Read Mizo_Old_version Genesis 48 Bible Online

Genesis 48 - Mizo_Old_version bible

Genesis 48

¹Tin, chûng hnuah chuan heti hi a ni a, Josefa hnênah, “Ngai teh, i pa a damlo ve,” an ti a. Tichuan, a fapate pahnih Manasea leh Ephraima chu a hnênah a hruai ve a.

²Tin, Jakoba hnênah “Ngai teh, i fapa Josefa i hnênah a lo kal e,” tiin an hrilh a; tichuan, Israela chu a intiharh a, khumah chuan a ṭhu ta a.

³Tin, Jakoba chuan Josefa hnênah, “Pathian Engkimtitheia chu Kanaan rama Luz khuaah chuan ka hnênah a inlâr a, mal mi sâwm a,

⁴ka hnênah, ‘Chi tam tak ka thlahtîr ang chia, ka tipung bawk ang chia, chi hrang hrang awm khâwmah ka siam ang che; tin, he ram hi i hnua i thlahte hnênah chuan kumkhaw ro atân ka pe ang,’ mi ti a.

⁵Tin, i fapate pahnih, Aigupta rama i hnêna ka lo kal hmaa Aigupta rama i neihte hi ka ta an ni; Ephraima leh Manasea hi, Reubena leh Simeona ang bawkin ka ta an ni ang.

⁶Tin, he mite hnua fa i neihte chu i ta an ni ang, an ro chanah chuan an ute hming chu an ṭâwm mai ang.

⁷Tin, keia thu zawng, Paddan-aram aṭanga ka lo kal lai khân Rakili chu Kanaan ramah, kawnglakah, Ephrath khua chu a la hlat fe laiin ka bulah a thi a; chuta Ephrath khaw kawngah chuan ka phûm ta a (chu chu Bethlehem khua a ni),” a ti a.

⁸Tin, Israela chuan Josefa fapate chu a en a, “Heng hi tute nge ni?” a ti a.

⁹Tin, Josefa chuan a pa hnênah, “Hêng hi ka fapa, Pathianin heta mi pêkate chu an ni,” a ti a. Tin, ani chuan, “Khawngaih takin ka hnênah hian han hruai hnai rawh; tichuan, anmahni mal ka lo sâwm ang e,” a ti a.

¹⁰Israela mit chu a upat avângin a fiah lo va, a hmu thei lo a ni. Tin, anni chu a han hruai hnai a; tin, ani chuan a lo fâwp a, a lo pawm a.

¹¹Tin, Israela chuan Josefa hnênah, “I hmêl hmuh hi ka beisei tawh lo va; nimahsela, ngai teh, Pathianin i thlahte hmêl lam pawh mi hmuhtîr ta a nih hi,” a ti a.

¹²Tin, Josefa chuan anni chu a pa kapkâr ata chu a kai chhuak a, a hmaia lei siin chibai a bûk a.

¹³Tin, Josefa chuan an pahnih chuan a kai a, Ephraima chu a kut ding lamin Israela kut vei lampangah a kai a, Manasea chu a kut vei lamin Israela kut ding lampangah a kai a, a rawn hruai hnai a.

¹⁴Tin, Israela chuan a ban kawkalh lui a, a kut ding lam chuan a ban a, Ephraima, a naupang zâwk chhîpah a nghat a; Manasea chu fa tîr a ni si a.

¹⁵Tin, Josefa chu mal a sâwm a, “Mi thlahtu Abrahama leh Isaaka, a hmaa an awm ṭhinna Pathian, vawiin thlenga ka dam chhûng zawng zawnga mi châwmtu Pathian,

¹⁶sual zawng zawng laka mi tlantu vântirhkoh chuan naupangte hi malsâwm rawh se; tin, ka hming leh mi thlahtu Abrahama leh Isaaka hming chu anmahni hmingah pu rawh se; tin, khawvêl lailiah mipui tam tak ni tûrin lo pung rawh se,” a ti a.

¹⁷Tin, Josefa chu, a pain a kut ding lam Ephraima chhîpa a nghat chu a hmuhin a lungni ta lo va; tichuan, a pa kut chu Ephraima chhîp ata Manasea chhîpa sawn tûrin a chawi kâng a.

¹⁸Tin, Josefa chuan a pa hnênah, “Ka pa, hetiang tûr a ni lo, hei hi asin fa tîr chu ni; i kut ding lam hi a chhîpah nghat zâwk rawh,” a ti a.

¹⁹Nimahsela, a pa chuan a duh lo va, “Ka hria e, ka fapa, ka hria e; ani pawh hnama sawi thamin a awm bawk ang a, ani pawh a ropui bawk ang; amaherawhchu, a nau hi a aiin a ropui zâwk ang a, a thlahte pawh chi hrang hrang tam tak an lo la ni ang,” a ti a.

²⁰Tichuan, Jakoban, “Israel-ho chuan, ‘Ephraima leh Manasea angin Pathianin awmtîr che rawh se,’ tiin mangmahni hming lamin mal an sâwm ṭhin ang,” tiin, chumi ni chuan anni chu mal a sâwm a; tichuan, Ephraima chu Manasea hmaah a awmtîr ta a.

²¹Tin, Israela vêk chuan Josefa hnênah, “Ngai teh, ka thi dâwn ta e; nimahsela, Pathian chu in hnênah a awm ang a, in thlahtute ramah chuan a hruai leh ang che u.

²²Chumi lo pawh chu, i unaute chanvo aiin chan khatin ka pe chuang a che, ka khandaih leh ka thalngula Amor-ho kut ata ka lâksaka kha,” a ti a.