Read Mizo_Old_version LEHKHABU PAHNIHNA SAMUELA 15 Bible Online

LEHKHABU PAHNIHNA SAMUELA 15 - Mizo_Old_version bible

LEHKHABU PAHNIHNA SAMUELA 15

¹Tin, heti hi a ni a, chûng thil hnuah chuan Absaloma chuan tawlailîr leh sakawrte leh mi sawmnga a hmaa tlân tûrin a buatsaih a.

²Tin, Absaloma chu zînga takah a tho va, kulh kawngkhâr kawngah chuan a lo ding ṭhîn a; tin, lal hnêna thupawi rawn sawi tûr apiangte chu Absaloma chuan a lo ko va, “Khawii khua nge i nih?” a lo ti zêl ṭhîn a. Tin, “I chhiahhlawh hi Israel hnamte zînga hnam pakhat ka ni,” an ti zêl ṭhîn a.

³Tin, Absaloma chuan, “I e, i thu chu a ṭhain a dik a; nimahsela, ngaihtuahtu tûr lalin tu mah a ruat lo,” a lo ti ṭhîn a.

⁴Tin, Absaloma vêk chuan, “Mi tin, thupawi sawi tûr nei emaw, dîl tûr nei emaw apiang chu ka hnênah an lo kalna tûrin, kei hi hemi ram rorêltuah mi siam sela ka va ti êm ve aw! Chutichuan, fel takin ka rêlsak ṭhîn tûr,” te a lo ti bawk ṭhîn a.

⁵Hetiang pawh hian a ti a, tu pawh amah chibai bûk tûra han hnaih apiangte chu a lo ban a, a chelh a, a lo fâwp ṭhîn a.

⁶Chutichuan, Israel mi, lal hnêna thusawi tûra lo kal apiangte chu Absaloma chuan chutiang chuan a lo ti zêl ṭhîn a. Chutichuan, Absaloma chuan Israel mite thinlung chu a hîpsak a.

⁷Tin, heti hi a ni a, kum li a lo vei chuan Absaloma chuan lal hnênah, “Hebron khuaa LALPA hnêna ka thutiam hlen tûrin mi kaltîr rawh khai.

⁸I chhiahhlawh hian Suria rama Gesur-a ka awm lai khân, ‘LALPAN Jerusalem-a mi hruai leh phawt chuan LALPA rawng ka bâwl ang,’ tiin thu ka lo tiam tawh a ni,” a ti a.

⁹Tin, lal chuan a hnênah, “Thlamuang takin kal rawh khai,” a ti a. Chutichuan, a tho va, Hebron-ah chuan a kal ta a.

¹⁰Nimahsela, Absaloma chuan, “Tawtawrâwt ri in hriat veleh, ‘Absaloma chu Hebron-ah lal a ni,’ ti ang che u,” tiin Israel hnam zawng zawngte hnênah mi a tîr ru ta hlauh va.

¹¹Tin, Absaloma hnênah chuan a mi sâwm, mi zahnih Jerusalem aṭangin an kal ve a, rilru ṭha tak puin an kal a, eng mah an hre ve lo.

¹²Tin, Absaloma chuan inthawinate chu a hlan laiin, Gilon mi Ahithophela, Davida rorêlpui chu, a khua Gilo ata a chah a. An thu phiar chu a nasa hle mai a; Absaloma lamah chuan mipuite chu an pung tulh tulh mai si a.

¹³Tin, Davida hnênah chuan, “Israel mite rilru chu Absaloma lamah a thle hle mai,” tiin mi a lo kal a.

¹⁴Tin, Davida chuan Jerusalem-a a ṭhuihruai zawng zawngte hnênah chuan, “Tho ula, i tlân chhuak ang u, tu mah Absaloma lakah hian kan chhuak thei âwm si lo va. Chhuak thuai rawh u khai; chuti lo zawng, min rawn ûmphâk thuai mai ang a, kan chungah hian thil ṭha lo tak a rawn thlen ang a, khandaihin khua hi a rawn bei dah ang e,” a ti a.

¹⁵Tin, lal mite chuan lal hnênah, “Ngai teh, i chhiahhlawhte hi kan pu, kan lalin a ruat apiang ti tûrin kan inpeih reng e,” an ti a.

¹⁶Tin, lal chu a chhuak a, a chhûngte zawng zawngin an zui a. Tin, lal chuan in nghâk tûrin hmeichhe sâwm, hmeihote chu a dah a.

¹⁷Tin, lal chu a chhuak a, mipui zawng zawngte chuan an zui a; tin, Beth-merhak-ah an châwl rih a.

¹⁸Tin, a mi zawng zawngte chuan an kal pêl a; tin, Kerith mi zawng zawng te, Peleth mi zawng zawng te, Git mi zawng zawng te, mi zaruk Gath aṭanga amah rawn zuitute chuan lal chu an bêl zêl a.

