Read Mizo_Old_version LEHKHABU PAHNIHNA SAMUELA 11 Bible Online

LEHKHABU PAHNIHNA SAMUELA 11 - Mizo_Old_version bible

LEHKHABU PAHNIHNA SAMUELA 11

¹Tin, heti hi a ni a, kum a lo veia, lalte indo tûra an chhuah ṭhin lai hun chuan Davidan Joaba chu a tîr a, a mite leh Israel mi zawng zawngte nên; tin, Amona thlahte chu an tiboral a, Raba khua an hual a, Davida erawh chu Jerusalem-ah a awm a.

²Tin, heti hi a ni a, tlai nêmah chuan a khum ata Davida chu a tho va, lal in chungah a han kal a; tin, in chung aṭang chuan hmeichhe pakhat inbual lai hi a han hmu a; chu hmeichhia chu hmêlṭha tak a ni.

³Tin, Davida chuan mi a tîr a, chu hmeichhe chanchin chu a zawh fiahtîr a. Tin, “Eliama fanu, Bathsebi, Hit mi Uria nupui a ni lâwm ni?” an ti a.

⁴Tin, Davida chuan mi a tîr a, an hruai ta a; tin, a hnên chu a va thleng a, a lo mutpui ta a (a fel loh loh lai tak a ni a); tin, a in lamah a haw leh ta a.

⁵Tichuan, hmeichhia chu a lo rai ta a; tin, “Nau ka pai ta,” tiin Davida chu a hrilhtîr a.

⁶Tin, Davida chuan Joaba hnênah, “Hit mi Uria chu ka hnênah han kaltîr rawh,” tiin a chah a. Tin, Joaba chuan Uria chu Davida hnênah a kaltîr a.

⁷Tin, Urian a hnên a han thlen chuan, Davida chuan Joaba leh mite chu eng nge an ana, indonaahte eng nge an an tih a zâwt a.

⁸Tin, Davida chuan Uria hnênah, “I in lamah haw la, i kete zuk sil rawh,” a ti a. Chutichuan, Uria chu lal in ata chu a chhuak a; tin, lal chuan ei tûrtein a ûmzui a.

⁹Nimahsela, Uria chu a pu chhiahhlawhhote zîngah lal in kawngkhâr bulah chuan a mu ve ta mai a, a in lamah chuan a haw ta lo va.

¹⁰Tin, Davida chu, “Uria chu a in lamah a haw lo,” tiin an han hrilh veleh chuan Davidan Uria hnênah, “Khawilo ni hâwng i ni lâwm ni? Engati nge i in lamah i hâwn loh?” a ti a.

¹¹Tin, Uria chuan Davida hnênah, “Pathian bâwm te, Israel-te leh Juda-te chu bûkah an awm a; tin, ka pu Joaba leh ka pu mite chu ramhnuaiah an inkulh a; kei ka inah hâwngin ka eiin ka in ang a, ka nupui hnênah ka mu bîk ang maw? I nunna leh i thlarau nunna chhâlin ka sawi e, chu chu ka ti lo tawp ang,” a ti a.

¹²Tin, Davida chuan Uria hnênah, “Vawiinah pawh hetah awm la, naktûkah i kal dâwn nia,” a ti a. Chutichuan, Uria chu Jerusalem-ah chuan chumi ni leh a tûkah pawh chuan a awm ta a.

¹³Tin, Davida chuan a ko va, a hmaah chuan a eiin a in a, a tirui ta dêr mai a; tin, tlai lamah chuan a in lamah haw lovin a pu chhiahhlawhte zîngah mu tûr chuan a chhuak ta a.

¹⁴Tin, heti hi a ni a, a tûk zîngah chuan Davida chuan Joaba chu lehkha a thawn a, Uria chu a kentîr a.

¹⁵Tin, lehkhaah chuan, “Uria chu râl zualna lai berah hmatâwntîr ula, an thaha a thih hlauh nân thlahthlam rawh u,” tiin a ziak a.

¹⁶Tin, heti hi a ni a, Joaban khua chu a hual vêl lai chuan mi huai huai awmna nia a hriatah chuan Uria chu a ṭantîr a.

¹⁷Tin, khuaa mite chu an chhuak a, Joaba chu an bei a, mi ṭhenkhat, Davida mite zînga mi ngei chu an thi a; tin, Hit mi Uria pawh a thi a.

¹⁸Chutichuan, Joaba chuan mi a tîr a, indo chungchâng thu lam zawng zawng chu Davida a hrilh a;

¹⁹tin, a mi tirh chu, “Lal hnêna indo chanchin zawng zawng i sawi zawha,

²⁰a thin a ur thut maia, ‘Engati nge bei tûra chutianga khaw bul lawka in kal mai? Kulh aṭangin an kâp mai ang che u tih in hre lâwm ni?

²¹Jerubesetha fapa Abimeleka kha tuin nge that kha? Buh râwt sawmna lung chungnung zâwk, hmeichhiain kulh aṭangin a chungah a zuk thlâk a. Thebez-ah khân a thi a ni lâwm ni? Engati nge chutianga kulh bul lawka in kal ni?’ a tih chuan, ‘I chhiahhlawh Hit mi Uria pawh kha a thi asin,’ ti ang che,” tiin a hrilh a.

²²Chutichuan, a mi tirh chu a kal ta a, a va thleng a, Joaban a tirh chhan zawng zawng chu Davida a hrilh a.

²³Tin, a mi tirh chuan Davida hnênah, “Mite chuan min rawn nawr a, phûlah min rawn bei a; tin, keinin an khaw luhna kawngkhâr thleng rawkin kan nawr ta a.

²⁴Tin, kâptute chuan kulh aṭangin i chhiahhlawhte chu an kâp a; tichuan, lal chhiahhlawh ṭhenkhatte an thi a; tin, i chhiahhlawh Hit mi Uria pawh kha a thi asin,” a ti a.

²⁵Chutichuan, Davida chuan a mi tirh hnênah chuan, “Joaba hnênah chuan heti hian va ti rawh, ‘Hêng hian i rilru tilâwm lo chuang suh se, khandaih chuan a tua mah a thlei si lo; nasa lehzualin khua chu bei ula, tichhe rawh u,’ tiin fuih rawh,” a ti a.

²⁶Tin, Uria nupui chuan a pasal Uria a thi tih a lo hriat chuan a pasal chu a sûn a.

²⁷Tin, a sûn hun bi a pelh hnu chuan Davida chuan a in lamah a hruaitîr a, a nupuiah a nei ta a, fapa a hrinsak a. Nimahsela, Davida thiltih chuan LALPA a tilungni lo va.