Read Mizo_Old_version Genesis 6 Bible Online

Genesis 6 - Mizo_Old_version bible

Genesis 6

¹Tin, heti hi a ni a, lei chungah mihring an lo puna fanute an lo neih hlawm chuan,

²Pathian fapate chuan mihring fanute chu hmêlṭha takin an hmu a; tichuan, an duh zâwng apiang chu nupuiah an nei ta ṭhîn a.

³Tichuan, LALPA chuan, “Ka Thlarau chuan mihring chu kumkhuain a bei reng lo vang, anni chu tisa an ni si a; nimahsela, kum za leh kum sawmhnih chu an la dam ang,” a ti a.

⁴Chûng lai chuan mi lianho chu leiah hian an awm a; chumi hnuah pawh Pathian fapaten mihring fanute chu an pâwl a, an laka fate an neih ṭhin lai khân an awm bawk a. Chûngte chu hmasânga mi chak, mi hmingthangte kha an ni.

⁵Tin, LALPA chuan leiah hian mihring sualzia chu nasa tak a ni tih leh, an rilru suangtuahzia rêng rêng chu sual hlîr a ni fo mai tih a lo hria a.

⁶Tichuan, leiah hian mihring a lo siam tâk avângin LALPA chu a inchhîr a, rilru nat nân a hman phah ta a.

⁷Tichuan, LALPA chuan, “Ka mihring siam hi lei chung ata ka tiboral teh mai ang; mihring te, sa te, rannung te, chunglêng sava te nên lam hian; ka siam tâk avângin ka inchhîr a ni,” a ti a.

⁸Nova erawh chuan LALPA mit a tlung a.

⁹Hêng hi Nova thlahte chu an ni. Nova chu mi fel tak a ni a, a dam rualpuite zîngah chuan sawisêl bo a ni. Nova chu Pathian nên an lêng dûn ṭhîn a.

¹⁰Tin, Nova chuan fapa pathum: Sema te, Hama te, Japhetha te a nei a.

¹¹Tin, lei hi Pathian mit hmuhin a chhe zo tawh a, lei hi inpâwngnêknain a khat zo ta bawk a.

¹²Tin, Pathianin lei hi a en a, tin, ngai teh, a chhe zo tawh a; tisa zawng zawngin leiah hian an awm dân an tichhe zo tawh si a.

¹³Tin, Pathianin Nova hnênah, “Tisa zawng zawng tâwpna chu ka hmaah a lo thleng ta a ni, anmahni avângin lei hi inpâwngnêknain a khat zo ta si a; tichuan, ngai teh, a lei chawpin ka tiboral dâwn e.

¹⁴I tân fâr thingin lawng siam rawh; lawngah chuan pindante i siam tûr a ni a, a chhûng lam leh a pâwn lam chu fâr hnai i hnawih vek bawk tûr a ni.

¹⁵Tin, hei hi i siam dân tûr chu a ni: lawng dung lam chu tawng zathum ni sela, a vâng lam chu tawng sawmnga ni sela, a sân lam chu tawng sawmthum ni rawh se.

¹⁶Lawngah chuan tukverh i siam tûr a ni a, a chung lam tawng khat chinah chuan i zo tûr a ni; tin, lawng kawngka chu a pangah i siam tûr a ni a. Chhâwng hnuaihnung leh chhâwng hnihna leh chhâwng thumna neiin i siam tûr a ni.

¹⁷Tin, ngai teh, keimah ngeiin tisa zawng zawng, nunna thaw pai rêng rêng chu vân hnuai ata tiboral tûrin leiah hian tui ka tilêt dâwn a ni; leia thil tinrêng awm hi an thi vek ang.

¹⁸Amaherawhchu, ka thuthlun chu i chungah ka tinghet zâwk ang a; lawngah chuan i lût tûr a ni: nang i lût tûr a ni a, i fapate leh i nupui leh i fapate nupuite pawh i hnênah an lût ve tûr a ni.

¹⁹Tin, tisa zawng zawnga thil nung tinrêng zînga mi, chi tin pahnih zêlin i hnênah tihnun ve tûrin lawngah chuan i hruai lût tûr a ni; a nu leh pa zêl an ni tûr a ni.

²⁰Savate anmahni chi awm dân ang ṭheuhvin, rante anmahni chi awm dân ang ṭheuhvin, leia rannung tinrêng anmahni chi awm dân ang ṭheuhvin, chi tin pahnih zêlin, i tihnun tûrin i hnênah an lo kal tûr a ni.

²¹Tin, chaw in ei mi zawng zawng la la, i hnênah dah khâwm rawh; tichuan, nang leh anni tân chaw a ni ang,” a ti a.

²²Chutiang chuan Novan a ti a; Pathianin a hnêna thu a pêk zawng zawng ang ngei chuan a ti ta a.