¹⁹Chutichuan, lal chuan Git mi Itaia hnênah chuan, “Engtizia nge nang hi i lo kal ve? Kîr leh la, lal hnênah awm rawh. Nang chu mikhual, ram danga mi i ni bawk si a, nangma hmun lamah kîr leh rawh khai.

²⁰Nimin lawka lo kal i ni, vawiinah hian kan hnêna a chhuk a chhova min zui tûrin ka tih ve tûr che i ni em ni? Ka kal theih theihnaah ka kal dâwn a ni a; nang chu kîr leh la, i unaute zawng zawng hi hruai kîr rawh. Khawngaihna leh thutak i hnênah awm rawh se,” a ti a.

²¹Tin, Itaia chuan lal chu a chhâng a, “LALPA nunna leh lal, ka pu nunna chhâlin ka sawi e, lal, ka pu hi i awmna tawh phawtah chuan, thih leh thih a ni ang a, dam leh dam a ni ang a, i chhiahhlawh hi a awm ve zêl ang,” a ti a.

²²Tin, Davida chuan Itaia hnênah chuan, “Kal ula, kal zêl rawh u le,” a ti a. Tichuan, Git mi Itaia chu a mite zawng zawng leh an fanau zawng zawngte nên chuan an kal a.

²³Tin, ring takin a ram ṭahin an ṭap a, mipuite chu an kal vek a; thlalêr kawng lam panin lal pawh chuan Kidron lui chu a kân a; tin, mipui zawng zawngte chuan an kân bawk a.

²⁴Tin, Zadoka te chu Pathian thuthlun bâwm zâwnin Levi-ho zawngte nên a hnênah an kal ve a; Pathian bâwm chu an nghat a, mipuiin khua chu an chhuahsan kim vek thlengin Abiathara chu a han chho va.

²⁵Tin, lal chuan Zadoka hnênah, “Pathian bâwm chu khawpui chhûngah zâwn haw leh rawh u. LALPA mit tlunga ka awm chuan mi hruai haw leh ang a, Pathian bâwm leh a awmna chu mi hmuhtîr leh ang.

²⁶Amaherawhchu, ‘Nangmahah lâwmna rêng ka nei lo,’ a tih chuan ngai teh, heti mai hi ka ni a, ṭha a tih ang angin ka chungah hian ti mai rawh se,” a ti a.

²⁷Lal chuan puithiam Zadoka hnênah chuan, “Hmutheitu i ni lâwm ni? I fapate pahnih, i fapa Ahimaaza leh Abiathara fapa Jonathana nên thlamuang takin khawpuiah haw leh rawh u.

²⁸Ngai teh, kei chu chanchin mi rawn hriattîr hma loh chu thlalêra lui kaiahte hian ka lo awm ang e,” a ti a.

²⁹Chutichuan, Zadoka leh Abiathara chuan Pathian bâwm chu Jerusalem-ah an kalpui leh a; tin, chutah chuan an awm ta a.

³⁰Chutichuan, Davida chu Olive tlâng chhohnaah chuan a lâwn chho va, chhoh pah chuan a ṭap zêl a; a lu a khum a, ke lâwngin a kal a. Tin, a hnêna mi awm zawng zawngte chuan lu an khum ṭheuh va, ṭap chung zêlin an chho va.

³¹Tin, tuin emaw Davida chu, “Ahithophela chu Absaloma lamah ṭangin phiartute zîngah a tel ve,” tiin a hrilh a. Tin, Davida chuan, “Aw LALPA, Ahithophela remruat chu âtnaah chantîr tûrin ka ngên a che,” a ti a.

³²Tin, heti hi a ni a, Davida chu Pathian biakna tlâng chhîp a han lâwn chhuah chuan, ngai teh, Ark mi Husaia chu a kawr pawh thlêr haa, a lua lei kai luamin amah hmuak tûrin a lo kal a.

³³Tin, Davida chuan a hnênah, “Ka hnêna i kal ve chuan ka tân phurrit i ni mai ang a.

³⁴Amaherawhchu, khawpui lamah chuan i kîra, Absaloma hnêna, ‘Aw lalpa, i chhiahhlawhah ka awm ang e, tûn hma lama i pa chhiahhlawha ka awm ang khân tûnah hian i chhiahhlawhah ka awm tawh thung ang e,’ i va tih erawh chuan Ahithophela remruat mi dâlsaktu i ni zâwk ang.

³⁵Chutah chuan i hnênah puithiam Zadoka leh Abiathara pawh an awm ve a ni lâwm ni? Chutichuan, heti hi a ni ang a, lal ina thuchhuak i hriat apiang chu puithiam Zadoka leh Abiathara i hrilh ṭhîn ang a.

³⁶Ngai teh, an fapate pahnih, Zadoka fapa Ahimaaza leh Abiathara fapa Jonathana pawh an hnênah an awm kha; tin, i thil hriat apiangte chu mi hriattîr tûrin anmahni chu i rawn tîr ṭhîn dâwn nia,” a ti a.

³⁷Chutichuan, Davida ṭhian Husaia chu khawpuiah chuan a lût a; tin, Absaloma chu Jerusalem-ah a lût ta a.