Read Mizo_Old_version LEHKHABU PAHNIHNA SAMUELA 16 Bible Online

LEHKHABU PAHNIHNA SAMUELA 16 - Mizo_Old_version bible

LEHKHABU PAHNIHNA SAMUELA 16

¹Tin, Davida chuan tlâng chhîp lâwn chhuahna a pelh hlek hnu chuan, ngai teh, Mephibosetha chhiahhlawh Ziba chuan a lo hmuak a, sabengtung pahnih a thuam a, chhang tlang zahnih leh grêp pho ro bâwr za leh nipui thei za leh uain peng khat a phurhtîr a.

²Tin, lal chuan Ziba hnênah chuan, “Hêng hi engtizia nge ni?” a ti a. Tin, Ziba chuan, “Sabengtungte hi lal chhûngte chuan nân a ni ang a, chhang leh nipui theite hi tlangvâlte ei atân a ni ang a, uain hi chu thlalêra chau apiangte in atân a ni ang,” a ti a.

³Tin, lal chuan, “A nih leh khawiah nge i pu fapa chu?” a ti a. Tin, Ziba chuan lal hnênah, “Ngai teh, Jerusalem-ah a awm; ‘Vawiinah hian Israel-hote chuan ka pa ram mi pe leh dâwn,’ a ti nghe nghe asin,” a ti a.

⁴Tin, lal chuan Ziba hnênah chuan, “Ngai teh, Mephibosetha thil neih zawng zawng chu i ta vek a ni ta,” a ti a. Tin, Ziba chuan, “Chibai ka bûk takzet che a ni; aw lalpa ka pu, i mit tlun zêl ka tum ang e,” a ti a.

⁵Tin, Lal Davidan Bahurim a thlen chuan ngai teh, Saula chhûngte zînga mi Gera fapa a hming Simeia a lo chhuak a; ânchhe lawh chung zêlin a lo chhuak a.

⁶Davida chu lungin a dêng a, Lal Davida chhiahhlawh zawng zawngte pawh. Tin, mipui zawng zawng leh sipai huaisen zawng zawngte chu a ding lamah leh a vei lamah an awm a.

⁷Tin, Simeia chuan ânchhe lawh chungin heti hian a ti a, “Kal bo daih rawh! Kal bo daih rawh! Nang thisen chhuah hmang leh Beliala mihringpa.

⁸A rorêl ai i rêl tâk Saula chhûngte thisen chu LALPAN i chungah a rawn lêttîr ta a; tin, LALPA chuan ram chu i fapa Absaloma a pe ta. Tin, ngai teh, thisen chhuah hmang mi i nih avângin nangmaha pawi i inkhawih chawp a ni,” a ti a.

⁹Chutichuan, Zeruii fapa Abisaia chuan lal hnênah, “Engati nge he ui thisâwn hian lalpa ka pu chu ânchhia a lawh mai mai? A lu ka va tan teh mai ang aw?” a ti a.

¹⁰Tin, lal chuan, “Nangni Zeruii fapate u, nangni hian mi lo hriatsak tûr eng nge awm? LALPAN a hnêna, ‘Davida ânchhia lawh rawh,’ a tih si chuan lawh mai ang hmiang. ‘Engati nge hetianga i tih?’ tuin nge ti tehlul ang?” a ti a.

¹¹Tin, Davida chuan Abisaia leh a chhiahhlawh zawng zawngte hnênah chuan, “Ngai teh u, ka fapa, ka rîla rah ngei chuan mi thah a tum a ni a; he Benjamin mi hian a va tum nasa lehzual dâwn êm! Eng mah tih suh ula, ânchhia chu lawh mai rawh se; LALPA tihtîr a ni si a.

¹²LALPA chuan ka hrehawmzia hi a rawn hmu ang, LALPA chuan vawiina ânchhe mi lawh hi a ṭha lamin mi rûl leh mai pawh a ni thei e,” a ti a.

¹³Chutichuan, Davida leh a mite chu kawngah chuan an kal zêl a; tin, Simeia chu an râl tlâng pangah chuan a kal zêl a, a kal pah chuan ânchhia a lawh zêl a, lungtein a dêng a, vaivuttein a theh a.

¹⁴Tin, lal leh a hnêna mi awm zawng zawngte chuan chau takin Aiphim an thleng a; tichuan, chutah chuan an châwl hahdam a.

¹⁵Tin, Absaloma leh mipui zawng zawng, Israel mite chu Jerusalem-ah an kal a; tin, a hnênah Ahithophela pawh a tel a.

¹⁶Tin, heti hi a ni a, Ark mi Husaia, Davida ṭhian chuan Absaloma hnên a thlenin Absaloma hnênah, “Pathianin lalber humhim rawh se! Pathianin lalber humhim rawh se!” a ti a.

¹⁷Tin, Absaloma chuan Husaia hnênah, “Hetiang hi a ni maw i ṭhian i khawngaih dân chu? Engati nge i ṭhian hnêna i kal loh?” a ti a.

¹⁸Tin, Husaia chuan Absaloma hnênah, “Ka kal lo vang; LALPA leh hêng mipuite leh Israel mi zawng zawngin an thlana thu thuin ka awm ang a, a hnênah ka awm zâwk ang.

¹⁹Tin, tu rawng nge ka bâwl ang? A fapa hmaah rawng ka bâwl tûr a ni lâwm ni? I pa hmaa rawng ka bâwl ang khân i hmaah ka bâwl ang,” a ti a.

²⁰Chutichuan, Absaloma chuan Ahithophela hnênah, “Engtin nge kan tih ang, i ngaih dân sawi teh khai,” a ti a.

²¹Tin, Ahithophela chuan Absaloma hnênah, “I pa hmei, in nghâka a dahte hnênah va lût rawh; tin, Israel mi zawng zawngin i pain a lungten che tih an lo hria ang a; tichuan, i lama ṭangte zawng zawng kut chu a chak dâwn nia,” a ti a.

²²Chutichuan, in chungah Absaloma tân puan in an zâr a; tichuan, Israel mite zawng zawng mit hmuhah a pa hmeite hnênah chuan a lût a.

²³Chûng laia rem a ruat, Ahithophela remruatte chu Pathian thu anga ngaih a ni ṭhîn a. Chutiang bawk chuan Ahithophelan Davida leh Absaloma rem a ruatpui zawng zawngte chu ngaih a ni ṭhîn.