Read Mizo_Old_version Genesis 7 Bible Online

Genesis 7 - Mizo_Old_version bible

Genesis 7

¹Tin, LALPAN Nova hnênah chuan, “Nang leh i chhûngte zawng zawng chu lawngah lût rawh u; nang zawng tûnlai ṭhangthar zîngah hian ka mit hmuhin mi fel tak i nih hi ka hria che a ni.

²Sa thiang tinrêng zînga mi, a pa leh a kawppui nu nên ṭheuh tuak sarih zêlin; sa thiang lo zînga mi, a pa leh a kawppui nu nên ṭheuh tuak khat zêlin;

³chunglêng sava zînga mi pawh, a nu leh a pa ṭheuh tuak sarih zêlin, lei chung zawng zawngah chi thlah tûra tihnun tûrin i hnênah i hruai tûr a ni.

⁴Ni sarih a la bâk a, chumi hnuah chuan lei chungah hian ni sawmli leh zan sawmli chhûng zawng ruah ka sûrtîr ang a, ka thil nung siam tinrêng hi lei chung ata ka tiboral ang,” a ti a.

⁵Tichuan, Nova chuan LALPAN a hnêna thu a pêk zawng zawng ang zel chuan a ti ta a.

⁶Tin, leia tui a lêt lai chuan Nova chu kum zaruk mi a ni a.

⁷Tin, tui a lêt dâwn avângin Nova chu lawngah chuan a lût a, a fapate leh a nupui leh a fapate nupuite pawh a hnênah an lût ve a.

⁸Pathianin Nova thu a pêk ang khân sa thiang zînga mi pawh, sa thiang lo zînga mi pawh, sava zînga mi pawh, leia bawkvâka kal tinrêng zînga mi pawh, a nu leh a pa ṭheuh, a tuak zêlin Nova hnênah lawngah chuan an lût ta a.

¹⁰Tin, ni sarih hnuah chuan leiah hian tui chu a lo lêt ta a.

¹¹Nova chu kum zaruk a nih kum, a thla hnihna ni sâwm leh ni sarih niah, chumi ni ngei chuan tui thûk zau tak hna zawng zawngte chu a lo sah ta vek a, vân tukverhte pawh a lo inhawng ta bawk a.

¹²Tin, ni sawmli leh zan sawmli chhûng zawng leiah hian ruahpuivânâwn a sûr ta a.

¹³Chumi ni ngei chuan Nova te, Nova fapa Sema te, Hama te, Japhetha te, Nova nupui leh a fapate nupui pathumte chu lawngah chuan an lût ta a.

¹⁴Anniho bâkah sa tinrêng anmahni chi awm dân ang ṭheuhvin, ran zawng zawng anmahni chi awm dân ang ṭheuhvin, rannung leia bawkvâka kal tinrêng anmahni chi awm dân ang ṭheuhvin, sava tinrêng anmahni chi awm dân ang ṭheuhvin sava tinrêng, thla nei tinrêng chu an lût bawk a.

¹⁵Tichuan, tisa zawng zawng nunna thaw pai rêng rêngte chu, a tuak zêlin Nova hnênah lawngah chuan an lût ta a.

¹⁶Tin, a lûtte chu Pathianin a hnêna thu a pêk angin tisa zawng zawng zînga mi a nu leh a pa zêlin an lût a; tin, LALPAN ani chu a khâr khum ta a.

¹⁷Tin, tui chu leiah hian ni sawmli chhûng zawng a lêt a; tui chu a lo awm ta pûng a, lawng chu a chîm lâng a, lei chung lamah a sêp kâng ta a.

¹⁸Tin, tui chu a lo awm ta pûng pûng a, lei chungah hian a lo pung ta chiam a, lawng chu tui chungah chuan a lâng zêl a.

¹⁹Tin, lei chungah hian tui chu nasa takin a lo pung a; vân hnuaia tlâng sâng zawng zawngte chu a pil zo ta vek a.

²⁰Tawng sâwm leh tawng nga zeta sângin a lo awm ta pûng a; tlângte chu a pil ta daih a.

²¹Tichuan, tisa, lei chunga che thei zawng zawng: sava te, ran te, sa te, rannung lei chunga bawkvâka kal tinrêng te, mihring zawng zawngte chu an thi zo ta vek a.

²²An hnâra nunna thlarau thaw awmna zawng zawng, khawmuala awm apiangte chu an thi zo ta vek a.

²³Tichuan, lei chunga thil nung awm tinrêng: mihring te, ran te, rannung te, chunglêng savate chu tihboralin an awm a; lei ata tihboralin an awm ta. Nova leh lawnga a hnêna awmte chauh chu zuahin an awm ta a.

²⁴Tin, tui chu ni za leh ni sawmnga chhûng zawng chuan leiah hian a awm ta pûng mai a.