Read Mizo_Old_version Genesis 50 Bible Online

Genesis 50 - Mizo_Old_version bible

Genesis 50

¹Tin, Josefa chuan a pa hmai a si a, a ṭah a, a fâwp a fâwp a.

²Tin, Josefa chuan a chhiahhlawh damdawi thiamhote chu a pa ruang ṭawih thei lova siam tûrin thu a pe a; tichuan, damdawi thiamhote chuan Israela ruang chu ṭawih thei lovin an siam ta a.

³A ruang siam chhûng chuan ni sawmli a awh a, ṭawih thei lova siamna chuan ni chuti zât chu a awh ṭhîn rêng a ni; tin, ni sawmsarih chhûng zawng Aigupta-ho chuan amah chu an ṭah a.

⁴Tin, amah an ṭah nite chu a ral hnu chuan Josefan Pharaoa chhûngte chu a bia a, “I mit ka tlun chuan, khawngaih takin Pharaoa beng hriatah chuan,

⁵‘Ka pan, “Ngai teh, ka thi dâwn ta e; Kanaan rama thlân ka laih saah, chutah ngei chuan mi rawn phûm ang che,” tiin chhia mi chhamtîr a. Chutichuan, khawngaih takin ka pa hi mi han phûmtîr ang che; tin, ka lo kal leh mai ang, a ti e,’ tiin sawi rawh u,” a ti a.

⁶Tichuan, Pharaoa chuan, “Chhia a chhamtîr che ang chuan i pa chu han phûm ta che,” a ti a.

⁷Tichuan, Josefa chu a pa phûm tûrin a han kal ta a; tin, Pharaoa chhiahhlawh zawng zawng, a chhûngte zînga upate leh Aigupta ram upa zawng zawng leh,

⁸Josefa chhûngte zawng zawng leh a unaute leh a pa chhûngte chu a hnênah an han kal ve a. An fanau tê tête leh, an berâm rualte leh an bâwng rualte chauh chu Gosen ramah chuan an hnutchhiah a.

⁹Tin, an hnênah tawlailîrte, sakawr chung chuang mite an han kal ve a; tichuan, pâwl lian tak mai an ni.

¹⁰Tin, Jordan lui râla Atada hruihzâwl chu an thleng a, chutah chuan nasa takin an ṭah chiam a: ni sarih a pa sûnna a siam a.

¹¹Tin, chumi rama mi Kanaan-hote chuan Atada hruihzâwla an mitthi sûn chu an hmuh chuan, “Hei, Aigupta-ho mitthi sûnna nasa tak a nih hi,” an ti a; chuvângin, chumi hmun hmingah chuan Abel-mizraim an vuah ta a, chu chu Jordan lui râla awm a ni.

¹²Tin, a fapate chuan a thupêk ang zêlin an tihsak a.

¹³A fapate chuan Kanaan ramah an zâwn lût a, Abrahaman phûmna hmun ro atân, Hit mi Ephrona laka a lo chawpa a lei, Mamre zâwna Makpela lova pûkah chuan an phûm ta a ni.

¹⁴Tin, Josefa chu a pa a phûm zawh chuan, amah leh a unaute leh a pa phûm tûra a hnêna han kal vete zawng zawng nên chuan, Aigupta ramah an haw leh ta a.

¹⁵Tin, Josefa unaute chuan an pa thi chu an ngaihtuahin, “Josefan min hua ang a, a chunga thil kan tihsual zawng zawng phuba kha kan chungah hian a la la kim seuh mai ang e aw,” an ti a.

¹⁶Tichuan, Josefa hrilh tûrin thu an chah a, “I pa chuan a thih hma khân,

¹⁷‘Heti hian Josefa hnênah, “Khawngaih takin i unaute bawhchhiatna leh an sualna chu ngaidam ang che, i chungah thil zawng an tisual na a,” tiin in sawi tûr a ni,’ a ti a, thu min pe a; tichuan, khawngaih takin i pa Pathian chhiahhlawhte bawhchhiatna chu ngaidam ang che,” an ti a. Tin, a hnêna an han sawi chuan Josefa chu a ṭap ta a.

¹⁸Tin, a unaute pawh chu an va kal ve a, a hmaah chuan an bawkkhup ta hlawm a; tin, “Ngai teh, i chhiahhlawhte kan nih hi,” an ti a.

¹⁹Tin, Josefa chuan an hnênah, “Hlau suh u; Pathian aiawh em ka nih?

²⁰Nangni zawngin ka chungah thil sual tih in rilrûk a; nimahsela, Pathian chuan vawiin ang hian mi tam tak nungdama chhanhimna tûra thil ṭhaa chantîr a rilrûk zâwk a lo ni si a.

²¹Chutichuan, hlau suh u; nangmahni leh in fanau tê tête nên ka châwm zêl ang che u,” a ti a. Chutichuan, a thlamuan a, ṭawngkam ṭha takin a be hlawm a.

²²Tin, Josefa chu amah leh a pa chhûngte nên, Aigupta ramah chuan an awm a; Josefa chu kum za leh kum sâwm a dam a.

²³Josefa chuan Ephraima fa, a tute khûp thum a hmu a. Manasea fapa Makira fate pawh Josefa mal chungah an piang a.

²⁴Tin, Josefan a unaute hnênah, “Ka thi dâwn ta e; nimahsela, Pathianin a rawn kan ngei ngei ang che u a, he ram ata hi a rawn hruai chhuakin, Abrahama te, Isaaka te, Jakoba te hnênah chhechhama pêk a tiam ramah a hruai chho vang che u,” a ti a.

²⁵Tin, Josefa chuan Israela thlahte chu chhia a chhamtîr a, “Pathianin a rawn kan ngei ngei ang che u a, ka ruhte hi heta ta in zâwn chho tûr a ni,” a ti a.

²⁶Chutichuan, Josefa chu kum za leh kum sâwm mi a nihin a thi a; tin, a ruang chu ṭawih thei lovin an siam a, Aigupta ramah kuangah an dah ta a.