Read Mizo_Old_version Genesis 8 Bible Online

Genesis 8 - Mizo_Old_version bible

Genesis 8

¹Tin, Pathianin Nova leh lawnga a hnêna thil nung tinrêng leh ramsa zawng zawng awmte chu a hre reng a; tin, Pathianin lei chung lamah hian thli a tlehtîr a; tichuan, tui chu a lo kâm ṭan ta a.

²Tui thûk tak hnate leh vân tukverhte pawh chu a lo inkhâr a, vân aṭanga ruah lo sûr chu tihbânin a awm ta bawk a.

³Tichuan, tui chu lei chung ata a kâm ta deuh deuh va. Tichuan, ni za leh ni sawmnga a ral hnu chuan tui chu a lo tlêm ta deuh va;

⁴tichuan, lawng chu thla sarihna ni sâwm leh ni sarih niah chuan Ararat tlângah a innghat ta a.

⁵Tin, tui chu thla sâwmna thlengin a tlêm ta deuh deuh zêl a; tin, thla sâwmna ni khat niah chuan tlâng chhîpte chu a lo lang ta a.

⁶Tin, ni sawmli hnuah chuan heti hi a ni a, Nova chuan lawng tukverh a siam kha a hawng ta a.

⁷Tin, choâk pakhat a thlawh chhuahtîr a; chu chu a chhuak a, lei ata tui chu a kang zawh hma loh chuan a thlâwk vêl a thlâwk vêl a.

⁸Tin, lei chungah tui a tlêm tawh nge tawh lo tih hriat nân ṭhuro a thlawh chhuahtîr leh a;

⁹nimahsela, ṭhuro chuan fûkna rêng rêng a hmu lo va, a hnênah lawngah a kîr leh ta a, tui chu lei chung zawng zawngah chuan a la awm si a. Tichuan, a kut a han zen chhuak a, a man a, lawng chhûngah chuan a hnênah a la lût leh ta a.

¹⁰Tin, ni sarih dang a nghâk leh rih a, ṭhuro chu lawng aṭangin a thlawh chhuahtîr leh a.

¹¹ṭhuro chu tlai lamah chuan a hnênah a lo lût leh a; tin, ngai teh, a hmuiah chuan olive hnah tihthlawn hlim a rawn pu a; chutichuan, Nova chuan leiah tui a tlêm ta tih a hre ta a.

¹²Tin, ni sarih dang a nghâk leh pek a, ṭhuro chu a thlawh chhuahtîr leh a; tin, a hnênah a lo kîr leh ta lo va.

¹³Tin, heti hi a ni a, a kum zaruk leh kum khatnaah, a thla khatna ni khat niah chuan tui chu lei ata a kang zo ta a; tichuan, Nova chuan lawng khuhna chu a hlîm a, a en a; tin, ngai teh, lei chung chu a lo hil ta tlung a.

¹⁴Tin, a thla hnihna ni sawmhnih leh ni sarih niah chuan lei chu a lo ro zo ta a.

¹⁵Tin, Pathianin Nova hnênah chuan,

¹⁶“Lawng ata chhuak rawh, nang leh i nupui leh i fapate leh i fapate nupuite pawh i hnênah chhuak ve rawh se.

¹⁷Tisa zawng zawng zînga mi thil nung tinrêng i awmpuite kha, sava te, ran te, rannung lei chunga bawkvâka kal tinrêngte nên khân i hnênah hruai chhuak rawh, leiah hian no nei ṭeuhvin, chi tam tak thlaha an lo punna tûrin,” tiin a sawi a.

¹⁸Tichuan, Nova chu a chhuak a, a fapate leh a nupui leh a fapate nupuite pawh a hnênah an chhuak ve a.

¹⁹Sa tinrêng te, rannung tinrêng te, sava tinrêng te, lei chunga che thei apiangte chu anmahni chi awm dân ang ṭheuhvin lawng ata chu an chhuak a.

²⁰Tin, Nova chuan Lalpa tân maichâm a siam a; tin, sa thiang tinrêng zînga mi leh sava thiang tinrêng zînga mi a la a, maichâmah chuan hâlral thilhlante a hlân ta a.

²¹Tin, LALPAN rimtui chu a hria a; tin, LALPA chuan a rilruin, “Lei chu mihring avângin ânchhia ka lawh leh tawh lo vang, mihring rilru ngaihtuahnate chu an naupan têt ata a sual si a; tûna ka hrem ang hian thil nung tinrêng ka hrem leh tawh hek lo vang.

²²Lei awm chhûng zawng buh tuh leh buh lâk te, khaw vâwt leh khaw lum te, nipui leh thlasik te, chhûn leh zân te chu a bo lo vang,” a ti a.