṭhîn a ni; chuvângin, an ram chu an hralh ve lo va.

²³Chumi hnuah chuan, Josefan mite hnênah chuan, “Ngai teh u, vawiinah hian nangniho hi in ram chawpin Pharaoa tân ka lei ta che u a; hei, heta hi in tân buh chi a awm hi, leiah chîng ang che u.

²⁴Tin, buh lâk hunah te chuan heti hi a ni ang a, Pharaoa tân hmun ngaa ṭhena hmun khat zêl in pe ang a, a hmun li chu nangmahni ta a ni ang, chu chu lova chîn lehah te, nangmahni leh in chhûngte eiah te, in fanau tê tête eiah te a ni ang,” a ti a.

²⁵Tin, anni chuan, “Nangin kan nun hi i chhanhim tawh a; ka puin min khawngaih sela, Pharaoa chhiahhlawhte kan ni mai ang,” an ti a.

²⁶Tichuan, Josefa chuan Pharaoan hmun ngaa hmun khat a hmuh zêl tûr thu hi, Aigupta ram tân tûn thlengin dânah a siam ta; puithiamho ram chauh chu a ni, Pharaoa ta ni lo chu.

²⁷Tin, Israel-ho chuan Aigupta rama Gosen ramah chuan awmhmun an khuar ta a; chutah chuan an intimuk a, chi tam tak an thlah a, nasa takin an pung ta a.

²⁸Tin, Jakoba chu Aigupta ramah chuan kum sâwm leh kum sarih a awm a; chutichuan, Jakoba dam chhûng chu kum za leh kum sawmli leh kum sarih a ni ta a.

²⁹Tin, Israela thih hun tûr chu a lo hnai ta a; tichuan, a fapa Josefa chu a ko va, a hnênah, “I mit ka tlun chuan khawngaih takin i kut kha ka malpui hnuaiah rawlh la, mi khawngaihin ka chungah tihtakzetin ti ang che; khawngaih takin Aigupta ramah hian mi phûm lul suh ang che;

³⁰mi thlahtute hnêna ka muthilh hunah chuan nangin Aigupta ram ata hi mi zâwn chhuakin, anmahni phûmna hmunah chuan mi phûm zâwk tûr a ni,” a ti a. Tin, ani chuan, “I sawi ang hian ka rawn ti ang e,” a ti a.

³¹Tin, ani chuan, “Ka hnênah chhia chham rawh le,” a ti a; tichuan, a hnênah chhia a chham ta a. Tin, Israela chu khum lu siin a kûn ta a.